Segun CAft: Inversion y gasto di personal ta keda areanan di preocupacion

Recientemente, Colegio di Supervision Financiero di Aruba (CAft) a emiti su conseho riba e di dos concepto di amienda di presupuesto y najaarsnota pa 2025 (OBW 2025), cu ta presenta un surplus di financiamento di Afl. 228 miyon, of 3.1% di e producto interno bruto (GDP). Esaki ta den liña cu e normanan di Ordenansa Nacional di supervision financiero temporal di Aruba (LAft).

No obstante, CAft ta keda vigilante y ta enfatisa cu reformanan structural, disciplina presupuestario estricto, y acuerdonan cla di inversion ta esencial pa fortifica Aruba su posicion financiero sosteniblemente.

Segun CAft, Aruba a mehora su posicion presupuestario significantemente den 2025. Di e surplus di Afl. 228 miyon, Afl. 114 miyon ta bin di e pais mes y Afl. 114 miyon di otro entidadnan dentro di sector colectivo, manera Algemene Ziektekostenverzekering (AZV) y Sociale Verzekeringsbank (SVb).

Tambe e presupuesto ta mustra un golpi di suerte di Afl. 49 miyon, gran parti for di entrada di belasting mas halto danki na crecemento economico. Mayoria di e entrada aki (Afl. 40 miyon) lo ser usa pa pago adicional di debe, mientras cu Afl. 9 miyon lo ta destina pa e fondo di inversion nobo.

Den su conseho, CAft a elogia e decision aki, ya cu e ta contribui na un reduccion mas aleu den e relacion di debe di sector publico, cu ta anticipa di baha na 67% di GDP pa fin di 2025—cu un bahada despues pa 49% na 2029.

A pesar di e saldo positivo, CAft tin varios reserva tocante e presupuesto. E autoridad di supervision ta enfatisa cu e OBW ta rekeri mas aclaracion riba varios punto, entre otro e status y gobernacion di e fondo di inversion, cu ainda mester ser estableci; e agenda di inversion di varios aña y con e ta cuadra cu e prioridadnan di politica di Aruba y capacidad di implementacion; e necesidad pa un prestamo inmediato di Afl. 7 miyon na Fuel Marketing & Supply Aruba N.V. (FMSA), y con gobierno tin pensa di mitiga riesgonan financiero structural na entidadnan gubernamental; e desaroyo di gastonan di personal, cu ta sigui subi; y e composicion di e sector colectivo, cu ainda no a keda finalisa.

CAft a pidi Minister di Finanzas, Asunto Economico y Sector Primario pa clarifica e puntonan aki prome cu entrega e OBW na Parlamento.

Segun e Colegio, esaki no solamente lo mehora transparencia pero tambe lo fortalece e autoridad presupuestario di Parlamento—un elemento clave di supervision financiero democratico.

Un di e recomendacionnan clave di CAft ta regarda uso di surplus di AZV y SVb pa paga debe di gobierno back, di acuerdo cu LAft. Door di usa e recursonan aki, Aruba por a evita di tuma fiansa nobo den exterior—cu actualmente ta carga interesnan halto di te cu 6.9%. E Colegio ta calcula cu e maneho aki lo por spaar mas o menos Afl. 17 miyon na interes anualmente.

Actualmente Aruba tin planea pa paga back un total di Afl. 534 miyon na debe pa 2025, di cual Afl. 114 miyon lo bin di su propio recursonan y Afl. 255 miyon pa medio di refinanciamento. Conseho di Minister di Reino a aproba caba un prestamo pa exterior nobo pa cubri un parti di esaki.

Sinembargo CAft ta adverti cu dependencia riba financiamento di debe exterior ta laga Aruba vulnerabel pa fluctuacionnan di interes.

Un otro preocupacion ta e tasa abou di realisacion di inversionnan publico. Di e Afl. 79 miyon presupuesta pa proyectonan di inversion na 2025, solamente 13% a ser implementa pa mitar di aña.

CAft ta adverti di un riesgo halto di subgasto y ta urgi un agenda di inversion di varios aña miho alinea cu e capacidad di ehecucion di gobierno.

Ademas lo reserva Afl. 9 miyon den e buelta di presupuesto nobo pa e fondo di inversion ser estableci, pero segun e Colegio ainda falta claridad pa loke ta e structura di maneho di e fondo, gobernacion, y mecanismonan di responsabilisacion.

