Ayera mainta durante un conferencia di prensa lider di fraccion Futuro den Parlamento di Aruba, parlamentario Gino Goeloe a reacciona riba e comentarionan cu lider di fraccion PPA, parlamentario Otmar Oduber, a haci tocante e contenido y proceso di negociacion di Rijkswet entre Aruba y Hulanda.

Parlamentario Goeloe a remarca cu na momento cu ta papia di politica diferente y nobo, nan ta referi na laga sencionalismo afo di politico y tuma e trabou como parlamentario na serio door di informa e pueblo e berdad.

El a señala cu el a tuma nota di e declaracionnan cu parlamentario Oduber a haci, despues di a tene un reunion cu gremionan comercial, tocante e Rijkswet y con no tin texto ni ningun informacion tocante esaki.

Parlamentario Goeloe a splica cu desde gobierno anterior Aruba ta den negociacion pa loke ta e Rijkswet y ta bezig cu loke ta e texto di e esaki, cual tabata den man di un team di Aruba y un team di Hulanda cu tabata prepara e textonan aki. Cu entrada di Gabinete AVP-FUTURO, el a indica, nada no a cambia y e proceso ta continua.

El a sigui splica cu parlamento no tin e textonan pa motibo cu esakinan mester ser evalua y awor e concepto ta na Directie Constitucionele Zaken en Wetgeving na Hulanda, despues cu Aruba y Hulanda a entrega nan input. “Ta logico cu Aruba tin su punto di bista y Hulanda tin su punto di bista y asina ki nos ta yega na otro,” el a remarca.

E parlamentario a informa cu dia 10 di juni prome minister Mike Eman hunto cu vice prome minister Gerlien Croes y minister di Asuntonan Economico y Finanzas Geoffrey Wever lo sinta cu e Secretario di Estado na Hulanda y debati riba e documento aki. Despues di esaki e documento mester pasa ainda pa Tweede Kamer y manera cu e keda cla e ta yega na Parlamento di Aruba.

“Nos como parlamentario ta bay lesa e documento aki y ta wak si berdad locual ta skirbi ta algo cu nos por sostene y esey ta algo cu mester clarificacion,” el a enfatisa. El a splica cu parlamentario Oduber a haci algun insinuacion y a bin cu sencionalismo. El a ratifica cu e tipo di politica ey tin cu termina y parlamento mester cuminsa educa comunidad y papia berdad cu comunidad.

“Mi ta kere cu ta na su luga pa nos di Futuro sigur pone e cos ki stret y mi ta kere cu Sr. Otmar Oduber sa cu den varios ocasion den parlamento e punto aki a ser discuti y e sa masha bon den e caso aki con e ta, con e proceso ta bayendo y pa bin cu tanto sencionalismo aworaki mi ta kere no ta na su luga. Nos tin cu uni pueblo, aworaki ta bin cu yen cos bruha, e cos ki no ta bon pa pueblo, nos tin cu uni pueblo, nos tin cu tene pueblo conhuntamente y p’esey cada bes cu algo asina ki bin pa dilanti nos como Futuro ta para stret y ta drecha e cos aki,” parlamentario Goeloe a subraya.

Relaciona cu e caida di gobierno Hulandes y con esaki lo por tin efecto riba loke ta e negociacionnan pa cu e Rijkswet, el a splica cu ora cu gobierno cay tur caso coriente ta sigui. Den e caso di e Rijkswet, el a sigui splica, e ta algo cu tin añas andando. El a indica cu desde Gabinete Wever-Croes caba e concepto di ley aki tabata den preparacion y awor aki ta continuacion den gobierno, locual kiermen cu na Hulanda den e caso aki e topico aki ta bay sigui riba mesa mirando cu e ta un topico hopi importante cu mester sigui den discusion.

Pa loke ta e declaracionnan di parlamentario Oduber tocante e Rijkswet, dialuna despues di un reunion cu fraccion PPA a tene cu gremionan comercial, e parlamentario a duna un declaracion na prensa presente.

El a splica cu fraccion di PPA a yama e reunion cu e gremionan comercial y haci uso di e oportunidad pa mira si tabatin dialogo entre e gremionan y gobierno pa loke ta trata e Rijkswet y pa nan por haya un indicacion di kico ta e pasonan cu nan ta tumando.

Parlamentario Oduber a sigui splica cu durante e reunion nan a papia tambe hopi riba e profundidad di e significado pa loke ta trata autonomia di pais Aruba y kico ta e consecuencia di un posibel Rijkswet caminda cu cierto momento ta saca podernan for di parlamento.

El a remarca cu pa e gremionan tabata dificil pa kere cu Parlamento di Aruba no sa e contenido di loke ta ser discuti tocante un Rijkswet cu tin un consecuencia asina grandi di miyones di florin pero tambe di decisionnan politico cu tin cu ser tuma.

“Nos mester mustra riba e hecho cu esaki ta practicamente custumber den parlamento. Como fraccion nos tin 124 dia cu a pidi un reunion, cu den 30 dia mester a ser yama, y eynan ta wak e deficit parlamentario cu tin cu ni nos democracia ta ser respeta. Un reunion publico pa splica parlamento kico ta sucediendo,” el a subraya.

Parlamentario Oduber a indica cu ya caba a subi di un porcentahe di 5,4% pa 6,9% di interes cu ta 10 miyon florin extra cu pais Aruba tin cu paga pasobra no tin un decision.

Alabes el a menciona cu tin discusion andando, y segun loke e por a tende cu minister Geoffrey Wever a bisa, pa september kier firma e Rijkswet. Sinembargo, el a subraya, cu Parlamento di Aruba no sa nada di loke ta e contenido y gremionan no sa nada tampoco.

“Hopi duidelijk por mira cu tin un falta di comunicacion total di parti gobierno riba e materia aki. Nos a mustra riba e hecho cu pa gobierno por ta e decision ta facil…pero na final di dia ta kita un di e pilarnan principal di Parlamento di Aruba y p’esey nos ta lamenta cu e reunion publico no a ser yama pasobra otro fraccion no ta papia di nan posicion tocante e Rijkswet,” el a agrega.

Parlamentario Oduber a remarca cu pa su fraccion ta inaceptabel y a indica cu nan tin varios proposicion. Un di e proposicion, el a señala, ta cu den e leynan local di Aruba ta caminda mester regla con e control aki tin cu bay tuma luga y no cu na Hulanda ta bay dicidi con ta sali for di e Rijkswet of ki ora of bou cual condicion por cambia normanan cu ta ser poni den e leynan local, siendo cu tin instrumentnan local pa haci esaki.