Secretario di Estado Hulandes pa Asuntonan Interno y Relacion di Reino, Eddie van Marum ta bay haci un bishita di trabao, di dianan 10 pa 15 di augustus, na Aruba, Sint Maarten y Corsou. Esaki ta bira su prome biahe na e parti Caribense di Reino desde cu el a asumi e cartera di Relacionnan di Reino for di su predecesor.
E bishita di Secretario di Estado Van Marum ta den marco di un prome encuentro cu e islanan y su gobernantenan. Temanan importante durante e bishita di trabao ta seguridad di cuminda, reconstruccion na Sint Maarten, y desaroyo economico.
Despues di pasa e prome dos dia na Sint Maarten, dia 12 di augustus Secretario di Estado Van Marum ta bay yega Aruba, unda e ta bay cuminsa su bishita cu un encuentro cu e trahadornan di e Representante di Hulanda na Oranjestad (VNO). Pa e parti formal di e bishita di trabao na Aruba, e ta bay bishita Gobernador, Su Excelencia Alfonso Boekhoudt.
Despues e ta bay tin un encuentro cu presidente di parlamento, Alfred Marlon Sneek, y e lidernan di e fraccionnan cu tin representacion den parlamento di Aruba.
Diaranson 13 di augustus e Secretario di Estado ta bay tin combersacion cu minister presidente Mike Eman, vice-prome minister y minister di Relacionnan di Reino, Gerlien Croes, y minister di Finanzas, Geoffrey Wever. Un di e prioridadnan di e Secretario di Estado, segun website di gobierno Hulandes, ta e tema di seguridad di cuminda. Pa esaki, gabinete Hulandes a pone 24 miyon euro disponible a traves di un fondo rotatorio cu ainda mester keda estableci.
Relaciona cu esaki, Secretario di Estado Van Marum ta bay haci un bishita na AGRO Park. E iniciativa aki ta dirigi riba desaroyo agricola sostenible y seguridad di cuminda.
Parti atardi, e Secretario di Estado ta bay bishita diferente localidad riba e isla, entre otro, e tereno unda antes tabata e Refineria, parke nacional Arikok, dump di Parkietenbos, y e planta di procesamento di awa di riool, RWZI.
Fin di e dia aki, e Secretario di Estado ta bula pa Corsou.