Un elemento cu a hala atencion den e OBW ta e decision di gobierno pa fia Afl. 7 miyon na Fuel Marketing & Supply Aruba N.V. (FMSA), un subsidiario di Refineria di Aruba (RdA).

Segun e splicacion, e prestamo ta necesario pa garantisa e continuidad di distribucion di petroleo na Aruba. Sinembargo CAft ta bisa cu e presupuesto no ta splica suficiente con problemanan structural na FMSA ta ser atendi y ki garantianan tin pa limita riesgonan financiero pa e pais.

P’esey CAft ta ripiti su recomendacion anterior pa establece un politica di accion y dividendo y pa implementa e Ordenansa Nacional riba Corporate Governance lo mas pronto posibel. Esaki mester conduci na un supervision mas fuerte di companianan propiedad di gobierno y reduci e necesidad pa inyeccionnan di capital ad-hoc.

CAft ta subraya cu e aumento di gastonan di personal ta enfatisa necesidad pa reformanan. E gastonan di personal di Aruba lo subi na Afl. 510 miyon na 2025, un aumento di Afl. 41 miyon (9%) compara cu 2024. E causa principal ta e indexering di salario di ambtenaar.

Aunke e pais ta keda dentro di e plafond di 10% di GDP cu ta aplica for di 2027 en adelante, CAft ta adverti cu control structural di gastonan di personal ta keda crucial pa preveni presion presupuestario den futuro.

Un tema tecnico, pero importante, cu CAft ta atende ta concerni e composicion di e sector colectivo.

Aunke e ratio di debe di e sector aki ta bahando significantemente, ainda no a keda determina definitivamente cual entidadnan exactamente ta pertenece na e sector colectivo. Actualmente hospitalnan, por ehempel, no ta inclui den e definicion aki, mientras cu esaki ta practica comun na otro paisnan manera Corsou y Sint Maarten.

Delineacion exacto ta esencial, segun CAft, “pa obtene un imagen realistico di e posicion di debe real di e pais.” P’esey e Colegio ta urgi Aruba pa determina esaki pronto.

E cifranan agrega na e rapport di conseho ta mustra cu e entradanan total pa 2025 a aumenta te na Afl. 1.887 biyon, riba Afl. 70 miyon mas cu a se presupuesta originalmente.

E crecemento aki ta debi principalmente na entradanan mas halto di impuesto directo y indirecto (Afl. 638 miyon y Afl. 853 miyon, respectivamente), sosteni pa crecemento economico continuo.

E gastonan total, di otro banda, ta aumentando levemente, cu Afl. 18 miyon pa Afl. 1.701 biyon. Gastonan mas halto riba bienes y servicio—parcialmente financia pa medio di proyectonan di UE y e Landspakker—ta ser compensa pa spaarmento otro caminda, manera subsidio mas abou y subgasto riba otro articulonan.

Gastonan di interes lo subi cu Afl. 6 miyon debi na interes mas halto riba prestamo di sosten di likides, pero e aumento aki ta keda dentro di e margennan spera.

Den seno di sector publico e resultadonan di AZV y SVb ta sobresali. AZV ta spera un resultado positivo di Afl. 86 miyon na 2025, cu ta Afl. 19 miyon mas halto cu loke a ser presupuesta anteriormente—principalmente debi na entrada di prima mas halto y aumento di entrada for di impuesto di omzet (BAZV).

Tambe SVb ta keda financieramente stabiel cu un surplus di Afl. 57 miyon, compara cu e presupuesto anterior.

Hunto, e institutonan aki ta contribui significantemente na e surplus total di financiamento di Afl. 228 miyon dentro di sector publico.

CAft ta elogia Gobierno di Aruba pa logra e surplus y usa entrada adicional pa reduccion di debe, pero ta enfatisa cu mester fortalece mas ainda e calidad di maneho y gobernacion financiero di institutonan gubernamental.

“Un definicion corecto di e sector publico ta esencial pa haya un bista realistico di e posicion real di debe. P’esey un determinacion rapido ta importante,” presidente di CAft, Lidewijder Ongering a conclui den su carta.

E conseho di CAft ta indica cu e politica fiscal di Aruba ta drentando awanan mas trankil. E mehoracion di e fluho di entrada, e balansa positivo, y e reduccion di dependencia riba fiansa di emergencia ta señalnan di recuperacion.

Toch, retonan structural ta keda. Gobierno mester controla gastonan di personal cu ta aumenta, zorg pa ehecucion na tempo di inversionnan, y finalmente duna claridad pa loke ta trata e maneho di empresanan estatal y e fondo di inversion.