Recientemente un delegacion di Departamento di Agricultura, Criadero y Pesca, Santa Rosa Aruba, lidera pa directora Sra. Nathalie Maduro, a asisti e conferencia internacional “Farming the Future”, organisa pa farmingthefuture.nl na Hulanda.
“Farming the Future” ta un plataforma internacional caminda profesionalnan di agricultura y produccion di alimento ta conecta, network y comparti conocemento riba futuro di agricultura. E evento ta enfoca riba temanan manera smart farming, practicanan sostenibel y innovacion den sector agri-food. Tur esaki ta alinea cu e vision y maneho di minister di Sector Primario, Geoffrey Wever (Futuro) y den cuadro di e Programa di Gobernacion AVP-Futuro, unda cu a acorda cu lo percura pa hisa produccion local di fruta cu berdura y stimula e produccion di fruta y berdura localmente uzando tecnologia cu ta compensa pa e limitacionnan di nos clima, obtenibilidad di tereno y suela.
Durante e conferencia, e delegacion di Santa Rosa a topa cu diferente expertonan internacional y promotornan di agritech Hulandes pa analisa entre otro:
Tecnologia pa smart farming, agricultura di precision y digitalisacion;
Strategianan pa agricultura inclusivo cu naturalesa y regenerativo;
Formanan pa reduci desecho di cuminda, mehora calidad di cuminda y fortalece sistema di produccion local di cuminda.
“Nos ta trahando duro riba implementacion di agricultura moderno y innovativo na Aruba, usando tecnologia y innovacion den agricultura, pa asina nos haci Aruba menos dependiente di importacion y duna oportunidad na nos localnan pa tin un negoshi den agricultura y e participacion di Santa Rosa na e forum aki ta parti di nos strategia pa logra esaki”, segun Wever.
