“Mi no por pidi dispensa pa bisa cu solo ta sali y ta baha,” ta e reaccion di Secretario di Estado pa Asuntonan di Reino Eric van der Burg riba e demanda di sindicatonan na Aruba pa e duna dispensa pa su declaracionnan na Hulanda.
Manera ta conoci Van der Burg a declara cu HOFA, esta e rijkswet riba financiamento sostenibel di Gobierno di Aruba (houdbare overheidsfinancien Aruba) ta nifica cu e ley lo haci tur e cuater paisnan di Reino igual. E comentario aki a cay na mal tera na Aruba pa motibo cu e autonomia di Aruba y e derechonan adkiri ta diferente cu esun di Corsou y St. Maarten na 10-10-10. Aruba a haya su autonomia na 1986 bao circunstancianan dificil y sin dispensacion di debenan manera tabata e caso pa Corsou y St. Maarten na 10-10-10 pa cual si mester a bin un rijkswet di supervision.
Sindicatonan den Union di Aruba a haci un declaracion forma contra e ponencia di Van den Burg unda a enfatisa cu no ta de acuerdo cu e ponencia, y cu ta ignora e diferencia historico fundamental y constitucional den Reino Hulandes. E supervision financiero basa riba ley di Reino pa Corsou y St. Maarten tabata e condicion pa e paisnan ey haya nan autonomia. Aruba for di 1986 ta maneha su propio finanzas, den forma autonomo. “Elimina of debilita e distincion bao argumento di igualdad ta mina e realidad historico y constitucional di Aruba den Reino,” e sindicatonan a ilustra.
Ayera Secretario di Estado Van der Burg a enfatisa cu desde cu el a bira e mandatario encarga, e ta papia di cuater pais den Reino cu ta completamente igual na otro. “No ta cuestion di ta un mama y tres ruman, sino cuater ruman. E no ta bisa nada di e Status Aparte cu ta apenas un poco mas cu un luna a celebra na Aruba hunto cu Rey.” Van der Burg ta bisa cu berdad ta cu Aruba a haya su autonomia na 1986 y cu na 2010 a bin dos pais nobo.
Pero, Van der Burg a bisa cu ningun momento el a mara e autonomia di Aruba y esun di Corsou y St. Maarten na otro cu e HOFA. “Ta trata di dos asunto separa. E HOFA a keda acepta pa tur cuater gabinete di Reino Hulandes, cu awor ta na Raad van State pa conseho. Y banda di dje, mester bin un landsverordening cu Parlamento di Aruba mester acepta si kier pa e rijkswet haya su funcion. Parlamento tambe por vota contra. Ta ora cu Parlamento acepta cu e rijkswet lo bin.”
Van der Burg ta enfatisa cu e mes ta hopi positivo pa e rijkswet pasobra e lo ta na beneficio di Aruba. “E rijkswet lo nifica inversion den e funcionamento di e cuater paisnan, pero mas tanto cu Aruba por presta segun e mesun tarifanan cu St. Maarten y Corsou ta presta, cu ta tarifanan Hulandes. No tin un pais mas cu no ta Hulanda cu por otorga prestamo mas barata. Hulanda tin e rating mas halto y e interes lo ta hopi mas abao di e prijs di mercado.”
E protesta di sindicatonan cu Hulanda lo ta mina autonomia di Aruba como tal no ta na su luga y como tal, Van der Burg no ta mira e necesidad pakico e mester expresa palabranan di dispensa.
Den edicion di Dialuna Bon Dia Aruba lo amplia mas riba e ponencia di Secretario di Estado Eric van der Burg riba e tema di HOFA.
