Ayera mainta durante un conferencia di prensa Minister di Salubridad, Asunto Social, Cuido di Adulto Mayor y Maneho di Adiccion Mervin Wyatt Ras, Minister di Finanzas, Economia y Sector Primario Geoffrey Wever, hunto cu directora di Directie Ouderenzaken Desiree Helder, y directora di Departamento di Agricultura, Cria y Pesca Nathalie Maduro pa formalisa un convenio di cooperacion na bienestar di comunidad di adulto mayor na Aruba.

Ministernan a firma un convenio cu ta delinea cooperacion estrecho entre Directie Ouderenzaken y Santa Rosa cu ta fortifica y mehora e participacion di adulto mayor den comunidad.

“Cu placer y gratitud mi ta sinta awe akinan pa asina nos por firma e acuerdo di cooperacion entre e dos instancianan aki, Santa Rosa y Directie Ouderenzaken, pa asina haci posibel cu proyectonan pa nos adultonan mayor lo por bira realidad den cooperacion cu otro,” minister Wyatt-Ras a expresa.

El splica cu ta importante pa adultonan mayor, cu ta den un fase di bida cu nan a haci hopi comunidad, aworaki mester tin e oportunidad tambe pa na un forma creativo, den naturalesa y tambe cerca di otro sigui participa den comunidad y alabes tambe haci posibel cu nan por tin un miho calidad di bida den comunidad.

“Esey ta nos empuhe y awe nos ta haya mas inspiracion pa sigui traha pa e grupo di adulto mayor y conhuntamente tambe cu e instancia cu ta haci posibel cu nos por proteha tambe tur locual ta trata agricultura y tambe e cria y pesca pa asina nos por eleva esakinan den gobernacion aki. Nos ta kere tambe de crea un base duradero pa economia y pa logra tur proyecto cu nos kier pa nos grandinan na un manera hopi practico y cu lo por ta den relacion cu agricultura,” e mandatario a remarca.

Di su banda minister Geoffrey Wever a expresa cu e firma di convenio di cooperacion aki ta un bunita momento caminda cu di parti di gobierno ta duna contenido na vision di gobierno pa stimula participacion, crea un miho ambiente pa adultonan mayor na Aruba y tambe stimula e sector di cria, pesca y agricultura.

“Dos minister ta bin hunto pa uni den un proyecto cu ta sirbi dos proposito. Nos ta firma un samenwerkingsovereenkomst caminda ta formalisa e cooperacion den beneficio di e adultonan mayor cu a traha hopi pa Aruba y yuda nos cu unda nos ta awe y nos di parti di gobierno ta duna contenido pa nan tambe tin un bida digno y por biba na un forma mas agradabel y por tin un bunita actividad hunto cu Santa Rosa cu lo facilita tur e proyectonan aki relaciona cu agricultura cria y pesca,” el a subraya.

Di su banda directora di Directie Ouderenzaken, Sra. Helder, a splica cu e prome proyecto cu ta bay ser ehecuta ta un fiesta di cunucu pa adultonan mayor. El a sigui splica cu durante e evento aki diferente organisacion di adulto mayor mes ta bay bende cuminda, cos dushi, obra di man netamente pa tambe haya fondo pa sigui haci actividadnan pa adulto mayor.

Nathalie Maduro a expresa cu e organisacion ta hopi contento cu e proyecto aki ya cu luna di october no ta solamente luna di adulto mayor, pero tambe luna di alimentacion tambe.

El a indica cu manera semper lo tin tur productornan di producto local y locual cu tin adicional durante e fiesta di cunucu aki ta cu esnan cu kier cumpra cabrito bibo, algo cu normalmente Santa Rosa no ta haci, por haci esaki durante e fiesta di cunucu.

Helder a agrega cu durante evento aki tambe lo presenta un reconocemento na e heroenan local, personanan cu a contribui grandemente na comunidad di Aruba.

Pa loke ta e idea pa e convenio di cooperacion aki, Helder a splica cu e idea a bin di diferente caminda. El a sigui splica cu nan tabata buscando actividadnan pa adulto mayor, y ademas nan a tene na cuenta tambe actividadnan cu e persona mes tin deseo di haci, por ehempel vooral hende homber cu gusta traha den cunucu y agricultura.

El a indica cu di otro banda Santa Rosa tambe tin pa hopi tempo e deseo di tin actividad pa adulto mayor. “E ora nos a bisa ban traha hunto pasobra e intencion naturalmente ta pa gobierno uni pa provee actividadnan pa adulto mayor, y conhuntamente cu diferente generacion, envolviendo hoben nos kier pa nan keda mas activo, mas saludable, nan bienestar e ora ta miho y p’esey mes nos ta uni forsa pa haci diferente proyecto hunto pa adulto mayor,” el a remarca.

Tocante e convenio di cooperacion mes, Helder a splica cu e no tin un limite di tempo, pero a pensa riba tres proyecto pa cuminsa. E prome proyecto ta e fiesta di cunucu pa adultonan mayor, e di dos ta un proyecto caminda cu ta bay e casnan di cuido pa nan tin un manera pa nan por yuda adultonan mayor cultiva cu baki di mata cu ta accesibel pa adulto mayor tambe den rolstoel, y di tres proyecto ta uno di pesca den cual hunto cu Santa Rosa lo siña adulto mayor hunto cu hobennan con pa pisca.

E intencion tras di esaki el a indica ta pa e adultonan mayor por demostra nan conocemento na e hobennan con pa pisca, kico tur mester tene na cuenta, pero hunto haciendo e actividad aki.