No ta necesario pa bay den mucho detaye di e situacion economico desastroso di San Nicolas, pasobra tur hende na Aruba ta al tanto di dje. Lo ta bon toch pa djis ‘highlight’ algun punto; un economia na piso of miho bisa bou piso, hopi negoshi cera, e mal estado di hopi edificio y/of casnan, algun medio termina otro cayendo den otro, un refineria cera y frustrando bay gol.

Un speransa grandi di pueblo Arubiano pa e por start up di nobo, cu poco poco ta bay desvaneciendo, promesanan di Citco y PDVSA cu lo start up di nobo mientras ta conocemento publico di nan situacion politico y economico etc. etc.

Mester corda bon con a cuminsa desaroya Aruba su turismo na Palm Beach tempo cu Aruba Caribbean Hotel (aunke nos tabata tin dos hotel chikito caba, entre otro, Basi Ruti na Palm Beach y Strand hotel na Playa) tabata tin mester di un hotel grandi pa a duna e ‘boost’ necesario.

Awor ta momento pa un desaroyo nobo, un proyecto di tal magnitud cu por duna San Nicolas e ‘boost’ cu e merece pa e lanta cabes ‘once and for all’.

Nos ta consciente e di presion ‘social y di infrastructura’ cu e proyecto aki ta pone riba Aruba door cu posiblemente mester importa algun trahado pa complementa e ‘manpower needs’ y otro impactonan adicional manera utilities, schoolnan, cuido medico etc. pero aki mester considera cual tin prioridad, San Nicolas of e tiki presion? Nos ta convenci cu aki San Nicolas ta prioridad number UNO.

Un proyecto cu lo crea hopi cupo di trabou, cu e personanan biba na San Nicolas y bisindario porfin por traha cerca di cas. Tambe e proyecto lo crea un trafico turistico como local y duna bida na centro di ciudad door di crea negoshinan paralelo manera restaurant, tienda, car rental, etc. Pa no papia mes di e entrada adicional cu gobierno lo cobra na tanto winst como loon belasting.

Un plus punt di e proyecto aki ta cu nan ta ‘willing’ pa traha e proyecto cu of sin refineria!

Awor e pregunta ta pakico un all-inclusive na San Nicolas? Esaki ta logico pasobra no tin e infrastructura manera na Palm Beach pa por opera un hotel normal European Plan!

Importante pa tene na cuenta cu e proyecto aki di hotel y condominio ta su magnitud y cu e por sobrevivi riba su mes mientras ta desaroya e infrastructura. Esaki lo atrae otro inversionistanan ora mira e potencial di San Nicolas anto e ora ey lo keda na un bon gobierno pa evalua con y di ki modo lo sigui desaroya San Nicolas y crea e infrastructura necesario.

Nos kier pa tuma cuenta cu no ta pasobra nos ta apoya e proyecto aki di ‘all-inclusive’ na San Nicolas kiermen cu nos ta apoya mas ‘all-inclusive’ na Palm Beach, al contrario. Mester tin un balans entre ‘all-inclusive’ y ‘hotelnan EP’ pa mantene nos calidad di turismo y pa por distribui e rikesa tanto pa e inversionistanan stranhero como pa e pueblo di Aruba.

En resumen: San Nicolas cu tabata fungi den tempo di Lago como capital industrial di Aruba for di cual hopi di nos hendenan a logra un desaroyo exitoso pa nan mes y nan famia, awe ta anhela atrobe di por forma parti di e exito economico cu e pais ta disfruta. Esaki lo atrae automaticamente un ‘spin off’ positivo unda directamente e habitantenan di San Nicolas y bisindario lo contribui mas den nan propio bario. Mas casnan, casnan cu mas balor. Inversion den recurso humano di esunnan cu ta biba pariba di brug. Dunando e centro di San Nicolas un oportunidad nobo, un futuro nobo, un bida nobo!

 

 

1 COMMENT

  1. Ta bon pa busca informacion for di FAA prome cu duna un opinion of scirbi un editorial.Te unda por a lesa e editorial ta papia di cu San Nicolas merece lo mihor semper a usa e palabra ey esei no ta un problema di ambientalista ni tampoco di instancianan humanitaria cu economia ta malo si y ta nos politiconan mes y cierto medianan mes a yuda pa pone un imagen negativo di e refeneria pa cere.Industria Turistico no ta mas grandi cu un industria hotelero suscrito ta studia pa cu economia y turismo na mil un biaha a splica cu un desaroyo turistico no ta posibel dicon paso bo no por competi cu playa y dicon a warda 48 Anja pa lanta for di sonjo mas hotel y turismo no ta e solucion nos ta satura na hotel y turismo.
    Tur loke awordo treci pa dilanti ta papia mas di problema social awor si bo kier pa e situacion bira peor bo ta traha mas hotel paso bo tin cu bai importa mas trahador di afor anto e ora e no ta un crisis social y humanitario mas pero un calamidad grandi.E unico solucion ta keda pa habri e refeneria bek si no por via Citgo of PDVSA anto busca otro operador pero no keda hunga wega politico y sigi tarda pesei awe nos ta den un problema economico no pa motibo cu ambientalistanan y esnan cu si ta responsabel pa cuida y conserva nos rikesanan natural, historico y cultural kiko bo kier pa turista bin wak hotel of nos usa nos recursonan natural, historico y cultural pa loke nan ta bin pe.Un hende cu a studia economia y turismo pa cual suscrito ta un di nan sa cu turistanan ta bin pa nos rikesanan natural nos cuebanan nos historia mina di fosfaat y tunnel di awa nos beachnan y otro atraccionnan y no pa bin wak mas hotel nos tin hopi reclamo di turistanan pa no hotel na baby beach y ariba e baranca y den e area di Sero Colorado nos di Accion Ambiental a studia e area aki for di 1997 te cu awe logisticamente, naturalmente, historicamente y culturalmente y pa esnan cu no sa UNESCO ta protega esakinan.Hasta nos gobernador ta purba di concientisa esaki.
    Hopi no conoce Sero Colorado y Baby Beach y ta scirbi cu hendenan ta contra desaroyo etc wel for di 1972 pa dulanti Nacionnan Uni pa medio di UNEP y UNESCO ta stress hopi ariba e cuido di nos naturalesa, nos historia y parti cultural.Sero Colorado pa esnan cu no sa ta e area mas rico den su parti natural, historico y cultural.Si ta desea nos por mustra prensa di loke no sa of no ta na haltura di dje.Nos mester stop di sigi politiconan of wak e cosnan materialmente.Hopi no sa of conoce Sero Colorado.Tumando nota di tur reaccion ni prensa y gobierno ministernan y parlamento no conoce Sero Colorado y Aruba.

    Saludos Cordial,

    Marcos Bislip
    Fundacion Accion Ambiental

LEAVE A REPLY

Please enter your comment!
Please enter your name here