Den nos edicion di diasabra y di awe nos a dedica bastante atencion na e proyecto di ley encuanto Serlimar, cu gobierno a manda pa parlamento. E ley ta duna e impresion di ta skirbi fundamentalmente cu e obhetivo di crea e cuadro empresarial y financiero pa e compania estatal Serlimar por prospera den e añanan venidero. Riba su mes esey no ta un punto di salida malo, pasobra no por permiti cu e empresa aki ta sigui opera manera e ta opera, y ademas como un problema (financiero) pa caha di gobierno. Mester ta posibel pa yega na un set up cu ta duna garantia di esaki.

Sin embargo, tin otro interes pa tuma na cuenta. Y e interesnan ey no ta beneficia di un iniciativa pa cambia ley, cu no ta basa riba un analisis amplio di henter e problematica di recoleccion y procesamento di desperdicio, cu seguidamente ta conduci na un ‘kaderwet’: un ley cu ta duna e reglanan general di maneho y procesamento di diferente tipo (defini) di desperdicio. Despues ta bin e fase di determina ken ta haci kico, kico ta e luga di e otro empresanan – priva – cu ta hungando un papel caba riba e mercado, ademas di esunnan cu lo kier bay haci esaki, ya cu gobierno mes ta propaga un ‘economia circular’ unda ta duna espacio na mas tanto iniciativa innovador pa reciclahe y re-uzo di tur tipo di material. Awor, manera ta e critica di nos Conseho Consultivo (Raad van Advies; RvA) a traha ‘pa robes’ definiendo e tereno principalmente for di loke ta conveni e empresa estatal for di un punto di bista financiero. Y esaki ta trece diferente riesgo.

E propuesta di ley aki ta tuma como punto di salida y como un hecho caba, cu un incinerador grandi ta e manera pa procesa y elimina e desperdicio cu ta keda despues cu a separa y re-uza o exporta e otro elementonan. Aki nos no ta bay riba e aspecto si gobierno por dicidi di haci esaki, ‘no matter what’. Si nan tin e votonan, nan por hacie. E ta bay pa e riesgonan cu ta envolvi cu e modelo aki. Nos no ta bay ripiti tur argumento cu a crusa nos ruta den ultimo lunanan, pero ta suficiente mustra riba e problemanan cu un incinerador por encontra: falta di material pa tene e proceso andando, produccion insatisfactorio di energia, pa menciona algun. Fuera di e gastonan grandi di inicio, ta keda e riesgo cu e partner di exterior no por opera e planta na un manera rentable mas y di algun otro skina mester bin placa acerca. Di ken e lo bin? Di gobierno; y di unda (tur) gobierno ta saca placa? Di nos… Loke nos kier argumenta aki ta, cu si e ley aki ta propone garantisa Serlimar un futuro mas estable, esey no ta elimina e riesgonan financiero pa nos.

Manera RvA ta observa den nan conseho na gobierno, ignorando e fase di contempla prome e panorama total di e problematica di desperdicio, a scoge pa tuma como punto di salida e yegada di un incinerador, sin mas, pa motibonan obvio… Aparentemente e proposito mas importante ta e obhetivo di logra dicidi e debate y bataya na fabor di un incinerador pa no ni mester considera mes otro opcion. Sin embargo, no ta sigur cu e caminda aki lo ta bay ta asina facil pa transita. Si nos ta interpreta e modelo bon, e idea ta cu e rival di sector priva grandi, despues di recolecta y separa diferente tipo di desperdicio, mester entrega e restante material – loke awe ainda nan ta paketa den ‘envirobales’ na Serlimar. Nos por spera bataya legal den corte proximamente, unda corte ta bay haya un decision dificil pa tuma, entre e interes di gobierno pa crea derecho exclusivo, hasta si esey ta implica limita actividad existente di sector priva.

Otro asunto cu nos ta observa ta cu no tin tanto diferencia entre loke un persona individual mester paga Serlimar, y loke ta cobra un empresa, unda esaki por tin substancialmente mas desperdicio. No ta miho pa maneha e simpel principio di ‘esun cu ta susha, ta paga’ y cobra segun e volumen di desperdicio cu mester recolecta? Laga Serlimar tambe bay traha na un manera empresarial, sin henter un sistema complica di excension y subsidio. E ora nos no mester dedica tanto tempo na purba salba nan.

Otro aspecto cu mester atende ta e cobransa na e turista cu ta hospeda na cualkier tipo di acomodacion. Algun aña pasa gobierno a introduci un pago pa turista bao di e capa di ‘environmental tax’ cu no a cay bon cerca hopi bishitante, tambe pasobra nan ta haya esaki pa mira riba factura. Riba e pregunta pa ki proposito ambiental esaki ta sirbi, ningun hende por duna contesta: simplemente mas placa den caha di gobierno. Awor e sector turistico lo haya un otro item pa splica nan cliente… No tin otro manera pa regla e cosnan aki? Nos no tin un otro ministro ta trahando riba racionalisacion y simplificacion di nos sistema fiscal? Y di otro banda nos ta inventa e tipo di ‘add-ons’ aki pa turismo? Vaya maneho integral den nos gobernacion.

 

LEAVE A REPLY

Please enter your comment!
Please enter your name here