Cu e caida di Gabinete Schoof y salida di e mandatarionan di PVV, Secretario di Estado Zsolt Szabó, responsabel pa Digitalisacion y Relacionnan den Reino, tambe a confirma su salida. Den un declaracion el a expresa su tristesa pa no por continua cu e trabou, pero alabes a remarca e logronan cu el a realisa durante e casi un aña cu e tabatin como Secretario di Estado.
Segun e portal Aruba.nu a reporta, durante un reunion di gabinete cu caracter di urgencia cu a cuminsa pa 1:30 PM den Catshuis, e caida di Gabinete Schoof a ser trata formalmente. Szabó a comenta tocante su salida den un declaracion expresando: “Lamentablemente, mi rol como Secretario di Estado pa Digitalisacion y Relacionnan di Reino a yega na su fin. Lo mi tabata kier pa a caba e trabou aki.”
A pesar di su tristesa door di no por a termina cu su trabou, e ta satisfecho cu loke si e por a logra den e poco tempo cu e tabatin den su funcion. “Den Relacionnan di Reino, mi a enfoca riba bon gobernacion, finanzas solido di gobierno y autoconfiansa. Mi enfoke semper tabata enfoca riba un miho futuro pa e habitantenan di e parti Caribense di nos Reino.”
Segun Szabó, el a logra resultadonan concreto. A institui un fondo di seguridad di cuminda na beneficio di empresarionan riba e islanan, y tur residente di Boneiro, Sint Eustatius y Saba lo ricibi un number di servicio di ciudadano. “Mi a compromete mi mes cu mi mision cu hopi conviccion,” Szabó a bisa. “Danki na tur hende cu tabata dispuesto pa tuma pasonan hunto – pa un gobierno digital y un Reino mas fuerte.”
Despues cu lider di PVV, Geert Wilders a anuncia e renuncia oficial di su partido den coalicion y confirmacion di prome minister, awor demisionario, Dick Schoof cu su gabinete a cay, a haci un areglo di reemplaso temporal pa e carteranan di e ministernan saliente di PVV, incluyendo esun di Szabó. Un decision riba e implementacion structural lo ser tuma despues. Por ehempel, e gabinete por scoge pa nombra ministernan adicional.
Szabó, miembro di VVD te cu 2024, a uni e fraccion di PVV, cu formalmente no tin miembro, ora el a sinta. E tabata conoci como un minister cu mente tecnico, cu enfoke riba infrastructura digital y cooperacion intergubernamental dentro di Reino.
