Siman pasa diamars atardi, Director Ehecutivo di IMF (Fondo Monetario Internacional) a duna un presentacion interesante na Banco Central di Aruba.
Durante e presentacion, señor Hilbers a indica cu e evaluacionnan cu IMF ta haci pa Aruba ta di gran importancia y e resultadonan ta sumamente positivo. Tambe el a subraya riba e areanan unda Aruba por pone mas atencion. Un ta e diversificacion di e economia di Aruba y e otro ta e riesgonan di e cambio climatico. Señor Hilbers a remarca cu e tema financiero di un pais no ta solamente e placa pero e por ta hopi mas cu esey.
Senor Hilbers, riba e mesun dia aki den oranan di mainta, a reuni cu Ministerraad unda el a duna e vision di IMF pa cu e desaroyo di Aruba. Durante e encuentro cu e mandatarionan señor Hilbers a duna palabranan di elogio na Gabinete Wever-Croes y a indica cu Aruba tin un desaroyo positivo y impresionante, specialmente ora tabata trata di ta recuperacion di e pandemia di COVID-19.
Aruba su economia ta bayendo bon, finanzas publico ta wordo maneha basa riba surplus, e debe di Aruba ta bahando, tin stabilidad monetario y financiero, e sistema financiero ta integro y Aruba ta trahando caba pa por mitiga efectonan di cambio climatico. Ta puntonan hopi positivo cu ta wordo mira pa wowo di inversionistanan internacional y tambe pa e turista cu ta scoge pa e stabilidad cu Aruba ta ofrece como destino turistico.
