Durante un debate den Tweede Kamer, Secretario di Estado pa Relacionnan den Reino Eddie van Marum a pone enfasis riba e responsabilidad di comparti di Hulanda, Aruba, Corsou, y Sint Maarten. El a delinea un vision di un Reino cu por bira mas fuerte door di cooperacion, comprension mutuo, y fortalece resiliencia administrativo y economico.
E Secretario di Estado a reflexiona riba su bishita di trabao recien na e tres paisnan. Durante e biahe ey, el a haya un bista amplio di e desaroyonan social y e retonan cu e islanan ta confronta. Na Sint Maarten, el a ser confronta cu e consecuencianan di e horcannan cu a azota e isla den pasado. El a bishita proyectonan di reconstruccion y a papia cu residentenan tocante e progreso di esfuersonan di recuperacion. A sali na cla cu hopi famia a reconstrui nan cas, pero cu falta hopi trabou pa haci den e barionan mas afecta.
Na Aruba, el a bishita e agropark, unda empresarionan ta envolvi den proyectonan agricola inovativo enfoca riba produccion di cuminda local y sostenibilidad. Na Corsou, el a mira iniciativanan similar, entre otro e ecofarm Hofi Cas Cora, unda empresarionan hoben ta cultiva cuminda local pa e industria di hospitalidad.
El a conclui cu e islanan cada un ta construyendo nan futuro na nan manera. Na mesun momento a señala cu e capacidad administrativo riba e islanan ta limita, mientras cu e agenda di politica ta extenso. Sinembargo, el a mira un compromiso fuerte di administrador y funcionarionan publico pa haci progreso, a pesar di recursonan escaso.
Segun e Secretario di Estado, ta esencial pa e cuater paisnan dentro di Reino sigui sostene otro. El a indica cu cooperacion no ta solamente un asunto di acuerdonan administrativo, pero tambe di envolvimento y comprension mutuo. E paisnan ta comparti un historia largo y ta liga den nan buskeda di prosperidad, stabilidad y husticia.
Secretario di Estado Van Marum a enfatisa cu cooperacion tin nificacion solamente si e ta reciproco. E ta encera fortalece otro, comparti conocemento, y conhuntamente busca solucionnan pa retonan comun. El a remarca cu e acercamento aki mester conduci na mas stabilidad y oportunidadnan economico, y tambe un sociedad cu ta funciona miho den cada un di e paisnan.
Un elemento clave di su argumento tabata e enfasis riba finanzas publico sano como e fundeshi pa desaroyo sostenibel. Sin un presupuesto solido, el a argumenta, ta imposibel pa inverti structuralmente den educacion, infrastructura of seguridad.
Den e cuadro aki e Secretario di Estado a referi na e Ley di Reino di Consenso HOFA. E ley aki ta establece un cuadro cla pa un politica financiero responsabel y ta ofrece salvaguardia pa evita cu problemanan financiero ta ripiti. Pa Aruba, e proceso aki ta nifica mas espacio pa inverti den sociedad, mientras cu simultaneamente ta exigi disciplina den gastonan di gobierno.
E Secretario di Estado ta considera e HOFA un acercamento balansa, combinando regulacionnan financiero estricto cu e buskeda di un politica dirigi na futuro. Leynan similar ta existi na Hulanda pa garantisa finanzas publico sano.
Tambe el a atende e acercamento conhunto pa cu criminalidad transfronteriso, un problema cu cada bes paisnan den Caribe ta confronta. Debi na nan localidad geografico, e islanan ta situa riba rutanan grandi di contrabanda, mientras cu e capacidad di polis y hudicial ta limita.
P’esey Hulanda ta colabora cu e paisnan aki pa medio di diferente instancia, entre otro polis, Recherche Samenwerkingsteam (RST), Ministerio Publico (OM), y Corte di Husticia. E colaboracion aki ta destina pa garantisa esfuersonan mas efectivo y coordina pa combati criminalidad.
Tambe e Secretario di Estado a subraya e desaroyonan geopolitico den e region di Caribe, incluyendo e despliegue intensiva di Merca den operacionnan contra droga den awanan internacional. Aunke cu Reino no ta directamente envolvi, Hulanda ta vigila e situacion di cerca. Acuerdonan structural ta existi entre autoridadnan local y e Ministerionan di Asuntonan Exterior y Defensa pa garantisa comunicacion rapido y efectivo cu residente y bishitantenan den e region.
Un otro tema cu a surgi durante su bishita na e islanan tabata e vulnerabilidad di e suministro di cuminda. E islanan ta depende pa gran parti di importacion, loke ta haci nan vulnerabel pa aumento di prijs y problemanan di suministro.
