Manera ta conoci recientemente Merca a manda algun barco naval pa teritorio di Caribe pa combati narcotrafico. Esaki a crea un tension grandi, specialmente entre Merca y Venezuela cual a trece preocupacion pa islanan Aruba, Boneiro y Corsou. Relaciona cu esaki Minister di Defensa y Asuntonan Exterior Hulandes, Ruben Brekelmans, a contesta algun pregunta cu el a ricibi di parlamentarionan di Tweede Kamer a relaciona cu e situacion aki.
Den su respuestanan e mandatario a splica cu e Gabinete ta na altura di e presencia di barconan naval di Merca den Caribe. El a indica cu esaki ta un despliegue dirigi nacionalmente door di Merca, pues Reino no ta envolvi den e despliegue.
El a sigui splica cu segun medionan Mericano, e barconan naval ta ser desplega pa intensifica operacionnan contra narcotrafico den e area, enfocando riba cartelnan di droga Sur Americano, y lo opera den awanan internacional y espacio aereo. Alabes el a sigura cu e Ministerio di Defensa y e Ministerio di Asuntonan Exterior ta den contacto cu Merca actualmente.
Minister Brekelmans a splica cu Merca ta un di e partnernan mas importante di Reino den operacionnan contra droga. Sinembargo, el a señala, e despliegue anuncia aki ta ser dirigi nacionalmente pa Merca, pues Reino no ta envolvi.
Pa loke ta trata si e despliegue ta afecta e Cooperative Security Location Aruba-Curaçao (antes FOL), e mandatario a indica cu e despliegue ta afecta e Cooperative Security Location si e ta encera despliegue den e espacio aereo riba Corsou.
El a sigui splica cu a haci acuerdonan riba e asunto aki den e Tratado di Cooperacion entre Reino Hulandes y Gobierno di Merca tocante Acceso na y Uso di Facilidadnan na Antias Hulandes y Aruba pa Aplicacion di Droga den Espacio Aereo. E tratado ta autorisa vuelonan for di Aeropuerto di Corsou cu e proposito di vigilancia, monitoreo, y deteccion di cargamento di droga. E consentimento aki, el a agrega, ta conta solamente pa vuelonan sin arma. E status di personal di Merca ta ser goberna pa e Acuerdo entre Reino Hulandes y Merca tocante e Status di Personal di Merca den Caribe.
Tocante activonan facilmente desplegabel den Caribe, minister Brekelmans a splica cu pa tareanan militar y policial, Ministerio di Defensa ta mantene un presencia militar permanente den Caribe. E presencia aki ta consisti di mas cu 1.000 personal di multiple Servicio di Defensa, cu ta consisti di tanto personal militar como civil, cu un enfoke riba operacionnan maritimo.
El a remarca cu e presencia aki, Ministerio di Defensa ta contribui na seguridad riba tera, riba lama, y den aire, y ta cumpli cu su tarea primordial di mantene independencia y defensa di Reino. Ademas, el a agrega, Ministerio di Defensa ta contribui na promove e estado di derecho internacional y sostene autoridadnan civil.
El a splica cu Wardacosta di Caribe ta un organisacion di Reino. Banda di tareanan di servicio, manera buskeda y rescate, Wardacosta ta haci tareanan di investigacion y supervision tambe. Pa cumpli cu su tareanan, Wardacosta tin unidadnan di nabegacion, buelo y mobil desplega rond/riba e islanan. El a indica cu si ta necesario, capacidadnan di defensa por ser desplega for di Hulanda.
E mandatario a sigui splica cu e despliegue di Wardacosta di Caribe ta limita na e area di responsabilidad di Reino y normalmente no tin coordinacion cu partnernan internacional pa esaki. El a indica cu Ministerio di Defensa ta conduci operacionnan contra droga riba laman grandi (awanan internacional) den cooperacion estrecho cu Merca. Cooperacion intensivo ta tuma luga pa esaki bou di coordinacion di e Joint Interagency Task Force Zuid (JIATF-S). El a enfatisa cu actualmente, no tin motibo pa cambia operacionnan regular den e area.
Contestando e pregunta si tin intencion di emiti avisonan di advertencia pa aviacion civil y barco rond di e islanan ABC (Aruba, Boneiro, Corsou) minister Brekelmans a splica cu actualmente no tin motibo pa emiti un advertencia pa espacio aereo di Boneiro, Sint Eustatius, of Saba pa motibo di desaroyonan di seguridad. El a indica cu Aruba y Corsou ta paisnan autonomo dentro di Reino Hulandes y pues tin nan propio competencia y ta keda na Aruba y Corsou pa dicidi si ta emiti un aviso pa nan espacio aereo.
E mandatario a splica cu dia 15 di augustus, Minister di Infrastructura y Maneho di Awa a emiti un advertencia pa nabegacion maritimo comercial Hulandes pa lama teritorial di Venezuela, e zona contiguo, y e Zona Economico Exclusivo (ZEE), como tambe pa e awanan pega cu e region Esequibo di Guyana, reclama pa Venezuela. Esaki el a enfatisa a ser impulsa pa e situacion di seguridad cu tabata empeora riba laman y riba tera, particularmente e intercepcion di varios barco chikito di exterior door di marina/guarda costa di Venezuela, sigui pa detencionnan arbitrario di miembronan di tripulacion y/of imposicion di boetnan pisa.
El a indica cu actualmente no tin motibo pa eleva e advertencia di nabegacion maritimo aki. E aviso di biahe pa Venezuela tambe ta conseha botonan recreativo pa no nabega den lama teritorial di Venezuela, e zona contiguo, y e EEZ, como tambe e awanan noord di e region di Esequibo di Guyana.
Tocante consehonan di biahe pa residente y bishitantenan di e islanan ABC, minister Brekelmans a splica cu e aviso di biahe pa Venezuela a cambia dia 18 di juli 2025, di mayoria cora y parcialmente oraño pa completamente cora, debi na e detencionnan arbitrario di parti di e regimen y e opcionnan hopi limita pa asisti ciudadanonan Hulandes ora nan ser deteni.
El a enfatisa cu na e momentonan aki no tin motibo pa actualisa e plan di crisis den luz di e ultimo desaroyonan.
Contestando e pregunta con gobierno y parlamentonan di Aruba y Corsou ta envolvi den tumamento di decision pa loke ta trata defensa y relacionnan exterior cu ta relaciona cu e situacion, e mandatario a splica cu mantencion di e independencia y defensa di Reino, como tambe e relacionnan exterior, ta ancra den articulo 3 di e Carta pa Asuntonan di Reino. Minister di Defensa y Minister di Relacionnan Exterior semper ta fungi como minister di Reino pa cu e asuntonan aki.
El a sigui splica cu Ministernan Plenipotenciario di Aruba, Corsou y Sint Maarten, como representantenan di Aruba, Corsou, y Sint Maarten respectivamente, ta miembro di Conseho di Minister di Reino y asina ta envolvi den e proceso di tumamento di decision di gobierno di Reino. Banda di esaki, el a agrega, tin contacto bilateral andando entre e autoridadnan na Aruba, Corsou y Sint Maarten y e Ministerionan di Relacionnan Exterior y Defensa di Reino.
El a indica cu e Comandante di Marina Real di Hulanda den Caribe (C-ZMCARIB), como e comandante regional, ta e punto di contacto principal pa presencia di Defensa y actividadnan den region pa autoridadnan local.
