(AP) — Sean “Diddy” Combs a keda condena pa ofensanan relaciona cu prostitucion pero a keda absolvi diaranson di acusacionnan di trafico sexual y raket cu por a pone un di e figuranan mas celebra di hip-hop sera pa bida largo.

E resultado mixto ainda por manda Combs, di 55 aña, prizon pa mas cu un decada, y probablemente lo termina su carera como un ehecutivo di musica di exito, empresario di moda, embahador di marca y strea di reality TV.

Despues di a tende e veredicto, Combs a hisa su mannan den un mocion di oracion, mirando hurado y a brasa e abogado di defensa Teny Geragos. Combs su pariente y sostenedor den e publico apenas por a contene nan alivio, a pesar di e advertencia di e hues pa evita explosionnan: Ora e prome “no culpabel” a ser lesa na bos halto, un hende a grita, “Si!”

Combs a keda condena pa bula hende rond di e pais, incluyendo su parehanan y trahadornan sexual masculino paga, pa participa den encuentronan sexual, un violacion di e ley federal di Mann.

Pero e hurado di ocho homber y cuatro muher a absolve Combs di conspiracion di raket y acusacionnan di trafico sexual, relaciona cu acusacionnan cu el a usa su placa, poder y forsa fisico sepantoso pa manipula su amiganan den centenares di maraton sexual alimenta pa droga cu e hombernan.

E defensa di Combs a argumenta cu e muhernan tabata participante dispuesto y cu ningun di su violencia no a hustifica e severidad di e acusacionnan.

No tin un fecha ainda pa sentencia, ki ora e hues lo dicidi riba e castigo di Combs pa e condenacion di prostitucion.

Veredicto ta sigui simannan di testimonio dificil

Huradonan a delibera pa mas o menos 13 ora durante tres dia prome cu anuncia nan veredicto.

E la bini despues cu nan a bisa diamars atardi cu nan a dicidi riba cuater acusacion pero a keda pega riba esun di raket. Na e momento ey, e hues a bisa nan pa sigui delibera y tene e veredicto parcial tapa.

Combs no a testigua na su huicio, cu a conta cu 34 testigo y tambe video di e rapper atacando su pareha anterior, e cantante di R&B Cassie.

Cassie a testigua pa cuater dia tocante su relacion turbulento di 11 aña cu Combs, cu a cuminsa despues cu el a firma cu su compania di musica, Bad Boy.

Cassie a bisa cu Combs a bira obsesiona cu encuentronan cu a envolvi trahadornan sexual y cantidad abundante di babyoil. Durante e eventonan sexual, yama “freak-offs” of “anochinan di hotel,” Combs lo a ordena Cassie pa haci cosnan cu otro homber cu e tabata haya humiliante, el a testigua.

Ora cosnan no tabata bay Combs su manera, e tabata bati’=e tambe, el a bisa.

Rapper, empresario y acusado penal

Combs tabata den centro di e batayanan di hip-hop di añanan 1990 y a bira un di e productornan y ehecutivonan di hip-hop mas influyente di e ultimo tres decadanan, diversificando su interes cu e label di moda Sean John, vodka Ciroc, un canal di television pa cable y un studio di pelicula y television.

Combs su reputacion a sufri daño, despues cu Cassie a demand’e na november 2023, alegando añanan di abuso sexual y fisico. El a regla e siguiente dia pa 20 miyon dollar, pero mas demanda di otro hende muher y homber a sigui.