Minister di Finanzas, Geoffrey Wever ta anuncia cu Colegio di Supervision Financiero (CAft) ta sigui positivo riba ehecucion di presupuesto 2025 di Aruba.

Despues cu Gobierno di Aruba riba 13 di november a haci entrega tambe na tempo di e Uitvoeringsrapportage kwartaal 3, conforme articulo 17 inciso 1 di e ley di supervision financiero (LAFT), CAft ta duna conseho riba e resultado te cu september 2025 di e ehecucion di presupuesto 2025.

Segun CAft, cifranan di e Uitvoeringsrapportage kwartaal 3 ta duna un bista positivo. E crecemento di Aruba su economia ta entre otro un di e motibo cu entradanan di belasting ta mas halto cu loke a wordo proyecta. Resultado preliminario pa e sector colectivo cu ta consisti di Pais Aruba, AZV, SVB, ATA, Serlimar, Stichting EPB y Universidad di Aruba ta mustra un surplus di 473 miyon. Esaki ta igual cu 6.0 porciento di e producto interno bruto.

Basa riba e Uitvoeringsrapportage kwartaal 3, CAft ta indica cu Aruba pa 2025 ta riba e rumbo pa cumpli banda di e norma presupuestario, tambe cu e norma presupuestario pa gastonan di personal. Gastonan di gobierno ta keda dentro di e cuadro di presupuesto y entradanan di belasting ta resulta mas miho cu loke ta ser spera pa ricibi.

Banda di esaki, CAft ta indica cu ehecucion di inversionnan ta kedando atras cu ta causa cu no ta usando fondonan disponibel. CAft ta premira extra espacio financiero door di meevallers y gastonan mas abao di inversion. Basa riba esaki CAft ta recomenda pa paga mas debe y asina yuda baha e nivel di debe y e peso di pagonan na interes.

Den e conseho tambe CAft ta pidi Gobierno pa indica cua medidanan lo tuma pa entre otro soluciona cu inversionnan publico ta kedando atras, con lo fortalece e capacidad pa por ehecuta proyectonan, mehoracion den planificacion di proyectonan, y pa traha un Agenda di Inversion basa riba prioridadnan di maneho y cu por wordo ehecuta segun e capacidad di ehecucion existente.

Minister Geoffrey Wever ta indica den un comunicado di prensa cu conseho di CAft riba e Uitvoeringsrapportage kwartaal 3 ta subraya e resultado di e maneho financiero prudente di Gabinete AVP-FUTURO. Gastonan ta keda dentro di e begroting y entradanan di belasting ta resulta mas miho cu loke ta wordo spera pa ricibi. E cifranan preliminario ta demostra banda di control di gastonan tambe e confianza di inversionistanan, comerciantenan y consumidornan. Entradanan extra ricibi na entre otro BBO y invoerrechten ta muestra di un economia cu ta crece.

Ta un realidad cu ehecucion di inversionnan publico ta keda un reto. P’esey Gobierno desde su huramentacion na maart ta trahando riba crea un Fondo di Inversion y un Agenda di Inversion pa garantisa cu structuralmente aloca fondonan publico y inverti den desaroyo di Aruba. E concepto di ley pa crea e Fondo di Inversion ta na Raad van Advies pa conseho y pronto lo wordo entrega na Parlamento. E Agenda di Inversion ta den fase di finalisacion basa riba prioridadnan di maneho di Gobierno di Aruba segun minister Geoffrey Wever.