Ayera, segun e plan nacional di vacunacion, departamento di Salubridad (DVG) a cuminsa prik esnan di 60plus cu a registra debidamente pa e vacuna BNT162b2 contra e COVID-19 of SARS-CoV-2 di Pfizer-BioNTech. E vacunacion pa e grupo specifico aki lo dura alrededor di 4 siman

E intencion di e plan nacional aki cu ta wordo realisa cu ayudo di Hulanda, ta pa henter comunidad por keda vacuna contra e virus aki cu a ocasiona cu 71 morto na Aruba victima di dje. Pero tambe un virus cu a afecta seriamente nos economia nacional y finanzas publico. Mientras cu mundialmente – segun data di Organisacion Mundial di Salud (WHO) – a wordo registra mas cu 109 miyon di caso di Covid-19, confirma pa medio di e test PCR. Di nan mas cu 2.5 miyon a muri te siman pasa.

Consecuencia

Microbiologo. Dr. Wilmer Salazar di DVG a bisa cu e virus aki ta esun cu a ocasiona mas morto ultimo añanan mas cu e malesa di influenza na Aruba of cualkier otro virus of bacteria den un tempo cortico.

“Den un periodo di un aña 71 morto ta demasiado pa nos,” el a bisa.

Aruba tin un poblacion rond di 120 mil persona. Y cada aña aproximadamente 600 persona ta muri di cualkier malesa cu ta afecta nos comunidad. Esaki ta haci cu nos mester tuma na serio e situacion di infeccion pa Covid.

Segun data local, te diadomingo ultimo tabatin 7674 caso confirma y diagnostica di Covid. E ta recomenda tur hende haci uzo di e vacuna como un forma pa preveni e infeccion pa Covid, y tur su consecuencia pa asina por mengua un pandemia cu cada dia ta bira mas problematico pa su control.

Kico ta sosode cu esunnan cu no ta vacuna na Aruba? Pa Dr. Salazar a bisa cu esun cu no kier vacuna boluntariamente ta core un risico. E meta di e vacunacion aki ta uno masivo. Entre mas hende ta vacuna, menos chens e virus tin pa sigui infecta comunidad. Ademas e ta perde su poder como virus di sigui contagia mas hende. Tambe cu tempo e por bira menos agresivo y menos dañino, manera un influenza.

“P’esey ta importante pa alcansa e nivel mas halto di vacunacion,” el a bisa.

Den e caso di Aruba, esaki ta realistico, ya cu nos poblacion ta chikito compara cu otro paisnan manera Merca y Hulanda. Merca ta aplica rond di 2 miyon di dosis pa dia. Na Aruba cu 200 mil dosis ta suficiente pa evita cu e virus lo ataca esnan mas suak por ehempel nos grandi y esunnan cu tin algun condicion di salud, etc…

Si minimo un 70% pa 80% di nos poblacion ta haya e vacuna tin un garantia mas halto cu e virus no lo sigui plama y nos hospital lo ta menos bao presion. Actualmente tin un total di 5 pashent den ICU, mientras cu 15 ta interna den HOH. Tambe e presion riba nos sistema social, economico, familiar, etc… lo baha.

Normalidad

Nos lo por bin na un normalidad bek? Tur esaki ta depende di e comportacion di nos hendenan. Departamento di Salud Publico (DVG) ta monitor e desaroyo di Covid pa medio di e resultado e test di PCR. E meta ta pa acaba cu presencia di e virus. Pero te ainda no tin un deadline.

Si e plan di vacunacion por duna cobertura riba un poblacion local di un 70% pa 80%, e ta aceptabel. Pero tambe mester tene cuenta cu e situacion regional y mundial. 52 pais a cuminsa caba cu nan plan di vacunacion. Nan ta paisnan cu ingreso halto. Mientras cu 92 pais di menos ingreso ainda nan no a ricibi e vacuna. Den nos Caribe ainda tin paisnan cu no ta aparece riba lista pa haya e vacuna.

Si e casonan por sigui baha drasticamente humanidad lo por yega na e normal nobo. A pesar di e vacuna tur hende mester sigui e medidanan di precaucion fundamentalmente tapaboca, distanciamento social y medida di higiena.

