Dialuna ultimo, Departamento di Estado Mericano a publica su 2025 Trafficking in Persons Report. Den esaki, ta considera Aruba como “Tier 2,” cu ta “paisnan cual nan gobierno no ta cumpli completamente cu tur standard minimo di TVPA (Ley di Proteccion di Victima di Traficacion), pero ta haciendo esfuerso significante pa trece nan mes den cumplimento di e standardnan.
Tocante e rapport, Secretario di Estado Mericano, Marco Rubio a comenta: “Traficacion humano ta un crimen espantoso y devastador cu tambe ta enrikece organisacionnan criminal transnacional y regimennan inmoral, anti-Mericano. E di 25 edicion di e Rapport tocante Traficacion di Persona ta pusha paisnan pa tuma accion serio contra labor forsa y traficacion sexual, y ta sigura cu esnan cu ta faya di actua ta enfrenta consecuencia. Administracion di Trump ta dedica pa sostene balornan Mericano, protege trahadornan Mericano, y defende nos comunidadnan.”
“Gobierno di Aruba no ta cumpli completamente cu e standardnan minimo pa eliminacion di traficacion, pero ta haciendo esfuerso pa logra,” segun e rapport. “Gobierno a demostra en general cu ta aumentando esfuerso compara cu e periodo anterior; pa e motibo aki, Aruba a keda riba Tier 2.”
E esfuersonan aki ta inclui inicia proceso hudicial pa traficacion pa prome biaha desde 2018, identifica mas victima, y emiti permiso temporal di residencia na dos victima. Ademas, gobierno a extende su periodo di reflexion di 14 pa 30 dia, cu a otorga na cuatro victima cu despues a bay di acuerdo pa sostene esfuersonan di ley.
Sinembargo, gobierno no a condena un traficador bao di e statuut anti-traficacion desde 2013. Institucionnan anti-traficacion clave no a coordina efectivamente, strobando e proceso hudicial contra crimen di traficacion.
Expertonan a expresa preocupacion cu oficialnan a confundi trafiacion humano cu contrabanda di migrante. Gobierno no a aproba su propuesta NAP (Plan di Accion Nacional) prome cu fin di e periodo cubri den e rapport.
Departamento di Estado Mericano ta recomenda pa investiga y persigui vigorosamente e crimennan di traficacion, y busca castigo adecua pa traficadornan condena, cu mester involucra sentencia significante di prison. Tambe pa identifica victima proactiamente den tur grupo vulnerable, incluyendo muhe den sex comercial, migrante detenido, trahador domestico y migrante trahando den cosntruccion, supermercado y retail. E rapport tambe ta recomenda pa train oficialnan di ley, fiscal, hues, wardacosta y inspectornan di labor tocante manehonan enfoca riba victima y cu conocemento di trauma pa casonan di traficacion. Tambe pa formalisa y financia e Centro di Coordinacion riba Trafiacion Humano y Contrabanda di Migrante (CMMA) como un institucion permanente.
Entre e otro recomendacionnan tin empodera oficialnan cu no ta di ley pa designa victima di traficacion y duna acceso na servicio; mehora coordinacion y intercambio di informacion entre agentenan di ley (manera polis) y fiscal, y cu contrapartinan den Reino Hulandes; promove conscientisacion tocante traficacion humano, diferente di contrabanda di migrante, entre oficialnan y publico; y establece of identifica opcionnan pa shelter specialisa pa victima di traficacion, incluyendo victima masculino.
Proceso hudicial
Gobierno a aumenta esfuerso di enhuiciamento.
Articulo 2:239 di Codigo Penal ta criminalisa traficacion sexual y laboral, y a prescribi castigo di hasta 12 aña den prison of un multa pa esnan involucrando un victima cu ta mucha. E castigonan aki tabata suficientemente fuerte, y tocante traficacion sexual, ta pas cu esnan prescribi pa otro crimen grave, manera secuestro.
