SADA ta warda contesta di gobierno mientras ta fiha posicion riba indexering

Ayera mainta a tuma luga un reunion cu tur sindicato representando empleadonan publico. Aki ta unda cu Edward Maduro, president di sindicato di douaneronan (SADA), a bisa cu nan tin representacion di ambtenarij. Ta asina cu, for di luna di maart, sindicatonan a sinta na mesa cu gobierno pa delinea algun tema cu ta trata diferente aspecto cu ta encera empleadonan publico; esun principal ta indexering.

Maduro a bisa cu nan a sinta specificamente na mesa pa un tema cu minister Xiomara Ruiz-Maduro mes a trece dilanti, esta indexering. Ta asina cu a compila un carta pa gobierno y cu a dirigi na minister di Finanzas mirando cu e ta e persona cu ta representa gobierno pa locual ta trata e discusionnan riba indexering. E carta aki a keda entrega ayera mes, y awor e sindicatonan ta warda riba e contesta di gobierno.

President di SADA a bisa cu mirando dialuna awor tin otro reunion cu gobierno programa, ta spera cu pa e tempo ey gobierno ya tin un opinion of un comentario riba e carta cu a nan a entrega ayera. “Despues di esaki nos lo defini kico lo ta e siguiente pasonan cu lo tuma,” e sindicalista a duna di conoce.

Durante e reunion di ayera mainta tambe a trece otro puntonan na mesa, por ehempel, e gelijkbedrag y bashi premie cu a ser kita for di esunnan cu a baha cu pensioen entrante 1 di januari 2015. Esaki tabata un tema cu a wordo discuti cu gobierno anterior caba, ora cu a tuma nota di e paso cu gobierno a tuma e tempo ey, na final di 2016.

“Esaki ya caba ta un tema cu ta dialogando cu gobierno, cual a cuminsa na 2017 caba y awo un bes mas ta cu e tema aki riba mesa.” Maduro a sigui bisa cu tin mas tema cu tin pa papia cu gobierno, cu ta na bienestar di ambtenaarnan y cu na final di dia lo beneficia gobierno tambe. El a enfatisa cu e tema mas principal ta indexering, cual ya caba den cinco reunion tabatin discusionnan.

Ta asina cu indexering no ta algo nobo, y ta algo cu semper ta ser discuti. Cada aña cu tin un aña inflacion, perdida di compra pa locual ta trata e ciudadano, den e caso aki ambtenaar; pues no ta nada nobo. Sindicato SPA ya caba a reuni cu nan miembrecia y awo cada sindicato cu falta ainda pa bay na nan miembronan pa defini nan posicion den e proximo dianan, mientras ta warda riba contesta di gobierno.

President di SADA ta bisa cu e no ta considera esaki como un ultimatum, pero si lo kier un contesta di gobierno riba e carta pa otro siman. Un bes gobierno haya esaki, ta keda na nan pa wak con nan lo contesta e carta, y “nos kier haya un contesta riba esaki pa dicidi cua lo ta e siguiente stap” y den ki direccion nan, como sindicato den aparato gubernamental, lo bay hiba e discusionnan aki mas leu, el a finalisa bisando.