Un caso di abuso sexual y supuesto violacion a causa scandal na Ecuador, despues cu muchanan a denuncia cu por lo menos cuatro maestro a agredi sexualmente varios mucha entre 5 y 7 aña, na un scol na Guayaquil.

Te na e momento aki, fiscalia di Ecuador a ordena prizon preventivo pa tres maestro cu ta sospechoso, y awor nan ta investigando varios denuncia ricibi den e mesun caso. Un otro  maestro ta sospechoso tambe y awor ta huyendo pa husticia. Autoridadnan ta ofrece 10.000 dollar di recompensa pa esunnan cu por duna informacion cu lo contribui na su captura.

E caso a sali na luz publico dia 6 di october, ora cu fiscalia a haya denuncia di dos mama cu a denuncia delito di  agresion sexual contra nan yiunan di 7 aña, tur di nan ta alumno di e colegio Réplica Aguirre Abad di puerto di Guayaquil (suroeste).

Despues di tur e denuncianan, fiscalia a entrevista cinco mucha di 7 y 8 aña, y nan a splica cu e grupo di maestro aki tabata participa den abuso sexual den baño di e scol durante pausa, via di engaño, menasa y otro metodo,” e comunicado a splica.

Autoridad local a reacciona despues di e denuncia aki y nan a sigura cu autoridad di e scol ta responsabel tambe, pasobra nan a ignora tur denuncia cu a haci cerca nan anteriormente.

Departamento di Conseho Estudianti a entrega dos informe na rectora di e scol: un di nan dia 30 di mei y otro mas dia 6 di juni. El a manda e documento pa e Distrito Educativo y nan a solamente debolbe e documento, pero no a tuma ningun accion,” ministro di educacion Ecuatoriano, Fander Falconí,  a indica.

Secretario di estado a bisa cu directora di e scol mester a denuncia formalmente e situacion, despues di cu nan a haya e prome denuncia di e muchanan. Directora di scol a ser destitui ultimo fin di siman y awor e ta ser investiga pa motibo di negligencia, corant El Universo di Ecuador a comunica.

Desde dialuna fiscalia a haya mas di dies denuncia, y a cuminsa ricibi version di otro mayornan y di maestro di e scol aki, despues di cual lo cuminsa cu e audiencia di acusacion di delito contra e sospechosonan.

E cantidad di mucha cu a ser abusa sexualmente ta mas di 100, un cantidad cu a ser comunica na prome instante pa fiscalia, aunke ministerio di educacion no a confirma e informacion ainda, y ta na espera di e avance di e investigacion.

Pa tur testimonio cu a ser recolecta te awor, fiscalia ta sigura cu por bin dilanti otro delito, entre nan pornografia infantil.