Gobierno a reporta inicia cuatro investigacion “activo” (un pa traficacion sexual y tres pa traficacion laboral) na 2024, compara cu apenas un pa traficacion sexual na 2023; autoridadnan no a reporta ningun investigacion andando inicia den e periodonan anterior.
Oficialnan a reporta enhuciamento di dos supuesto traficante laboral na 2024, cu tabata e prome huicio pa traficacion na Aruba desde 2018; autoridadnan no a reporta ningun proceso hudicial inicia den periodonan anterior. Gobierno no a condena ningun traficador pa di seis aña consecutivo, y no a reporta un condena bao statuute anti-traficacion desde 2013.
Den un caso di 2018, corte a declara dos acusado inocente di cargo di traficacion laboral, pero a condena nan di fraude y contrabanda di migrante.
Gobierno no a reporta investigacion, enhuiciamento of condena di ningun oficial di gobierno complice den crimen di traficacion. Unidad di Traficacion Humano y Contrabanda di Migrante (UMM) di gobierno, un unidad conhunto consistiendo di siete oficial dio ley di KPA (Cuerpo Policial di Aruba) y Marechaussee di Hulanda, a dirigi investigacionnan di traficacion den coordinacion cercano cu Ministeiro Publico (OM). Un comite directivo componi pa polis y fiscal senior a evalua e viabilidad di investigacionnan potencial, incluyendo investigacion preliminar, cu por a referi na UMM pa investigacion “activo.” Sinembargo, UMM por a investiva algun caso di traficacion sin verwijs, manera esnan involucrando un victima conoci of relaciona na un investigacion andando tocante otro crimen; de lo contrario, procedura tabata rekeri pa UMM warda un verwijs di e comite directivo pa usa medionan activo pa investiga un potencial crimen di traficacion.
Otro unidad di interdisciplinario di polis (JIUMM), consistiendo di tres agente, a haci investigacion pasivo, preliminar, y a presenta nan na e comite directivo. Gobierno no a reporta cuanto investigacion preliminar JIUMM a referi na e comite directivo na 2024, compara cu no referi ningun na 2023.
Tur cuatro investigacion inicia na 2024 tabata investigacionnan directo lidera pa UMM; e comite directivo no a referi ningun investigacion preliminar na UMM. Observadornan a reporta cu hopi oficial ta considera ehuiciamento pa traficacion como laboralmente intensivo, cu por a prehuicia e evaluacion di e comite directivo tocante e viabilidad di investigacion di traficacion. OM tabatin un protocl interno pa enhuiciamento di casonan di traficacion y a designa un di su ocho fiscal pa supervisa casonan di traficacion. Algun observador a sugeri retonan di coordinacion entre JIUMM, UMM, y OM como teniendo un impacto negativo riba esfuersonan pa tene traficadornan responsable.
Gobierno a train agentenan di ley, inspector di labor y oficialnan di control di frontera tocante indicadornan di traficacion humano, identificacion di victima y procedura di referencia. Observadornan, incluyendo GRETA (Grupo di Experto tocante Accion contra Traficacion den Ser Humano), a expresa preocupacion cu algun oficial, incluyendo agentenan di ley, a confundi traficacion humano cu contrabanda di migrante; den gobierno, Aruba a atende traficacion humano y contrabanda di migrante a traves di e mesun institucionnan, posiblemente contribuyendo na fusion di e crimennan.
Hopi oficial tabatin QRC (Carchi di Referencia Rapido), distribui na training tocante traficacion, cu ta inclui in lista di indicador di traficacion y informacion di contacto di CMMA. Autoridadnan Arubano a colabora cu nan contrapartinan den Reino Hulandes, incluyendo riba un solicitud pa entrevista un sospechoso den coordinacion cu agentenan di ley di Corsou.
Den un proximo edicion, Bon Dia Aruba ta bay reporta mas informacion tocante e rapport di Departamento di Estado Mericano, cu ta inclui medidanan di proteccion y prevencion, y e perfil di traficacion na Aruba.
