Mediante un publicacion riba su pagina di Facebook ex prome minister y actual parlamentario Evelyn Wever-Croes a publica e conseho cu Colegio di Supervision Financiero di Aruba (CAft) a manda pa Gabinete AVP-FUTURO tocante e AWSS dos luna pasa.

Den e conseho aki CAft ta splica cu na juni 2024, Aruba a tuma e decision pa tuma accion riba e desafionan den e area di maneho di awa di rioolering door di pasa e planta di purificacion di awa di e riool (RWZI) pa Aruba Wastewater Sustainable Solutions N.V. (AWSS), un entidad nobo estableci. CAft a remarca cu e ta reconoce e necesidad pa un solucion structural, pero na mesun momento ta mira risiconan significativo den e strategia aki. Pa e motibo ey, CAft a recomenda pa considera cuidadosamente e siguiente aspecto den e proceso di decision.

CAft a enfatisa cu aunke maneho y mantencion lo ser realisa pa AWSS, gobierno ta sigui keda responsable pa e infrastructura vital aki. Si surgi problema serio cu e sistema di purificacion, e consecuencianan lo ta grandi pa turismo, e pilar principal di economia di Aruba. E Colegio ta remarca cu autonomia operacional ta trece risiconan financiero inevitabel cu, si nan ta materialisa, lo pone presion adicional riba finanzas publico. CAft a indica cu si AWSS no por cubri su compromisonan, lo ta gobierno mes cu mester tuma accion pa garantisa continuidad di e servicio.

Pa e motibo ey, CAft ta considera cu ta necesario pa contabilisa AWSS den e sector colectivo.

Ademas, e Colegio ta agrega, falta un mecanismo di supervision adecuado cu ta garantisa bon gobernacion, politica financiero solido y un maneho financiero ordena. Esaki, e Colegio ta señala ta crea un riesgo grandi, manera uso no corecto di fondo publico.

E decision pa separa esaki for di sector publico, CAft ta indica, por reduci transparencia y rindimento di cuenta tocante uso di fondo publico. E Colegio ta remarca tambe cu no a cla pa kico a scoge pa pasa RWZI y e sistema di riool na un entidad nobo, enbes di pone WEB (Water- en Energiebedrijf Aruba N.V.) encarga. CAft ta indica cu WEB ya tin e infrastructura, experiencia y personal necesario pa purificacion di awa. Raad van Advies tambe a indica e risiconan aki.

Pa e motibo aki, CAft a recomenda pa garantisa e efectividad y durabilidad di AWSS via e siguiente medidanan: inclui AWSS como un entidad den sector colectivo; duna prioridad na e desaroyo di un politica tocante participacion y dividendo, y implementacion pronto di e Ley Nacional di Corporate Governance; obliga AWSS pa publica e cifra kwartaal y e estado financiero anual na tempo. CAft ta indica cu siguiendo e conseho di Fondo Monetario Internacional, ta recomenda tambe cu tur entidad gubernamental, incluso AWSS, reporta periodicamente datonan financiero esencial na Directie di Financien; y inclui explicitamente e risico y desafionan relaciona cu AWSS den e presupuesto, y raporta riba nan den e rapportnan di ehecucion.

Pa loke ta financiamento, CAft a splica cu e gasto pa e ampliacion di e instalacion actual (solucion temporario) y e construccion di un planta nobo ta ser calcula na AWG 274 miyon pa e periodo di 2025–2031. E Colegio ta remarca cu un motibo importante pa e creacion di AWSS, segun e propuestanan legal, tabata pa tene e inversionnan afo di e presupuesto nacional, pasobra nan tin impacto riba e saldo di financiamento. No obstante, CAft ta enfatisa, cu e espacio den e presupuesto y e posibilidad pa evita efectonan di negociacionnan actualmente pa un Rijkswet, e consideracion ey ta bira menos relevante.

Mas aleu, CAft a agrega, e inversionnan di AWSS ta keda relevante pa e presupuesto, pasobra CAft ta insisti cu AWSS mester conta como parti di e sector colectivo.

Pa 2025, Aruba a presupuesta AWG 95 miyon pa gasto di capital, y tur aña te 2029 cerca di AWG 85 miyon. Gran parti di e fondonan aki ainda no a ser asigna den politica. CAft ta subraya cu Aruba por financia e necesidad di inversion pa RWZI cu fondonan propio.

E Colegio ta splica cu den contexto di e acuerdo entre Aruba y Hulanda tocante un Rijkswet, tambe tin e posibilidad pa hinca prestamo via Hulanda pa inversionnan. Ora e ley aki ta formalisa, Aruba lo por haya un financiamento mas faborabel pa proyectonan di capital manera RWZI, basta cu AWSS ta ser clasifica den e sector colectivo. E metodo aki, segun CAft, por yega na un spaarmento di mas o menos AWG 190 miyon.

CAft ta remarca cu e opcionnan aki mester ser considera seriamente, pasobra financiamento comercial ta hopi mas costoso cu opcionnan publico y por pone carga riba e finanzas gubernamental. E interes halto por pone presion riba e posicion financiero di AWSS y eventualmente trece e entidad bancarota.

Por ultimo CAft ta enfatisa cu pa limita e risiconan pa e finanzas gubernamental, ta esencial pa reforsa e direccion y supervision riba AWSS. Transparencia, bon maneho financiero y gobernacion corporativo firme mester ta e base. E Colegio ta subraya cu e structura di financiamento tambe merece atencion: e gasto halto di prestamo comercial ta haci alternativo publico mas atractivo. Uso di espacio presupuestario of financiamento via Hulanda por trece spaarmento y fortalece sostenibilidad financiero. Den e contexto aki, inclusion di AWSS den e sector colectivo ta un paso importante.