Aruba ta continua cu desaroyo positivo den su economia y finanzas publico, fortaleciendo asina e perfil financiero di nos pais. Segun e evaluacion mas reciente di FITCH Ratings, Aruba ta keda den un ‘Positive Outlook’, un logro cu ta refleha tanto e maneho responsabel di gobierno como tambe e fundeshi economico fuerte di nos pais.
Minister di Finanzas, Asunto Economico y Sector Primario, mr. Geoffrey Wever, a expresa: “E resultado aki ta confirma cu Aruba ta riba e caminda corecto: nos ta logra surplusnan fiscal, nos debe ta baha y nos economia ta sigui crece. Esaki ta fruto di disciplina fiscal, planificacion y un compromiso firme pa un Aruba sostenibel.”
Turismo ta sigui ta un pilar fundamental
Turismo – columna principal di nos economia – a sigui crece den e prome shete luna di 2025 cu 904.000 bishita, un aumento di 5% comparando cu aña pasa. E crecemento ta mas modera despues di e repunte post-Covid, pero e enfoke awor ta mas riba incrementa entrada for di turistanan y crea experiencia mas profundo y diversificacion.
Debe publico ta baha
Danki na e surplusnan fuerte, debe bruto di gobierno a baha 3.1% den comparacion anual, y ta spera cu e lo sigui baha pa yega rond di Afl. 4.9 biyon (57% di GDP) pa fin di 2025. Cu e surplus registra Gobierno por baha e debe nacional, cual na su turno ta baha e gasto di interes. Reduccion den gasto di interes ta duna Gobierno espacio pa cumpli cu servicionan na publico cu a cay atras.
Marco fiscal institucional den progreso
FITCH RATINGS ta observa e proceso pa adopta e ‘Rijkswet’’ ta den proceso, indicando e ta importante pasobra esaki lo fortalece e marco fiscal di Aruba ta avansa. Actualmente, consulta publico ta tumando luga. Si e ley pasa, Aruba lo haya un structura institucional mas fuerte, cu supervision tanto di Hulanda como di Aruba, y tambe un rebaho adicional den tasa di interes riba e prestamo di pandemia.
Inflacion ta controla y reserva ta fuerte
Aumento di prijs pa consumidor ta keda na un nivel aceptabel: solamente 0.7% den un periodo di 12 luna te juli 2025. Den luna di juli e prijs a mustra un caida marginal di -0.1%. Mientas tanto, Centrale Bank van Aruba ta sigui aplica un tasa di reserva di 12.5% pa proteha stabilidad, cu reserva internacional di mas cu USD 2 biyon den april 2025.
“Como instancia independiente FITCH ta confirma cu tur indicador ta mustra cu Aruba ta riba caminda di stabilidad y speransa. Nos meta ta keda firme: sigui fortalece nos economia, proteha nos finanzas publico y crea un futuro prospero pa tur ciudadano,” minister Wever a indica.
