Den un reaccion na comentarionan recientemente haci pa Minister Arthurs Dowers tocante e “maneho actual” di cacho y pushi riba caya, Zoey Conijn di Luna Foundation a enfatisa cu sterilisa y pone back riba riba caya (trap-neuter-release TNR) no ta e meta di nan trabou, y mas importante ainda, e fundacion no ta pone bestianan back caya. E declaracion ta yega memey di un debate tocante e manera con Aruba ta keda maneha e situacion di cacho y pushi sin doño.

Conijn a subraya cu tin hopi confusion den comunidad tocante kico TNR ta, ken ta aplica e metodo, y con e ta relaciona cu e Ley di Cacho. “Si ta papia specificamente di TNR , nos sa cu e parti di pone back riba caya no ta cuadra cu articulo 3 lid 1 di e Ley di Cacho, pero pone back riba caya no ta e meta di e fundacion. Nos di Luna no ta pone back riba caya pasobra nos ta deal cu mascota. Nos meta ta pa tur ciudadano cu no ta desea pa nan mascotanan reproduci, pa nan acudi cerca nos pa opera nan mascota. ,” Conijn ta enfatisa.

Aruba tin hopi aña cu ta pidi mas control riba reproduccion di mascota. Conijn ta recorda cu hopi aña pasa a cuminsa un proyecto di sterilisa na Centro Dakota cu Animal Balance. Despues a yega Stimami Sterilisami cu un campaña structural tur aña, y asian tin hopi otro iniciativa di sterilisa, y Luna Foundation tambe ta ofrece sterilisacion gratis pa doñonan cu no por paga.

A pesar di diferente oportunidad, tin hopi cachoy pushi cu no ta ricibi ayudo y ta keda haya yiu, cu despues e doñonan no kier. Na mesun momento el a enfatisa cu no por keda punta dede riba fundacionnan cu si ta haci TNR hustamente pa yuda controla pa e populacion no sigui crece fuera di control, enbes punta dede riba e mesun doñonan iresponsabel. “No tin otro manera pa yama nan – iresponsabel, cu a pesar di tanto iniciativa di sterilisacion, ta opta pa e animal toch haya puppies/kittens pa despues nan bay cada uno nan caminda,” el a señala.

Origen di hopi di e debate ta bini for di un declaracion reciente di Minister Dowers. Den cual e ta referi na “sterilisa y pone back riba caya” como e maneho actual. Pero segun Luna Foundation,

esey ta solamente maneho di algun fundacion pa motibo cu tin falta di maneho.

Conijn a splica cu e fundacionnan ta na altura cu den e Plan Nacional pa ataca e problematica di cacho y pushi riba caya, sterilisa y pone back riba caya no ta proponi como maneho oficial. El a sigui splica cu desde cambio di gobernacion e fundacionnan no tabata sa ken ta e minister encarga cu e problematica aki, pero despues di scucha declaracionnan di minister Dowers e fundacion a pidi un cita cune di biaha.

Un punto sensitivo den debate ta e tema di eutanasia. Conijn a indica cu pa hopi aña, Veterinaire Dienst no a yuda cu e parti aki — prome pa falta di kimico, despues pa falta di autoridad riba departamento. E consecuencia: fundacionnan a sinti presion pa tuma rol cu normalmente mester keda na man di gobierno.

“Nos a bin ta realisa cu en berdad esaki ta toca tarea di gobierno pasobra ultimamente nan ta steun riba e ayudo di fundacion pa pone algun cacho drumi, cual nunca tabata nos meta. Pero ta compronde tambe pa e Centro di Control di Cacho cu no por keda cu cacho agresivo den e luga, mirando cu ni gobierno no tabata busca un solucion pa e cachonan ey mas. Pero pa e parti ey di eutanasia ser poni riba nos fundacion, tampoco ta cuadra cu nos meta, y no por ser mira como maneho,” Conijn a enfatisa.

