Gobierno di Aruba a logra di manera exitoso pa cumpli cu su obligacion legal pa raporta informacion estadistica riba contractnan di gobierno, segun loke ta estableci den Government Procurement Agreement (GPA). E acuerdo riba ‘Government Procurement’ di World Trade Organization (WTO), cu ta conoci como GPA, ta establece un cuadro di derecho y obligacion pa loke ta trata contractnan di gobierno pa tur e miembronan di WTO cu a firma e acuerdo. Aruba, como parti di Reino di Hulanda, mester cumpli cu e acuerdo aki.
Cumplimento cu e acuerdo aki ta un paso importante pa Aruba, pasobra Aruba awor ta cumpli cu e rekisito cu ta stipula den GPA 2012, cu ta pidi cualkier miembro pa colecta y raporta estadistica riba contractnan segun e GPA, articulo XVI:4 unda cada rapport mester cubri un aña y mester wordo someti den dos aña despues di e fin di e periodo di rapport. E rapportnan di Aruba ta cubri e añanan di 2015 te cu 2022.
E recopilacion di dato aki ta un resultado di e proceso encabesa pa Departamento di Asunto Economico, Comercio y Industria (DEZHI) den colaboracion cu Departamento di Finanzas (DF) y di Oficina Central di Estadistica (CBS). E proceso aki a rekeri un gran esfuerso di parti di tur instancia involucra pa colecta e data corectamente y pa elabora e rapportnan necesario pa GPA.
Esaki ta un gran logro pa Aruba, door cu awo Aruba ta cumpli cu e obligacionnan internacional aki y alabes ta logra recupera e atraso desde aña 2015. E ta un paso importante den mehoramento di transparencia y fortalecemento di relacionnan internacional di e isla riba e area di ‘Government Procurement’.
Gobierno di Aruba ta sigui comprometi pa cumpli cu su obligacionnan y cu mehoramento continuo riba acuerdonan internacional. E logro di e rapportnan 2015-2022 ta un prueba di e dedicacion continuo di Aruba pa bon gobernacion. Minister Wever ta gradici DEZHI, DF, CBS y tur instancianan cu a contribui cu e coleccion di e informacion pa cu e logro aki.
