Despues cu Bon Dia Aruba a publica riba 1 di juni cu WEB mester un permiso pa construi e parke di solar riba tereno di refineria, awor e compania ta bisa lo bay haci un peticion pa e permiso (hindervergunning).
Esaki e compania a declara na Amigoe den un articulo publica diasabra. Mientrastanto na prome instancia WEB a contesta Bon Dia Aruba cu nan lo considera esaki. Segun ‘sectormanager Francis Ras’ e no ta necesario pa pidi un permiso como cu e refineria mes tin un hindervergunning caba. Pero cu despues di consulta cu nan abogadonan, nan a dicidi cu ta miho pa WEB tin su mesun permiso.
Bon Dia Aruba a indica momento di skirbi e articulo siman pasa diahuebs na WEB cu a base di ley (Hinderverordening) mester un permiso pa construi e parke solar. E refineria tin un permiso berdad pero no pa un parke solar, pero pa opera un ‘olieraffinaderij’. Pues e hindervergunning no ta valido pa traha un parke di solar, pasobra ta un cambio di ‘inrichting’. Pa motibo di esey WEB a base di e ley mester pidi un permiso pa un otro inrichting (segun Hinderbesluit). E leynan menciona por haya riba www.gobierno.aw.
Den e matutino Hulandes WEB tambe ta insinua cu Bon Dia Aruba a skirbi algo incorecto, esta unda e parke solar lo bin. Nos a base nos mes riba e mapa manda pa WEB. Y manera menciona e tereno ta contamina. Minister di Asuntonan Economico Richard Arends ta comenta cu e asbest riba e tereno ta ‘opgeruimd’. Pero manera Bon Dia Aruba a skirbi varios biaha, esaki no ta corecto. Nan a dump e asbest den e area cual ta contra e hindervergunning cu e refineria tin, nificando cu e dump ta ilegal.
