(NLTimes) – E Ombudsman Nacional y e Ombudsman di Mucha ta bati alarma tocante e condicionnan di bida di Ucranianonan na Hulanda. Dignidad humano ta na peliger den e facilidadnan di recepcion, nan a skirbi den cartanan pa tur e municipionan Hulandes y Minister di Vivienda demisionario Mona Keijzer. Nan a pidi nan “urgentemente” pa mehora e situacion pa Ucranianonan.
Segun Ombudsman Reinier van Zupthen y Ombudsman di Mucha Margrite Kalverboer, accion inmediato ta necesario. “Sin medidanan inmediato, e recepcion humano di 130 mil Ucraniano na Hulanda lo bini bou di mas presion,” nan a skirbi.
E defensornan di pueblo a ricibi un cantidad creciente di keho tocante e facilidadnan di recepcion y a confirma esaki durante un bishita cu nan a realisa na e sitio. “Residentenan ta luchando debi na estadianan di largo plaso den localidadnan cu no ta adecua pa esaki. No tin suficiente privacidad – specialmente den edificionan di oficina cu a ser converti den centro di recepcion – y e uso comparti di facilidadnan sanitario y di cushina tambe ta cuminsa tin su efecto,” nan ta describi e problemanan.
“E residentenan ta na e limite di loke un persona por maneha,” e defensornan di pueblo a cita un trahador di shelter. Nan a papia cu personal di varios shelter cu a expresa nan preocupacion. “Cu muchanan ta kedando na lugarnan cu no ta adecua pa nan, cu nan no ta sigur tocante nan futuro, y cu nan no ta ricibi suficiente sosten pa salud mental.” Muchanan mes a bisa nan cu e educacion cu nan ta hayando no ta adecua pa nan nivel.
E carta tambe ta cita habitantenan. Por ehempel, un residente mester a muda pa un otro lugar, un situacion cu hopi municipio ta enfrenta pasobra shelternan temporal existente ta cera. “Nos a ser ofrece un lugar alternativo, pero e condicionnan eynan ta considerablemente pio,” e habitante a bisa. “E lugar ta remoto, practicamente sin facilidadnan, y rondona pa mondi. Muda pa un luga asina por tin un impacto psicologico serio riba nos yiu di dos aña, custumbra na un ambiente di bida trankil cu caranan conoci.”
Van Zutphen y Kalverboer recientemente a haya hopi keho riba e tipo di mudamentonan aki. E kehonan aki ta inclui hende cu mester comparti camber cu otronan, algo cu anteriormente nan no mester a haci. Tambe nan a ricibi keho tocante facilidadnan sanitario den estadonan deplorabel y e falta di facilidadnan pa cushina. E Ombudsman y Ombudsman di Mucha a ricibi un total di 110 keho e aña aki.
