Secretario di Estado Hulandes pa Relacionnan den Reino, Eric van der Burg, lo bishita Aruba dia 14 di juli como parti di un recorido oficial cu ta inclui tambe Boneiro y Corsou. E agenda pa Aruba ta pone enfasis riba cooperacion entre e paisnan di Reino, fortalecemento di economia local, innovacion, desaroyo di emprendemento y coordinacion regional despues di e teremotonan reciente na Venezuela.

E bishita ta tuma lugar den un periodo unda gobierno di Aruba y Hulanda ta sigui mantene contacto regular tocante diferente reto comun. Durante e ultimo lunanan, Van der Burg a ripiti na diferente ocasion cu e ta mira Aruba, Corsou y Sint Maarten como partnernan igual dentro di Reino y cu cooperacion practico ta esencial pa enfrenta desafionan comun. Durante e OCT-EU Forum celebra na Aruba na april di e aña aki, e Secretario di Estado a enfatisa cu e diferente pais y teritorio mester uza e forsa di cada un pa logra resultado concreto y cu dialogo permanente ta importante pa haci e cooperacion funciona miho.

Pa Aruba, e programa ta concentra principalmente riba diferente tema cu gobierno ta considera importante pa desaroyo di e isla den futuro. Durante su estadia, Van der Burg lo reuni cu gobernador Alfonso Boekhoudt, prome minister Mike Eman y minister di Relacionnan den Reino, Enseñansa, Hubentud, Innovacion y Deporte, Gerlien Croes. E encuentronan aki ta ofrece oportunidad pa discuti e relacion actual entre Aruba y Hulanda, progreso den diferente trayecto di cooperacion y asunto regional cu ta afecta e Reino.

Un di e actividadnan principal ta na Universidad di Aruba caminda Secretario di Estado Van der Burg lo haya un presentacion tocante e Kingdom Start Up Program. E programa aki ta reuni studiantenan di Aruba, Corsou y Sint Maarten pa desaroya conocemento y habilidadnan den emprendemento. Meta di e iniciativa ta pa stimula innovacion y crea oportunidad pa hobennan desaroya idea comercial cu por contribui na diversificacion economico di e islanan.

E enfoke riba emprendemento no ta limita solamente na e universidad. Den e mesun contexto, Secretario di Estado Van der Burg lo bishita Vaper Trading, cu ta e prome empresa riba Aruba cu a haci uso di e Borgstelling MKB-kredieten Aruba, Corsou en Sint Maarten, conoci como BMKB ACS. E mecanismo aki ta un garantia financiero cu ta facilita acceso na credito pa empresa chikito y mediano. Door di e sistema, empresario cu normalmente tabatin dificultad pa haya financiamento por ricibi sosten financiero pa inverti den nan negoshi. E bishita ta subraya interes continuo di Hulanda y e paisnan Caribense pa fortalece e sector priva y crea mas oportunidad economico.

Otro punto importante riba e agenda ta e bishita na Ecotech, e empresa cu ta encarga cu procesonan di reciclahe y procesamento di desperdcisio. Cu esaki, Secretario di Estado Van der Burg lo haya un impresion di e desafio cu Aruba ta enfrenta riba e area di maneho di desperdicio y sostenibilidad. E tema aki a ricibi atencion regularmente den diferente discusion entre Aruba y Hulanda, mirando cu sostenibilidad y proteccion di medio ambiente ta entre e prioridadnan comparti den Reino.

E terremotonan devastador cu recientemente a dal Venezuela tambe ta ocupa un lugar importante den e agenda. Durante su estadia na Aruba, Van der Burg lo bishita Crisis Management Office (CMO), di unda Aruba a coordina gran parti di e asistencia humanitario dirigi na Venezuela. Gobierno di Aruba a traha hunto cu diferente instancia local y internacional pa facilita transporte di ayudo, coordinacion logistico y apoyo durante e emergencia.

