Despues cu fraccion MEP y PPA a entrega e carta oficial di keho na Gobernador di Aruba, den su declaracion pafo di oficina di Gobernador, lider di fraccion MEP, Evelyn Wever-Croes a indica cu for di su punto di bista e ta kere cu prome minister Mike Eman (AVP) “no ta contento cu kico a pasa.”
Diabierna mainta Gabinete AVP-FUTURO a entrega e concepto di Rijkswet na Conseho di Minister di Reino, cual a keda aproba, sin cu a informa Parlamento di Aruba prome. Esaki a conduci na entrega di carta di keho oficial di e dos fraccionnan di oposicion.
Den su declaracion parlamentario Wever-Croes a expresa cu di loke el a mira diabierna mainta durante e reunion publico, prome minister Mike Eman no tabata mustra contento cu loke a sucede.
“Mike Eman mi ta bisa bo sigun mi e no ta contento cu kico a pasa. Mike Eman ta campañando nos tur sa esey. E ta campañando drenta cas do hende pidi nan por fabor sosten pasobra e kier baha e gobierno y gana su so laga Futuro un banda. Esey ta su meta bo ta wak e den tur loke e ta haci. Parce mi awe, profundo den su curason e no ta contento cu e cos ‘kinan, e no tabata sa con pa expresa su mes, su cara tabata nervioso,” e ex prome minister a declara.
El a agrega cu un parlamentario di fraccion AVP tambe lo a expresa na nan, MEP, cu e ta contra di loke a sucede. “Un hende manera Mike de Meza cu ta hopi den AVP tambe ta contra, el a bisa nos,” Wever-Croes a bisa.