Pa reduci e dependencia aki, Secretario di Estado Van Marum a indica cu lo kier lanta un fondo cu lo duna empresarionan local miho acceso na financiamento. E meta ta pa stimula produccion di cuminda local y aumenta resiliencia di e economianan insular. Ademas di sosten financiero, lo haci inversionnan tambe den compartimento di conocemento, mentor, y training pa empresarionan.
Segun e Secretario di Estado, esaki no ta solamente un medida economico pero tambe un componente di politica social y strategico. E desaroyonan recien na Venezuela, el a bisa, ta ilustra e importancia di seguridad di cuminda y autosuficiencia pa stabilidad regional.
E implementacion di e Landspakketnan, cu a keda desaroya despues di e crisis di coronavirus, tambe a haya atencion. E programanan di reforma aki ta destina pa contribui na miho gobernacion, maneho financiero mas eficiente, y oportunidadnan mas grandi pa empresario.
Secretario di Estado Van Marum a señala cu a haci progreso den e ultimo añanan, incluyendo den e area di servicio pa ciudadano y negoshinan. Sinembargo, el a reconoce cu implementacion no ta sin obstaculo. Como cu e acuerdonan actual ta caduca na 2027, e ta kere cu ta importante pa e paisnan priorisa pa asina e proyectonan por ser completa den e plaso di tempo acorda.
Mientras cu e tabata contesta pregunta, e Secretario di Estado a elabora riba e proteccion di e estado di derecho y e combatimento di corupcion. El a enfatisa cu habitantenan den tur parti di Reino mester por conta cu un gobierno confiabel cu ta garantisa integridad y husticia.
Resientemente tambe na nomber di su colega di Husticia y Seguridad, e Secretario di Estado a manda un carta pa e Tweede Kamer tocante fortalece e acercamento pa corupcion. Un total di €24 miyon lo ser poni disponibel pa partnernan local durante e proximo tres aña. E fondonan aki lo ser usa pa haci investigacion criminal riba criminalidad y fraude financiero y economico, incluyendo casonan cu ta envolve funcionarionan di gobierno of empleadonan di empresanan estatal.
Ademas, esfuersonan lo ser haci pa mehora monitoreo, transparencia y fortalece mecanismonan di supervision. E Secretario di Estado ta spera un relato mas amplio riba e progreso di e medidanan aki prome cu fin di aña.
Secretario di Estado Van Marum a enfatisa e importancia di organonan di integridad local riba e islanan. Sint Maarten y Aruba ya caba tin instancianan dedica na investigacion, conseho, y conscientisacion pa loke ta trata temanan di integridad. E institutonan aki ta contribui na prevencion di corupcion door di conseha gobiernonan riba legislacion y regulacionnan y door di conduci campañanan di conscientisacion.
Corsou ainda ta den e fase di preparacion pa un organisacion similar. E isla actualmente ta haciendo un scan di integridad cu lo sirbi como un midimento di base. Meta ta pa establece su propio oficina di integridad na 2026. Hulanda lo sostene Corsou den e setup y transferencia di conocemento pa e proceso aki.
Den cuadro di seguridad tambe a papia tocante futuro di Kustwacht di Caribe. E Secretario di Estado a enfatisa e importancia di bon facilidadnan pa e servicio, cu ta cay bou di responsabilidad di Ministerio di Defensa.
Ademas di su tareanan militar, Wardacosta ta hunga un rol vital tambe den operacionnan di rescate y emergencia civil. El a enfatisa cu presencia di marinero y personal di Wardacosta ta contribui no solamente na seguridad pero tambe na cohesion social riba e islanan.
Den su palabranan di clausura e Secretario di Estado a mustra cu Aruba, Corsou, y Sint Maarten ta paisnan autonomo dentro di Reino. Esaki ta nifica cu nan tin nan propio responsabilidad y dominionan di politica. Cooperacion cu Hulanda ta enfoca riba areanan caminda interesnan comparti ta den wega, manera maneho financiero, seguridad, estado di derecho, y sostenibilidad.
Segun e Secretario di Estado Van Marum, e futuro di Reino por ta exitoso solamente si e paisnan sigui acerca otro cu confiansa. El a enfatisa cu e forsa di Reino ta sinta den su disponibilidad pa sostene otro sin perde for di bista su propio autonomia.
El a conclui su remarkenan cu e ideologia cu door di cooperacion atraves di frontera y oceanonan, Reino por crece den un totalidad mas consistente y resiliente. Su enfasis tabata riba asociacion, respet mutuo, y ofrece perspectiva na e residentenan di tur cuater pais.
