Parlamentario di MEP, Hendrik Tevreden a elabora tocante e dos marchanan cu tabatin durante weekend cu a caba di pasa, un na fabor di matrimonio di mesun sexo y e otro na fabor di famia tradicional.

Lider di Fraccion di MEP, a concentra den e marcha contra matrimonio di mesun sexo. Manera el a expresa den un comunicado di prensa, e marcha aki tabata un exito y tabata un marcha hopi grandi. El a agrega cu gran parti di pueblo a mustra cu nan ta contra matrimonio di mesun sexo y kier keda na matrimonio tradicional. Nos ta spera cu esaki keda mira como refleho pa locual ta corte di cassacion cual ta cuminsa diabierna awor 10 di november, y cual nos a comprende cu lo sigui cu un veredicto den e prome lunanan di 2024.

E Parlamentario a sigui bisa cu manera Hof mes a bisa, no a scucha comunidad di Aruba papia o expresa riba e tematica, kico nan ta pensa of kico nan kier. “Si bo tuma e marcha como un expresion kico pueblo kier y bay midi e dos marchanan cu tabata tin, e ora bo por tuma bo conclusion cu e marcha di mas grandi tabata e marcha contra matrimonio di mesun sexo. Y eynan tambe por mira cu e marcha ey ta respalda e pensamento di comunidad di pais Aruba cu ta contra di e matrimonio di mesun sexo”, Tevreden a expresa.

E marcha aki a wordo yama den corto tempo, sinembargo, e resultado y e acompañamento di pueblo tabata hopi grandi, el a remarca. E grupo aki a entrega un manifiesto na gobierno hunto cu e mas di 18 mil firma. Aworaki, oficialmente tin registra 16.313 firma pa notario y no a termina cu e conteo total. Esnan cu ainda lo kier firma por acudi na diferente misa o iglesia pa haci esaki. Tambe por digitalmente ariba http://bit.ly/YenaEPetition. E firmanan aki ta wordo controla pa notario pa verifica cu nan ta firmanan legal. E firmanan lo sigui wordo recauda pasobra ta kere cu pais Aruba tin mag di vocifera nan opinion riba e tema aki cu sigur ta impacta comunidad grandemente, Hendrik Tevreden a enfatisa. Den un democracia ambos Partido tin derecho di expresa nan opinion y ambos Partido ta haciendo esaki na un forma hopi respetuoso.

No por descarta cu e cambionan ora cu kier introduci un ley asina aki, lo ta grandi. Tin hopi implicacionnan cu tin di tene cuenta y dialoga riba nan. E ta mas cu un cambio simplistico, pero sin duda e ta implica cambio riba educacion, salubridad y financiero pa menciona algun.

Algo cu a hala atencion caba ta e declaracion di un representante di un di e gruponan cu ta pro LGBTQIA+ cu a bisa cu ya caba nan ta trahando pa amplia e ley pa cambia nomber y sexo den paspoort, indicando cu nan lo bay concentra tambe riba loke ta ideologia di genero. E ta nifica cu si cientificamente, biologicamente, bo ta nace como hende homber, pero bo ta sinti cu bo ta un hende muhe, bo lo por cambia esaki den por paspoort, pensamentonan cu ta hopi leu di loke nos comunidad ta custumbra cune riba e ambito legal.

E lidernan religioso a haya un apoyo grandi di comunidad y e marcha tabata asina exitoso. “Mi ta spera cu nos por sigui resona nos bos riba e tematica aki, den respet, den dialogo cu otro. Pero vociferando nos opinion den un manera firme, e Parlamentario a finalisa bisando.

Fundacion Orguyo

Manera Bon Dia Aruba a publica den nos edicion di ayera, diasabra ultimo, 4 di november 2023, Fundacion Orguyo a organisa un caminata di Diversidad. Orguyo a invita miembronan di e comunidad LGBTQI+ hunto cu famia, amigo, colega y pueblo en general pa participa den e caminata di Diversidad. Un caminata cortico, menos di 1 km, pero cu un impacto positivo grandi, segun a fundacion a indica den un comunicado di prensa.

E fundacion a indica cu desde 2019 a sa di traha pa crea un comunidad inclusivo y diverso. Como parti di esey su directiva dia 10 di november proximo lo ta na Den Haag, Hulanda. Diabierna awo lo personalmente representa e fundacion na e caso den casacion na Hoge Raad.

Manera ya ta conoci, Orguyo a hiba Pais Aruba Corte na 2019, exigiendo pa corte habri matrimonio pa parehanan di mesun sexo. Na 2020, meymey di pandemia, Orguyo a gana e caso. Corte a stipula cu Pais Aruba ta discrimina door di no ofrece parehanan di mesun sexo un alternativa igual manera corte Europeo ta stipula, segun comunicado di e fundacion.

Orguyo a apela e caso aki y na december 2022 a gana su caso, na unda cu Corta a duna Orguyo rason completo. Corte a cumpli cu e demanda di Orguyo, declarando cu matrimonio ta habri pa parehanan di mesun sexo. Esaki lo ta aplicabel dentro di 3 luna despues di e veredicto, si Pais Aruba no dicidi di apela esaki. Esaki a resulta den e caso di casacion, na unda Fundacion Orguyo lo ta defendiendo su argumento y ponencianan na Hoge Raad diabierna binidero.

E dos punto di bista opuesto aki ta keda dividi comunidad, y sigur ta halando hopi atencion na caminda pa e tratamento di e caso den casacion na Hoge Raad, cu ta tuma lugar awe.