Dr. Salazar a bisa cu mester corda cu e “vacuna ta preventivo. E no ta un vacuna curativo”. E vacuna por brinda bo, ya sea e proteccion contra infeccion di e virus di Covid. Si bo ta haya e infeccion, e ta asina leve cu no tin e peliger di por plam’e na otro hende. Y bo sistema immuun lo por reaccion casi substancialmente pa evita cu bo lo para den hospital.

Vacuna y proteccion

E vacuna di Pfizer/BioNTech cu un efectividad di 95% contra prevencion di Covid-19 ta wordo usa actualmente den 61 pais. E ta un di e vacuna cu ta duna mas proteccion compara cu otro.

El a trece como ehempel e pais Israel cu ya caba a vacuna un 49% di nan poblacion cu Pfizer. E resultado di dje nan ta mir’e como un prome paso positivo pa un bida normal. Mientras cu na Latino America y Caribe, Chile ta e pais cu a alcansa e nivel mas halto di vacunacion. Nan experiencia ta cu e cantidad di caso a cuminsa baha keto bay.

El a bisa cu e resultado di e vacuna no ta depende di e tipo di poblacion cu a wordo vacuna. Kiermen nos no por spera otro tipo di resultado compara cu e resultado di otro pais cu a ricibi e mesun tipo di vacuna. Apesar cu individualmente nos tin nos propio caracteristica, y te hasta nos por reacciona diferente cu otro persona. Pero e cifra di efectividad di e vacuna di Pfizer ta entre 91% pa 95%. Kiermen cu ainda ta keda un 5% cu e vacuna no por duna proteccion.

Un persona cu ta haya e vacuna Pfizer cu un bon sistema immuun su reaccion ta mas positivo te hasta un 100% di inmunidad. Tin otro situacion di persona cu nan sistema immuun no ta optimal. Nan ta haya proteccion cu e vacuna aki tambe. Pero eventualmente e nivel no lo ta asina halto.

Dr. Salazar ta haya cu e punto crucial por ehempel di un persona di edad cu nan sistema immuun ta mas abao, tin garantia cu si e ta haya e vacuna contra Covid no lo tin efecto adicional riba dje. Tambe nan ta haya garantia di proteccion pa medio di e vacuna. Den caso cu e persona aki ta infecta cu e virus su efecto lo ta menos complica. Esaki kiermen cu esnan cu ta wordo vacuna cu un condicion di salud cu ta afecta su sistema immuun, por ehempel un persona cu leukemia, cancer, etc… ta recomendabel pa nan haya e vacuna.

Awor cu ta wordo papia di varios variante di e virus aki studionan ta mustra cu e vacuna di Pfizer ta actua como proteccion pa e tipo di variante aki. Pero Pfizer ta e miho vacuna riba mercado?

El a splica cu tanto Pfizer como esun di Moderna y AstraZeneca ta usa e mesun ARNm (mensahero). Pa medio di e vacuna aki e celnan ta capta e ARNm. Nan ta actua como mensahero pa genera e proteina y despues nan ta presente na e sistema inmunologico. Esaki ta trece cune cu e huesped por desaroya un reaccion immuun contra e proteina ‘Spike’ cu ta yuda pa protege contra e infeccion causa door di SARS-CoV-2. Mientras tin otro vacunanan cu ta wordo elabora regularmente a base di e mesun virus, pero cu no ta ocasiona infeccion.

Dr. Salazar a laga sa cu ainda ta mucho prematuro pa bisa cual di e vacunanan contra Covid ta e miho. Tin studionan preliminar, y aworaki durante e vacunacion (unda ta wordo midi e efecto y efectividad), nan ta mustra cu e tres vacuna traha pa medio di e ARNm ta hopi. Tin ocho vacuna contra Covid usa rond di mundo y na final e tempo lo mester demostra cual ta e miho di nan, segun Dr. Salazar.

Ademas tin un cantidad di vacuna mas cu ainda ta den diferente fase prome cu nan ta subi mercado mundial cumpliendo cu tur e rekisitonan riguroso cu elaboracion di un vacuna ta exigi. E ta haya cu entre mas variedad y mas efectivo, nos poblacion mundial lo por logra un proteccion ideal.

LEAVE A REPLY

Please enter your comment!
Please enter your name here