Durante un sesion di pregunta den Parlamento di Aruba, minister di Husticia, Sr. Arthur Dowers (AVP) a comparti informacion tocante e proyecto di bodycam pa Cuerpo Policial di Aruba, indicando cu a pesar cu a cumpra algun bodycam, e proyecto piloto no a cuminsa ainda.

Parlamentario Otmar Oduber (PPA) a puntra si e proyecto piloto di bodycam a conclui caba.

Dowers a aclaria cu e proyecto piloto di bodycam no a cuminsa ainda, y cu ainda ta haciendo investigacion tocante cuanto e proyecto lo costa. “Nos ta bezig cu e investigacionnan ey na e momento aki (…) pero fact ta si cu tin un cantidad di camara cu a wordo cumpra cu fondonan di gobierno,” el a bisa.

Minister Dowers a bisa cu tabatin opcion pa haci sea dashcam of bodycam, y a scoge pa haci un proyecto di bodycam. Pero tin discusion riba e aspecto legal di esaki ainda. Te awo ta compronde cu segun Cuerpo Policial no tin un base legal pa bodycam, pero Dowers a bisa cu “segun nos pensamento, tin un base legal pa hacie pero tin algun cos cu mester regla.”

“E punto di salida ta cu e ley cu mi mes a pasa basta aña pasa den Parlamento akinan ta duna un base pa bo por haci uso di un bodycam. E ley cu ta regla uso di filmacion den areanan publico, y esey ta nifica cu mester avisa comunidad cu polis tin un bodycam y dus cu e por filma bo riba tereno publico.”

Pero el a enfatisa cu Husticia so tin autoridad pa filma den espacio publico. Dowers a splica cu e discusion ta na momento cu e persona bistiendo e bodycam drenta un espacio priva. “E punto di salida mester ta e ora cu ta Ministerio Publico ta e unico cu por vorder e material ey si acaso ta haya ta necesario pa usa e material aki,” el a bisa, agregando cu lo duna mas informacion riba e tema despues di tene discusionnan riba esaki.

Bayendo back na e aspecto legal, Dowers a contesta e pregunta si mester cierto cambio legal. El a bisa cu esey no ta necesario. “Si acaso mester hacie mi tin cu bisa bosonan si cu nos tin retonan hopi grandi pa loke ta trata nos departamento di legislacion, pasobra nos tin masha tiki hende [disponible] cu por haci e cambionan, y tin masha hopi peticion pa haci diferente adaptacionnan.” El a enfatisa si cu “no ta un cambio di ley hopi grandi si mester tuma lugar,” pero cu si mester hacie, y lo “mester pone hende e na nos mesun departamento disponible e ora ey pa por haci e tipo di cambionan.” Sinembargo, e ta considera cu no mester cambionan grandi den ley pa por haci esaki posible.

Minister Dowers a comenta tambe cu e ta haya straño cu a scoge pa implementa bodycam en bes di dashcam, pasobra e ta considera cu dashcam, un camara cu ta bay riba auto di polis, ta hopi mas simpel for di e aspecto legal y lo tabata mas facil pa implementa.

Despues di e contestanan di e minister, parlamentario Oduber a critica e tardansa den e proyecto di bodycam, recordando cu ya a aproba 3 presupuesto pa implementa bodycam pa polis.

“Ultimo mes fraccion di PPA a presenta un mocion den presupuesto pa pone placa pa e cos aki, pero e parlamentarionan di coalicion a vota contra, ya cu segun nan ya esaki ta poni den Plan di Gobierno y awor e minister en cuestion ta indica cu mester di fondo,” Oduber a bisa den un comunicado di prensa.

“Bodycam ta un herment importante pa protege tanto polis como pueblo. Ta keda hunga politica cu e topico aki y comunidad ta esun cu ta bira victima,” el a vocifera. Minister Dowers a confirma cu no tin niun proyecto andando, y cu e sa si, ta cu tin algun camara cu a cumpra, pero nada mas y cu Dashcam ta algo cu, segun minister Dowers, e por implementa mañan mes, pero mester di fondo. Oduber ta haya cu henter e situacion aki di bodycam y dashcam uno masha lamentabel, specialmente mirando con e mundo moderno cu nos ta bibando den dje, unda cu un bodycam ta hasta un proteccion pa e agente policial y ta duna seguridad na nos comunidad. Pues nos ta den overtime cu e asunto di bodycam, el a comenta.