Segun minister Minister Ruiz-Maduro: Na 2019 pais Aruba ta cera cu deficit di 4 miyon

Diabierna ultimo durante e tratamento y aprobacion di e presupuesto complementario, minister di Finansa y Economia Xiomara Ruiz-Maduro a declara cu enbes cu tin un buraco den presupuesto di 25 miyon di locual a wordo premira -segun e normanan acorda cu Hulanda- awe e ta substancialmente menos.

Pa loke ta deficit di presupuesto di pais Aruba hunto cu e resultado di e sector colectivo, locual ta premira pa cumpli cu e norma di e ley di supervision financiero, ta menos. Den esaki gobierno ta mira cu nan ta yegando na un suma di 4 miyon di deficit, segun e mandatario.

Minister Ruiz-Maduro a laga sa na Bon Dia Aruba cu gobierno ta trahando pa hiba Aruba den un rumbo di stabilidad financiero. “Nos ta cera aña 2019 cu un deficit di 4 miyon. Algun aña pasa debi na mal maneho financiero nos Pais a conta cu deficit di 444 miyon. Ta danki na cambio di maneho di nos Pais, awe nos ta rumbo balanced budget y surplus,” el a bisa.

El a expresa su orguyo pa e logro financiero aki, ya cu esaki ta refleha un disciplina cu nan ta bin implementa for di aña pasa. “Nos a demostra un disciplina financiero grandi,” el a bisa.

Minister Ruiz-Maduro a presenta un panorama den cifranan di e desaroyo financiero di pais Aruba durante e delaster 5 aña. Na 2014 pais Aruba tabatin un deficit cu tabata core den 444 miyon florin. Na 2015 e tabata 168 miyon, y un presupuesto complementario sin cambionan. Na 2016 a bira 103.1 miyon florin y 2017 a bira 24.7 pero cu un presupuesto complementario cu a bira 154.6 miyon. El a bisa cu e aña ey cu nan a drenta gobierno, nan a bin haya un buraco extra di 130 miyon florin. Na 2018 nan a premira 149.9 miyon cu a keda e mesun suma ora cu nan a presenta nan presupuesto complementario. Mientras cu na 2019 nan a presenta un presupuesto cu un deficit di 24.8 miyon, y nan ta cera aña 2019 cu un deficit di 4 miyon.

Durante su presentacion na Parlamento, minister Ruiz-Maduro a bisa cu na november ultimo cu nan a bin parlamento cu e nota di fin di aña. E ta algo cu nan ta bin presenta hustamente pa duna parlamento informacion den mas ocasion riba e situacion financiero di pais Aruba.