Durante un conferencia di prensa recien, minister di Husticia, Integracion, Energia y Transporte Publico Arthur Dowers a brinda un actualisacion tocante e situacion di parkeo den centro ciudad. El a recorda cu algun luna atras cu Aruparking a intensifica controlnan di parkeo despues cu autoridadnan a constata un situacion di “free for all” den parkeo, cu tabata crea riesgo adicional pa seguridad publico.
Segun minister Dowers a splica, e problema principal tabata cu hopi auto tabata parkeer unda cu nan ta haya ta bon. Esaki, den algun caso, tabata hasta blokia acceso pa polis, brandweer y ambulance por yega na algun sitio den caso di emergencia, loke por pone bida den peliger. Pa motibo ey, gobierno y Aruparking a dicidi di reestablece control y mantene orden publico den e areanan mas bishita.
El a sigui splica cu den e ultimo tres luna mas o menos, desde cu e controlnan a cuminsa, autoridadnan a entrega alrededor di 375 proces verbal na chauffeurnan cu a parkeer incorectamente. Adicionalmente, a takel 150 auto pasobra nan tabata stroba trafico of a parkeer di un manera cu tabata representa un peliger pa seguridad y mobilidad den centro di ciudad.
Minister Dowers a indica cu e controlnan a trece resultadonan positivo. El a señala cu despues cu a cuminsa cu e controlnan Aruparking a registra un aumento den cantidad di hende cu ta paga corectamente pa parkeo den Oranjestad y tambe un aumento den persona cu a abona pa un carchi di Aruparking pa haci uso di e lugarnan di parkeer.
Sinembargo, el a enfatisa cu mirando e cantidad di bishitantenan cu tin actualmente, ta cla cu tin un cierto scarsedad di parkeo den e area. E mandatario a invita esnan cu no por paga pa parkeo pa haci uso di lugarnan di parkeo gratis cu tin disponibel, manera por ehempel e parkeerplaats patras di stacion di Arubus, un alternativa practico cu por yuda reduci congestion den centro.
Ademas, minister Dowers a subraya cu si un persona laga su auto mas cu dos ora den un area unda mester pa parkeo y no a paga, Aruparking tin e autoridad legal pa takel e auto, y e doño lo mester cubri tur e costonan. Esaki ta un regla estableci den ley.
Finalmente, e mandatario a anuncia cu actualmente nan ta trahando riba adaptacionnan den ley di Aruparking, cu e meta di crea un sistema mas facil y eficiente pa cobra boet na esnan cu no cumpli cu e regla di parkeo, sin tin cu yama takelwagen cada biaha.
