SEPPA a trece su banda di medaya riba gerencia di Fundacion Parke Nacional Aruba (FPNA) su peticion pa pidi cooperacion di nan empleadonan pa e situacion financiero cu e fundacion aki ta pasando aden.

Secretario general di SEPPA, Magaly Brito a declara cu diahuebs ultimo e sindicato aki a ricibi un carta di parti di gerencia di FPNA, caminda nan ta referi un poco riba e ultimo reunion cu nan tabatin riba nan proposicion di entrega di 40% riba cortamento temporario di salario. Segun e sindicalista esaki ta nifica 40% di salario cu e trahadonan di FPNA ta bay atras.

Brito a bisa cu e mesun dia ey tabatin un discusion ariba entrega di 50% di vakantie uitkeuring y 50% di e prima nan. E 5% ta e unico cu gerencia di FPNA no a pidi pa e trahadonan entrega. E ta haya cu si nan no ta pidi 50%, sino cu nan ta pidi 40% for di nan salario, manera ta poni den e carta, e sindicalista ta considera esaki como un slaag grandi pa e trahadonan.

For di e momento ey, SEPPA a pidi gerencia di FPNA pa nan mes informa e trahadonan di nan situacion financiero. Ya cu e sindicato aki tin un indicacion caba cu e trahadonan di parke dificilmente por acepta un proposicion asina. “E trahadonan en berdad a indica na SEPPA cu nan no ta di acuerdo,” Brito a bisa.

Despues cu nan a haya e carta di FPNA, SEPPA a reuni cu e trahadonan, caminda e propuesta di gerencia di parke un biaha mas a wordo rechasa. Pa awe FPNSA ta desea di haya un contesta di parti di SEPPA riba nan proposicion.

Segun e sindicalista, esaki no ta nifica cu nan mester bisa kico ta e pensamento di e trahadonan. Pero si, el a indica cu e trahadonan ta habri, semper y cuando cu nan por negosha algo caminda ambos partido por sali bon for di e situacion aki. Sinembargo e hecho cu nan kier reduci 40% di nan salario como excuus cu nan por haya subsidio di salario, Brito a laga sa cu e trahadonan no ta bay acepta esaki.

Consulta cu gobierno

Brito a añadi cu na luna di december, gerencia di FPNA a manda un carta pa e trahadonan, caminda nan a informa cu nan a pidi pa e subsidio di salario. E sindicato a reclama pa esaki, y nan a tene un reunion, unda a wordo splica cu e trahadonan no ta bay atras den nan condicion di trabao, segun Brito. Sinembargo e ta mira cu awe ta resulta diferente.

E sindicalista ta haya cu e forma con gerencia di parke kier atende cu asunto di e trahadonan ta locual nan miembronan ta reclamando. “Nan no ta hay’e esun di mas miho. Esun di mas etico,” el a bisa.

Te hasta tin expresion bao e trahadonan -segun e sindicalista- cu a bin dilanti durante nan reunion di diahuebs ultimo cu tin hopi desconfiansa den e gerencia. Pero te hasta di esnan cu ta dirigiendo na e momento aki di parti di e hunta directiva.

El a referi cu e mal contento cerca e trahado di parke ta hopi grandi. E trahadonan di parke a pidi SEPPA pa informa gobierno riba e situacion cu a surgi pa wak si gobierno por haci algo pa trece cambio. Brito ta kere cu algo cu ta sali for di esaki ta cu si den pasado e trahadonan a bay den accion y protesta pa bin cambio, “awe dia nan ta arepenti di esnan cu a tuma e maneho over.”

Encuanto FPNA su situacion financiero y tambe nan maneho interno, e sindicalista tabata masha prudente den su declaracion. E ta haya cu den cierto momento parke a tuma un decision pa no permiti entrada di UTV/ATV, caminda nan tin nan argumentonan den cuadro di proteccion di nos medio ambiente, fauna y flora.

E tabata un ponencia cu hasta a wordo bringa den corte y na final gerencia di FPNA a haya rason. Pero di otro manda nan ta mira cu como un organisacion cu a tuma un decision caminda gran parti di nan entrada a bay perdi, e ta haya logico cu nan mester a busca otro alternativa pa loke a bay perdi por a bin bek den caha.

“Esaki ta locual no a percura pe. Cu tur e consecuencia cu awendia ta e trahadonan cu ta sufri e consecuencianan akinan,” el a bisa. Segun Brito tin proposicion asina leu riba mesa pa un entrega di por lo menos un 40% di nan salario, adicional na e otro partinan cu gobierno tambe ta pidiendo di e trahadonan.