(Infobae) – E modelo cu ta ser promove pa director di OpenAI ta busca transforma inteligencia artificial den un recurso accesibel pa institucionnan y ciudadanonan.

Sam Altman, CEO di OpenAI, a propone un vision disruptivo pa futuro di inteligencia artificial (AI): converti esaki den un suministro esencial, na mesun nivel cu electricidad, awa of gas.

Durante e US Infrastructure Summit organisa pa BlackRock, e directiva a presenta su idea cu AI lo opera bao di un modelo di consumo midi, unda usuarionan ta paga solamente pa loke nan usa, similar na servicio publico tradicional.

Un suministro basico y universal

Altman a defini AI como infrastructura esencial cu por integra profundamente den economia y bida diario.

“Nos ta mira un futuro unda inteligencia ta un servicio publico, manera electricidad of awa, y hende ta cumpra esaki di nos cu un contador,” el a declara durante su dialogo cu Adebayo Ogunlesi, miembro di directiva di OpenAI.

E vision ta implica cu acceso na inteligencia artificial lo stop di ta un privilegio reserva pa companianan tecnologico grandi, y bira un recurso disponibel pa compania, institucion y ciudadano. Meta, segun Altman, ta pa AI yega na un grado di expansion y disponibilidad comparable cu otro servicio publico.

Abundancia como horizonte

Segun director di OpenAI, clave di e modelo ta den probecha “abundancia di inteligencia computacional.”

Altman a sostene cu progreso tecnologico lo permiti, cu tempo, ofrece capacidadnan di AI na escala grandi y cu costo abao. Citando un expresion historico di sector energetico, el a bisa cu futuro ideal lo ta logra AI “demasiado barata pa midi.”

Sinembargo, el a reconoce cu e scenario aki ainda ta enfrenta reto significativo. Un di e principalnan ta dependencia riba infrastructura grandi di procesamento y demanda halto di energia necesario pa entrena y opera modelonan avansa di AI.

Reto di consumo di energia y infrastructura

Crecemento acelera di AI ta relaciona directamente cu expansion di centronan di data (data centers), instalacionnan cu ta concentra capacidad di calculo necesario pa alimenta e sistemanan aki.

E centronan aki ta rekeri cantidad grandi di energia electrico, algo cu ta crea debate tocante impacto ambiental y sostenibilidad di su expansion den diferente region.

Altman a indica cu actualmente modelo di negoshi di AI ta basa riba benta di unidadnan di procesamento yama “tokens”, cu ta representa cantidad di recurso computacional usa.

Pa logra cu AI bira un bien accesibel — y no un recurso exclusivo of caro — ta esencial multiplica infrastructura existente.

Reto financiero

Desaroyo di AI como servicio publico ta involucra inversionnan multimiyonario. E propio proyecto Stargate di OpenAI, enfoca riba construccion di infrastructura computacional avansa den Texas, recientemente a mester a keda reahusta debi na dificultadnan di financiamento.

A pesar di e obstaclonan aki, Altman ta insisti riba necesidad di acelera expansion di capacidad di procesamento pa evita cu inteligencia artificial bira un recurso limita.

Den e contexto aki, vision di Altman ta lanta preguntanan importante tocante futuro di e sector y papel cu tanto companianan tecnologico como gobiernonnan lo mester hunga pa sigura cu inteligencia artificial bira un recurso berdaderamente universal y sostenibel.