Segun Otmar Oduber gobierno mester elimina BBO y introduci BTW pa duna alivio na pueblo

Recientemente durante un conferencia di prensa di partido PPA, lider di partido Otmar Oduber a bolbe trece dilanti e discusion riba eliminacion di e impuesto BBO, insistiendo cu e gobierno di coalicion AVP–Futuro mester elimina e medida aki cu, segun e, ta carga un peso desproporciona riba pueblo di Aruba.

Segun Oduber, e sistema di BBO ta keda “un castigo pa e comunidad” y ta contribui na un costo di bida mas halto cu no ta refleha e situacion real internacional. Oduber a pone enfasis den e pregunta “Ki dia e gobierno lo elimina e BBO?”

Oduber a splica cu BBO ta un sistema cu tin un efecto acumulativo den tur etapanan di produccion y benta. El a sigui splica cu e impuesto por yega te na cuater schakel, cu cada un ta cobra 7% riba un mesun producto of servicio. E resultado di esaki ta cu un articulo cu originalmente ta subi un dollar internacionalmente, na Aruba ta experimenta un aumento di 28% den su prijs.

Segun el a indica, e mecanismo di BBO ta haci cu e fluctuacion di prijs internacional ta amplifica na mercado local. El a remarca cu ora e prijs internacional subi, na Aruba e impacto ta hopi mas grandi pa motibo di e carga acumulativo di BBO.

Segun Oduber, e gobierno actual no por sigui yama BBO “un medida” si na mesun momento e ta legalisa e impuesto aki como un fuente structural di entrada pa e gobierno. El a señala cu den momento cu Aruba tin un surplus di mas cu 500 miyon florin, e no ta logico pa mantene un impuesto cu anteriormente e partidonan di coalicion mes a cataloga como “un medida contra pueblo”.

“Na final di dia cada cen preto di e 500 miyon aki ta di nos como pueblo di Aruba, e ciudadano di Aruba cu ta pagando pa bo tin e 500 miyon ey. Nos kier scucha di gobierno ki dia ta elimina BBO na frontera y ki dia ta cuminsa move di un sistema di BBO pa un sistema di BTW,” el a cuestiona.

Na varios ocasion partido PPA a propone cu mester elimina e BBO pa fase y eventualmente reemplasa esaki cu un sistema di BTW (Belasting Toegevoegde Waarde), un impuesto di balor agrega cu ta mas transparente y husto, segun e lider.

Oduber a bisa cu e idea pa introduci BTW no ta nobo, y cu hopi partido politico y gremio comercial ya a expresa nan apoyo pa un sistema asina. “A scucha partido AVP bisa cu nan ta kere den BTW. A scucha partido MEP bisa cu nan ta kere den BTW. PPA tin hopi cla cu mester bay den direccion di un BTW. Gremionan a bisa cu nan ta dispuesto pa un BTW,” el a remarca.

Na mesun momento el a indica cu e unico oponente firme na introduccion di un sistema di BTW ta minister Geoffrey Wever, cu segun Oduber a menciona parlamentario Wever-Croes a bisa, a blokia e proceso durante gobernacion anterior.

E lider di PPA a trece e tema dilanti pasobra recientemente el a scucha gremio comercial a sali expresa nan punto di bista na un manera fuerte y mustra cu mester stop di culpa comerciantenan pa loke ta trata prijsnan na Aruba y ta mustra riba e hecho cu BBO mester ser elimina.

Oduber tambe a pidi pa un dialogo mas abierto entre gobierno, partido politico y sector priva. El a enfatisa cu pueblo merece un proceso di transicion cu ta inclui consultanan amplio y compromiso di tur banda.

Oduber a pone enfasis cu e discusion riba BBO no ta un tema solamente tecnico, sino un asunto cu ta afecta e bida diario di famianan Arubano. El a recorda cu e aumento di prijs ta refleha den alimentonan, producto di uso diario, y hasta den servicio basico.

“Por papia tur dia di cosnan bunita, por papia tur dia di proyectonan. Tin un gran mayoria cu no por come, no tin placa pa pone cuminda riba mesa y tur producto ta subiendo. e ta un hecho,” el a enfatisa.

Hopi hende ta sinti e presion di aumento di prijsnan, y cu esaki ta keda un reto social cu gobierno mester ataca cu medidanan concreto.

Aunke Oduber a mustra cu e ta di acuerdo cu e posicion di e comerciantenan, el a indica cu e sector priva mes tin su papel den e situacion. Segun e, e gremionan por yega na un posicion mas fuerte pa presiona gobierno pa elimina BBO y apoya un sistema mas husto.

Na mesun momento el a subraya cu e no ta di acuerdo totalmente cu e comerciantenan no por absorbe cierto gasto y haci pregunta na e comerciantenan con nan ta garantisa, ora kita e BBO, cu en berdad nan ta baha prijs tambe. Esey ta un punto cu el a menciona cu e no a scucha e comerciantenan trece dilanti.

Oduber a critica tambe e falta di consenso den gobierno mes, señalando cu si e coalicion AVP–Futuro ta serio riba promesa di alivio pa pueblo, e paso logico lo ta eliminacion di BBO na frontera y eventualmente den su totalidad.

E lider di PPA a pidi gobierno duna claridad concreto puntrando Ki dia BBO lo ser elimina, y ki dia lo cuminsa e transicion pa BTW. Segun e, e tema merece un plan cla cu tin input di tur partido y sector relevante.

Por ultimo, Oduber a enfatisa cu AVP y Futuro mester acepta cu nan ta legalisa BBO como un entrada di pais Aruba y cu e no ta un medida. “Nos no por acepta cu bo ta usa e placa di un medida, caminda bo ta empobrece pueblo, caminda ta pone cu tur producto ta bira mas caro cu loke e prijs mester ta,” el a subraya.

E debate riba BBO ta refleha un dilema mas amplio riba isla: con pa balansa entrada pa gobierno cu bienestar di e consumidor. Aunke e impuesto ta contribui na un posicion fiscal fuerte, cu un surplus halto, e presion social cu ta sali di e nivel halto di costo di bida ta sigui crece.

Expertonan economico den pasado ya a indica cu un sistema di BTW por ofrece mas transparencia y ta elimina e carga acumulativo riba e cadenanan di produccion.

E yamado di Oduber ta bin den un momento caminda e pueblo ta sinti presion di inflacion y e demanda pa alivio economico ta crece. Su mensahe ta cla: gobierno mester move di palabra pa accion y mustra un plan concreto pa elimina BBO y introduci BTW.

Den un pais cu economia ta sigui depende hopi di importacion y consumidor local, e discusion riba impuesto ta bira mas cu un debate tecnico; e ta un tema di husticia social y di confiansa den liderazgo politico.