Iran a lansa un misil di alcance medio cu por uza dentro di nan fronteranan, asina autoridadnan Mericano a bisa diabierna pasa. E test ta bay en contra e demandanan di gobierno di Trump pa Iran limita nan programa di arma, mustrando cu e pais ta pushando contra Merca su sancionnan.

E test a yega na un momento unda tin tension halto entre Iran y mundo occidental, principalmente relaciona cu e siguridad di transporte comercial den Gulfo di Persia y e estrecho di Hormuz. Un vocero di Cas Blanco a bisa cu e test ta un ehemplo di Iran ‘rebeldiando’ contra Merca su presion inmenso por medio di sancionnan economico.

“Bo por mira cu nan economia ta bayendo for di control ya pa basta tempo caba. Awo nan ta den un skina y nan ta rebeldiando pasobra nan no ta hayando nan fabor.” Asina vocero Hogan Gidley a bisa, alabes mencionando cu Presidente Donald Trump kier cuminsa combersacionnan cu lidernan Irani.

Iran a responde na e sancionnan cu Merca a eleva cu un serie di movimentonan militar, pues por considera e testmento di e misil Shahab-3 como un señal adicional di banda di Tehran cu nan no lo rindi.

Tension cu Iran a hisa despues cu e pais a firma un acuerdo nuclear den 2015 hunto cu podernan mundial. E acuerdo a suavisa sancionnan, a cambio di Iran su limitacion riba su programa nuclear. Trump a saca Merca di e areglo aña pasa, cual a reinstitui e sancionnan cu Iran tabatin riba su cabes. Iran abiertamente a surpasa e nivelnan di uranio cual a keda estableci den e acuerdo pa asina purba presiona Europa pa suavisa e sancionnan imponi pa Merca.