Recientemente Secretario di Estado pa Digitalisacion y Relacionnan den Reino Zsolt Szabó den un carta fecha 19 di mei 2025 a contesta algun pregunta cu el a ricibi for di miembro di Tweede Kamer, parlamentario Peter van Haasen (PVV) tocante e retiro di e Ley di Reino pa Supervision Financiero di Aruba (RAft).

Den un carta fecha 25 di april 2025 parlamentario van Haasen a dirigi un total di seis pregunta na Secretario di Estado Szabó tocante e retiro di e Ley di Reino pa Supervision Financiero di Aruba (RAft) y e decision pa un Ley di Reino cu consenso.

Parlamentario van Haasen a puntra Secretario di Estado Szabó si ta corecto cu nan a definitivamente laga bay e Ley di Reino pa Supervision Financiero di Aruba, a pesar di e fecha limite explicitamente fiha pa 1 di mei 2025.

Secretario di Estado Szabó a splica cu e Ley di Reino pa Supervision Financiero di Aruba (RAft) a ser retira despues di un decision di e Conseho di Minister di Reino. E decision aki, el a sigui splica, a tuma luga pa motibo cu Aruba ya no ta dunando sosten pa e proposicion anterior, cual ta nifica cu no tin mas consenso riba dje, segun e acuerdo cu a tuma lugar den e Acuerdo Administrativo di 4 di juni 2024.

El a indica cu c fecha di 1 di mei 2025 tambe a bini for di e mesun acuerdo administrativo, caminda Aruba y Hulanda a yega na e acuerdo riba un diseño nobo di Ley di Reino cu ta enfoca riba un finanzas publico sostenibel pa Aruba, como reemplaso di e proposicion anterior.

Parlamentario van Haasen a puntra tambe pa ki motibo a scoge awor pa un Ley di Reino cu consenso, mientras cu antes un Ley di Reino normal tabata un condicion pa refinancia e prestamonan di Covid, ki consideracion ta na base di e decision aki y kico ta e diferencia entre e dos.

Secretario di Estado Szabó a indica cu tambe e diseño pa e RAft tabata trata di un Ley di Reino cu consenso. El a splica cu un Ley di Reino cu consenso ta un acuerdo entre paisnan, basa riba articulo 38, paragraf 2 di e Statuto, tocante temanan den ambito autonomo di e paisnan, manera finanzas publico.

El a sigui splica cu den un Ley di Reino cu consenso, e paisnan envolvi ta establece acuerdonan riba e temanan cu aprobacion mutuo, mientras cu den un Ley di Reino ‘normal’, ta trata solamente di asuntonan di Reino, basa riba articulo 14 di e Statuto, manera e Ley di Reino tocante nacionalidad Hulandes.

Van Haasen tambe a pidi Secretario di Estado Szabó si e por indica precisamente ki condicionnan e ta pone den e Ley di Reino cu consenso nobo, y ki fecha ta e deadline cu e ley aki mester ser acorda.

Segun e Secretario di Estado ta indica e acuerdonan tocante e formulacion di e Ley di Reino nobo a ser fiha den e Acuerdo Administrativo di 4 di juni 2024. Den dje, entre otro cos, a establece acuerdo riba elementonan concreto di e Ley di Reino, porcentahe di interes, y conseho independiente tocante normanan presupuestario.

Parlamentario Van Haasen a puntra Szabó si e ta considera cu ta aceptabel cu Aruba — cu te awor no a cumpli cu e condicion y plasonan estableci — awor ta haya e oportunidad pa sigui un trayecto suavisa. El a cuestiona e Secretario di Estado ta considera cu esey ta den conformidad cu e principio di igualdad den Ley di Reino y si e ta di acuerdo, con e ta splica esaki na e gobiernonan di Corsou y Sint Maarten, cu si a aproba un Ley di Reino normal.

Secretario di Estado Szabó a remarca cu e no ta reconoce e imagen di un trayecto suavisa. El a splica cu Hulanda y Aruba ta trahando hunto riba e Ley di Reino cu consenso nobo. El a sigui splica cu e proceso legislativo ta un proceso solido y formal, y a subraya cu no tin ningun indicacion cu Aruba unilateralmente no a cumpli cu e condicionnan estableci.

El a agrega cu ademas e Ley di Reino pa Supervision Financiero di Corsou y Sint Maarten (Rft) tambe ta un Ley di Reino cu consenso. Actualmente, pa Aruba e supervision financiero ta regula den e Landsverordening Aruba financieel toezicht (LAFt) y varios protocol cu tin un contenido comparabel cu e Rft.

Szabó a enfatisa cu e no ta observa ningun desbalansa of falta di igualdad legal den e trayecto cu Aruba pa yega na un Ley di Reino cu consenso.

Contestando e pregunta di parlamentario Van Haasen si ta dispuesto pa revoca e reduccion di interes di 1.8% cu anteriormente a ser otorga na Aruba, mientras cu no tin un Ley di Reino formal of un Ley di Reino cu consenso estableci, teniendo na consideracion su promesanan anterior na e Parlamento, Secretario di Estado Szabó a splica cu e reduccion di interes cu a ser aplica den 2024 ta bini for di e acuerdo di juni 2024. Pa e motibo ey e no ta mira ningun posibilidad of motibo pa revoca e reduccion di interes.

Por ultimo, parlamentario Van Haasen a puntra con Szabó su direccion actual tocante Aruba ta relacion cu su propio prioridadnan di vigilancia den area di bon gobernacion, integridad y un politica financiero solido.

Secretario di Estado Szabó a splica den su contesta cu pa e diseño di e nobo Ley di Reino, a pidi conseho di e Fondo Monetario Internacional (IMF) locual ta permiti pa basa e ley riba conocemento actual y riba e experiencia practico di IMF.

El a indica cu e Ley di Reino ta inclui normanan tocante finanzas y maneho financiero, y lo contribui directamente na su prioridad di vigilancia pa finanzas publico solido of sostenibel. “Mi ta considera esaki tambe como un parti integral di bon gobernacion.”