Economia di Aruba a sigui crece den prome kwartaal di 2025, aunke mas slow cu den añanan pasa. Segun e ultimo rapport Estado di Economia di Banco Central di Aruba (CBA), e isla a crece 4.2% na GDP real compara cu e mesun periodo di 2024.

Un bahada grandi si mira e crecemento fuerte di 9.7% di aña pasa. E desaceleracion ta normal despues di un recuperacion duro despues di pandemia, y tambe ta bini pa motibo di cambionan den turismo, inversion y consumo. Aunke e economia ta sigui subi, e GDP real per capita apenas a subi 3.2%, loke ta mustra cu hende individual no ta sinti e beneficionan mesun fuerte cu e economia mas amplio ta sugeri.

Turismo a keda e motor principal di e economia, pero e resultadonan a mustra un mescla di situacionnan. E cantidad di bishitantenan di estadia a subi 2.5% te na mas cu 392 mil den e prome tres luna di 2025. Pero, e duracion promedio di estadia a baha un biaha mas: di 7.4 anochi na 7.2 anochi. Esaki tabatin un efecto chikito riba e total di anochinan di estadia, cu a baha 0.2%. Mercado di Brazil y Argentina a keda e mas fuerte, cu aumentonan grandi, pero e mercado Mericano—e mas importante pa Aruba—apenas a crece 0.7%.

A pesar di esaki, ingreso di turismo a subi 2.4%. E tarifa di hotel a yega mas halto, cu un aumento di 10.3% den e Tarifa Promedio di Dia. Pa e motibo ey tambe, ingreso pa camber disponibel a subi tambe 7%. Ocupacion di hotel a baha un tiki, di 88.7% pa 86%, den parti pa motibo cu tin mas camber na oferta, un aumento di 12.3%. Tambe tin mas hende cu ta scoge Short Term Vacation Rentals of Airbnb. E sector di short term vacation rentals a crece 8.7%, y awor ta representa mas cu un tercera parti di tur estadia. Hopi bishitantenan tambe ta pasa mas anochinan den e tipo di acomodacion aki cu den hotel.

Turismo di crucero no a yuda na esaki. Aruba a ricibi menos pasahero di crucero: un bahada di 9.1%, te na 335.812 bishitante. Barconan mes tambe a yega cu menos pasahero.

Pa loke ta trata consumo local, e rapport ta indica cu hopi indicadornan a mehora. E cantidad di empleo registra na SVB a subi 3.4%, loke ta yuda casnan pa gasta mas. Consumo di utilidad a mustra un mescla: menos uso di coriente pero mas gas. Pago digital via I-Pago a sigui crece fuerte (15.3%), loke ta mustra cu mas hende ta usa metodo di pago moderno.

Datonan di entrada di impuesto tambe ta sugeri un demanda domestico mas fuerte. Entrada di impuesto di omzet y impuesto riba mercancia tambe a subi, indicando un demanda local mas fuerte.

E tendencianan di credito di consumidor a presenta un otro imagen. Credito nobo extendi na casnan a baha, y banconan a informa un reduccion notabel den e stock di fiansa di consumidor, impulsa principalmente pa un contraccion fuerte di 10.4% den saldonan di credit card. Prestamonan personal tambe a cay, aunke na un grado mas chikito. Fiansa di auto a keda un excepcion y a sigui crece moderadamente.

Interesantemente, e sentimento di consumidor pa loke ta trata compra di auto a mehora drasticamente compara cu aña pasa, segun e Encuesta di Confiansa di Consumidor di Banco Central. E confiansa general di consumidor a keda pesimista, cu un puntuacion 95.0 riba e index, pero e sentimento a mehora un poco for di e nivelnan di 2024

Actividad di inversion a mustra un diferencia fuerte entre sector comercial y residencial. Hypotheeknan comercial a explota: nan balor a subi 253.3% y e cantidad di hypotheek a subi tambe. Esaki ta indica cu tin hopi proyecto grandi nobo, mas tanto den turismo. Hypotheek pa cas, na otro banda, a sigui baha. Permisonan di construccion a subi hopi den balor, sobre todo den e categorianan manera “otro”, cu ta inclui proyectonan grandi manera condominionan. Esaki ta mustra cu infrastructura ta sigui desaroya na un nivel grandi. Empresarionan mes no ta sinti e mesun confiansa: e Indice di Percepcion di Negoshi a baha te na 102.0, principalmente pasobra preocupacion riba tarifanan nobo den Merca.

Inflacion a sigui baha y ta keda na un nivel suave. E promedio di inflacion di e ultimo 12 luna a baha te 1.4% na maart, mas abou cu 1.7% na fin di 2024. Prijs di coriente y cuminda no ta subi tanto mas. Servicio di comunicacion tabata un di e cosnan cu a pusha inflacion un tiki ariba. Pero prijs di vakantie y aparatonan di cas a baha e inflacion. Na fin di e kwartaal, inflacion tabata apenas 0.1%.

Na banda externo, balornan di comercio a subi aunke nan volumennan a baha. Importacion a subi 9.7% den balor y exportacion 10.2%, pero fisicamente a yega menos. Importacion di auto y cement a subi fuerte, y mas container a yega na Aruba. Esaki ta cuadra cu un consumo local fuerte y hopi construccion den progreso.

E balansa di pago ta sigui fuerte. E cuenta coriente a keda positivo cu un surplus di Afl. 508.7 miyon. A pesar di un deficit mas grandi den mercancia, e ganashi for di turismo a keda hopi halto. Reservanan internacional ta den un nivel hopi saludabel, y ta bay te na 8.1 luna di importacion—mucho mas halto cu loke Banco Central ta rekeri.

Finanzas di gobierno a sigui mehora tambe. Den e prome kwartaal, Aruba a logra un surplus fiscal di Afl. 42.6 miyon. Entrada a keda mas o menos pareu, pero gastonan a subi 13.5%, principalmente pa motibo di gastonan di personal, transferencianan y subsidio. E nivel di debe publico compara cu GDP a baha te 67.2%, hopi mas abou cu e nivel di aña pasa. Esaki ta mustra cu Aruba ta sigui paga su debe mientras tanto e economia ta crece.

Banco Central ta señala cu manera cu Aruba ta drenta mas aden den 2025, economia ta keda tabiel pero na un ritmo mas calma. Turismo ta cambia segun preferencianan di bishitante, consumo local ta keda fuerte, y proyectonan grandi ta sigui paga contribucion na crecemento. Inflacion ta abou, y finanzas publico y externo ta na un bon nivel. Segun Banco Central tur esaki ta mustra cu Aruba ta move for di un periodo di recuperacion rapido pa un fase mas balansa y sostenibel.