Pa loke ta trata e tema di posibel reapertura di killcage, Conijn a indica cu esaki ta un punto cu Luna Foundation en particular lo desea di haya mas claridad riba dje for di e minister prome cu duna un reaccion amplio riba e tema, pero si tin algun pregunta importante tocante e tema. “Ken ta bay haci e trabou? Y segun ki criteria lo haci eutanasia? Lo bay piki cacho den bario pa pone nan drumi? Of ta mantene e maneho di antes di Centro di Control di Cacho (segun e beslissingsboom traha door di Plataforma Ley di Cacho)” Conijn ta puntra.

E fundacion ta insisti cu cualkier maneho mester ta transparente y sigui ley y protocol.

Mientras cu debate tocante e problematica di cacho y pushi riba caya ta keda un punto central di atencion den comunidad, Luna Foundation ta ratifica cu e raiz di e problema ta iresponsabilidad di doñonan di mascota. Y pa cambia esaki, Aruba mester dos cos: educacion efectivo y cumplimento di ley.

Educacion

Conijn a indica cu Gobierno anterior a crea material educativo pa scol preparatorio y primario, pero su uso ta boluntario, y poco scol realmente ta implika esaki. Luna ta pidi pa e gobierno actual haci uso di materialnan educativo aki na scolnan obligatorio.

Campaña pa conscientisacion

Conijn a referi tambe na e campaña di KPA den 2023 cu tabata enfoca riba mantene cacho den cura. Pero di otro banda, el a indica, mester bin cu un boet pa esnan cu no ta cumpli cu esaki. “Mester boet hendenan tambe si nan ta actua contra ley. Kisas hendenan mester sinti’e den nan cartera pa nan por cuminsa cambia nan actitud, paso di berdad ta parce cu a pesar di tur e iniciativanan di sterilisa mascota, e cantidad no ta baha,” el a enfatisa.

Cumplimento Ley di Cacho

Conijn a splica cu e Ley di Cacho ta amplio, y por castiga hendenan cu ta maltrata, bandona of no ta cuida bo mascotanan. Pero segun Luna Foundation, autoridadnan no ta aplicando e ley regularmente. “Kisas mester nombra mas agente extraordinario pa haci e parti ey si en caso KPA mes tin man yen cu otro prioridad,” el a remarca.

Apart di loke cu Conijn ya a menciona, el a agrega cu mester haci microchipping di e mascotanan obligatorio. “Mester educa nos hende mas, cuminsa parti boet y mester reactiva e database central cu tanto a ser inverti aden pa cu e Plan Nacional,” el a suraya.

A pesar di preocupacionnan, Luna Foundation ta busca dialogo y ta haya ta importante pa sinta cu minister pa e fundacionnan por scucha su banda y pa e mandatario tambe por scucha nan banda.

Conijn a indica cu hasta sinta cu e cunukeronan, criadonan di bestia, tambe un posibilidad grandi ya cu for di su punto bista, nan meta ta comun: “Nos tambe kier pa doñonan di mascota tene nan cacho den cura,” el a enfatisa.

Na mesun momento el a subraya cu fundacionnan no ta e enemigo di cunukeronan y ta compronde nan punto di bista, pero alabes e ta remarca cu e culpabelnan real den e henter e situacion aki ta doñonan di mascota iresponsabel.

“Nos ta compronde e frustracion si un criador di bestia perde su bestianan si e cacho drenta den nan cura pa ataca nan. Pero no ta e fundacionnan ta culpabel. Ta e doñonan di mascota cu ta iresponsabel y no ta tene nan cacho den cura, of esun cu a bandona su mascota den mondi pasobra e no kier e mas y awo e tin hamber, of esunnan cu ya ta den mondi pero no ta opera y ta reproduci y nan y/of nan yiunan tin hamber y ta mata bestianan di cria,” el a indica.

Luna Foundation ta finalisa cu un mensahe pa henter comunidad: “Hunto nos mester por atende cu e problema di doño di mascota iresponsabel mas eficientemente.

Pa Luna Foundation y Conijn e pasonan cu mester tuma ta cla: si Aruba kier un solucion sostenibel, e combersacion mester bay mas leu cu critica superficial, mester keda riba responsabilidad di doñonan di mascota, y riba cooperacion entre tur e partinan cu ta traha na bienestar di e bestianan y comunidad.