Den e contexto ey, Secretario di Estado an der Burg lo reuni tambe cu representantenan di Rode Kruis Aruba. E organisacion aki a hunga un rol importante den e mobilisacion di ayudo humanitario despues di e desaster natural. E encuentro ta ofrece oportunidad pa discuti experiencia adkiri durante e operacion, loke a bay bon y ki lesnan por fortalece preparacion pa situacionnan di emergencia den futuro.

E bishita na Aruba no ta un hecho isola. Den e ultimo lunanan tabatin diferente encuentro entre Van der Burg y lidernan politico di e paisnan Caribense. Na februari, el a sostene un conferencia virtual cu e tres prome minister di Aruba, Corsou y Sint Maarten, unda cooperacion dentro di Reino, respet mutuo y dialogo continuo tabata e tema principal. Mas recientemente, el a participa tambe den e prome reunion formal cu e gobernadornan di Aruba, Corsou y Sint Maarten, unda a discuti desaroyonan actual den e paisnan y e impacto regional di e terremotonan na Venezuela.

Durante su bishita na Boneiro e programa lo enfoca mas riba gobernacion publico, infrastructura y desaroyo regional. Un di e temanan principal lo ta e reciente desaroyonan politico den e Bestuurscollege di Boneiro. Secretario di Estado Van der Burg lo reuni cu e directiva pa discuti e situacion administrativo actual y e progreso di diferente proyecto gubernamental.

Na Boneiro tambe lo trata e progreso di Selibon Lagún y e planificacion pa introduci transporte publico. Banda di esaki, e Secretario di Estado lo bishita Sorobon, unda STINAPA lo informa e riba e desafio cu ta exista pa proteha naturaleza, clima y medio ambiente.

Su bishita na Boneiro ta inclui tambe un bishita na diferente proyecto cu ta forma parti di e Regiodeal. Hulanda ta inverti aproximadamente 30 miyon euro den iniciativanan orienta riba infrastructura, logistica, sostenibilidad y bienestar economico di Boneiro. Van der Burg lo haya un panorama di con e inversionnan ta ser implementa den practica.

Otro punto importante ta un bishita na WEB Boneiro. Aki Secretario di Estado Van der Burg lo haya mas informacion tocante e reto cu e isla ta enfrenta den produccion di awa limpi y coriente, dos servicio esencial pa desaroyo economico y calidad di bida.

Na Corsou, e programa ta enfoca riba diferente encuentro institucional. Van der Burg lo reuni cu gobernador Lucille George-Wout, prome minister Gilmar Pisas y diferente otro autoridad. Tambe lo bishita Gemeenschappelijk Hof van Justitie pa conoce mas di e trabaonan cu e institucion ta desempeña den e parti Caribense di Reino.

Na Corsou e Secretario di Estado lo bishita tambe Blue NAP Americas, e datacenter cu ta aloha gran parti di e infrastructura digital di gobierno di Corsou. E bishita ta orienta riba digitalisacion, innovacion y resiliencia di sistema gubernamental. Ademas, e lo haya un recorido den e haf di Corsou pa mira di cerca e proyectonan relaciona cu desaroyo di e hafnan y sostenibilidad economico.

E programa completo ta mustra cu Hulanda ta sigui considera cooperacion cu e islanan Caribense como un prioridad. E agenda ta combina encuentro politico cu bishitanan practico na proyectonan economico, educativo, logistico y ambiental. Pa Aruba specificamente, e enfasis ta riba fortalecemento di relacion institucional, innovacion, apoyo na emprendemento, sostenibilidad y preparacion regional pa crisis.

Cu e recorido aki, Secretario di Estado Van der Burg ta sigui su serie di bishita den Caribe despues di su prome recorido oficial anteriormente e aña aki. Segun posicionnan cu el a comparti anteriormente, e meta ta sigui fortalece e contacto directo cu e paisnan y crea mas oportunidad pa cooperacion concreto den beneficio di tur e partnernan di Reino.