Minister demisionario di Finansa, Asuntonan Economico y Cultura Xiomara Maduro a trece dilanti cu den e parti di recuperacion basa riba lo cual ta turismo ta importante pa destaca cu turistanan ta biniendo mas y nan ta lagando mas placa atras.

Pa esaki, Maduro hunto cu prome minister demisionario Evelyn Wever-Croes ta sinta den grupo hunto cu stakeholders como ATA, AHATA, Departamento Economico, Banco Central y tambe Aruba Airport Authority pa asina hunto nan repasa e indicadornan riba e parti economico.

Den un reunion reciente a sali afo cu Aruba ta recuperando y bayendo den bon direccion, AHATA tambe a comparti cu nan cu loke ta trata ocupacion cu ta mas di 55% compara cu 2019 y esey ta indica cu turistanan ta biniendo y tambe ta kedando den hotelnan, loke ta nifica cu cuponan di trabou ta bini back.

Di esaki, Maduro a menciona cu tres siman pasa SVb a informa nan cu tin mas relacion di trabou, tin mas hende tambe cu a wordo inscribi den registro di SVb y esey ta nifica cu poco poco ta Aruba ta recuperando di e consecuencianan economico cu Covid-19 ta trece cune.

Door di pandemia economia a cay grandemente, un tercer parti di esaki a bay perdi segun loke Maduro a expresa y hunto cune 5.000 cupo di trabou a bay perdi tambe, aworaki esey ta biniendo back y economia tambe ta cuminsa lora back. Tambe, AHATA ta indica cu e grado di ocupacion cada bes ta birando mas.

E datonan cu Banco Central a compila ta indica e optimismo cu nan ta comparti hunto cu otro stakeholders manera ATA y AHATA, nan ta mira cu e turista ta lagando mas placa y den esaki ta demostra cu Aruba caba ta den un 70% di lo cual a wordo ricibi na 2019, el a remarca cu door cu Aruba ta haya turista for di Merca, economia Mericano tambe ta den un recuperacion hopi grandi y hopi lihe.

Door di e vacunacion cu na Aruba a wordo haci na unda e proceso ey a bay hopi lihe, esey ta duna e bentaha compara cu e otro islanan cu tambe ta cerca di Merca y ta duna e empuhe necesario pa economia di e isla aki.

Pa lo cual ta trata Departamento Economico, nan a publica e Economic Outloot y den esey nan por haya un bista for di 2014 bin ariba cu ta mustra con economia a traha y tambe por a mira e caida grandi cu aña 2020 tabatin di 25.2% , aunke Maduro a señala cu na prome instante ora cu pandemia a manifesta su mes nan tabata premira cu lo cay cu 44% y despues el a resulta menos cu 37%, pero debi na yudansa di subsidio di salario, alivio fiscal y cu companianan grandi di Aruba a busca placa di afo pa por yuda nan empresanan pa keda riba pia, door di tur e yudansa aki na final economia a mustra su resiliencia.

Esey a traduci den un caida di 25.2% cu segun Maduro a informa ta un caida grandi pero tambe por wak cu e aña aki door cu tabatin turistanan cu a bin e pais ta sigur, esey ta manifesta su mes den un crecemento di GDP cu 5.1% pa cu e aña aki y 6.2% pa 2022.

Ademas, el a bisa cu Aruba a scoge tambe pa crece na un manera sostenibel y den esey nan a haci trabounan pa crea un plan nacional pa wak con nan ta atende cu e 17 meta di desaroyo sostenibel na unda nan a incorpora esey den presupuesto di pais Aruba.

Tocante presupuesto, Maduro a afirma cu tur documentacion a yega na parlamento siman pasa, di esaki el a aclaria cu nan a manda tambe contestanan riba e preguntanan cu e parlamentarionan a haci, nan ta keda pendiente riba lo cual ta bira Parlamento di Aruba su decision riba esaki.

Segun Maduro a declara ora cu ta falta dies dia pa eleccion, kisas e presupuesto no lo wordo trata den parlamento prome cu e dia ey pero si despues mirando cu esey ta algo cu mester wordo trata na bienestar di Aruba.