Durante un conferencia di prensa recien lider di fraccion AVP parlamentario Jennifer Arends-Reyes a trece dilanti diferente punto di atencion, entre nan e exigencianan di oposicion, e topico di enseñansa y avancenan di gobierno di AVP-FUTURO.

Parlamentario Arends-Reyes a trece dilanti cu recientemente el a tuma nota di cantidad di pregunta cu fraccion di oposicion ta manda pa ministernan, cual el a menciona ta nan prerogativo pa haci esaki, caminda nan ta exigi solucion riba tur tipo di problematica cu tin na e momentonan aki y ta hasta presenta proposicion y solucionnan di nan banda.

“Nos ta wak cu durante e transcurso di tempo nan ta lubida cu ta nan mes a caba di sali como ex minister di e posicionnan aki. Nos ta wak reelsnan caminda cu tin proposicionnan y solucionnan di personahenan cu ta ex minister den e carteranan aki concerni y bo ta wak cu esakinan no a ser concretisa, no a realisa esakinan pa pueblo, pero aworaki den cinco luna di tempo cu AVP-FUTURO tin na mando nos ta wak cu nan ta exigi solucion pa esaki,” el a remarca.

Pa loke ta e topico di enseñansa, parlamentario Arends-Reyes a subraya cu como un persona cu ta bin di e area di enseñansa, e lo desea di wak mas ser den e parti di mantencion grandi tuma luga na e scolnan, entre otro e parto di asfalt caminda cu ta wak pleinnan na cierto scolnan cu mester ser drecha. Esakinan, el a menciona ta puntonan cu fraccion AVP lo atende cune den e proximo presupuestonan.

E parlamentario a trece dilanti tambe e aspecto di digitalisacion, el a remarca cu esaki ta un aspecto importante pa penetra den e scolnan. El a indica cu aunke por mira cu diferente scolnan ya tin nan aparatonan, den e parti aki falta mas.

Arends-Reyes a indica cu un di e puntonan tambe cu fraccion di AVP lo pone hopi enfasis riba dje ta pa wak e proyecto di restructuracion di salario di maestronan ser concretisa. “Nos sa cu den e caso aki minister ta trahando diligentemente riba e punto aki, pasobra e ta un punto sigur di atencion den enseñansa caminda cu e maestronan merece e restructuracion aki pa nan tin un salario mas husto,” el a señala.

Pa loke ta trata avancenan di Gabinete AVP-FUTURO, el a splica cu prome cu vakantie a cuminsa por a tuma nota cu gobierno a anuncia diferente forma di ayudo pa famianan vulnerabel, locual el a sigura a cay den bon tera caminda por mira cu personanan cu echt tin mester di e ayudo ta yega na remarke pa esaki y ta haci bon uso di dje tambe.

E parlamentario a agrega cu ta un hecho cu costo di bida a aumenta na Aruba y ta netamente pa e motibo ey, el a indica, tanto gobierno como parlamento tin cu bin cu ideanan pa wak con por yuda den e parti aki pa pueblo por haya alivionan den diferente area, manera entre otro e parti di poder di compra, cu el a sigura ta un di e puntonan halto den nan agenda.

Parlamentario Arends-Reyes a enfatisa cu loke nan a nota ta cu basicamente tur sector mester di atencion urgente, manera por ehempel den enseñansa, adultonan mayor, sector social, e parti di salubridad, vivienda, barionan den deterioro, den e parti transport, cu segun el a menciona tin hopi keho, e area laboral cu tambe tabatin hopi punto cu mester traha riba dje y sigur e parti di husticia tambe, pa menciona algun sector.

“Tin hopi trabou nos dilanti y tambe mi ta kere tin hopi procesonan cu mester mehoracion tambe. Manera ya caba menciona tin hopi investigacion andando di kico a bay robes y hopi asuntonan cu no a atende cu nan cu a keda pendiente, no a ser concretisa y aworaki mester percura pa tur esakinan haya atencion urgente. Aruba merece un gobierno stabiel y mi ta sigur cu den e parti ki nan ta tuma nan trabou sumamente na serio y tambe ciudadanonan merece biba trankil y cu tambe tin hopi mas prospecto di biba un bida digno riba nos isla,” el a subraya.

Relaciona cu e topico di turismo, y com presidente di comision di turismo di parlamento, Bon Dia Aruba a puntra parlamentario Arends-Reyes kico ta su punto di bista riba e preocupacion di comunidad pa loke ta e sobreturismo cu Aruba ta experenciando na e momentonan aki.

“Mi ta kere cu e ta un sentimento valido caminda cu e comunidad ta trece dilanti e parti di sobreturismo. Nos por a wak tin diferente intentonan den cambio di strategia caminda cu no cantidad, pero calidad di locual ta e atraccion di tipo di turista cu nos lo desea. Aki nos a bay di e parti sostenibel pa e parti caminda nos kier pa e ta regenerativo,” el a indica.

El a splica cu e tipo di turismo cu kier atrae, ta un turismo cu ta consciente cu Aruba como pais tambe ta dedica na e proteha naturalesa y cu ta stima e cultura. El a remarca cu den esaki ta enfoca riba e calidad di loke nan ta brinda y den e cantidad manera tabata antes.

Relacion cu e documento di Aruba Tourism Authority (ATA) a entrega na gobierno cu ta contene mas di 100 diferente accion relaciona cu nan strategia pa turismo, parlamentario Arends-Reyes a indica cu e ta na altura di esaki y cu comision di turismo di parlamento a sinta hunto cu ATA pa locual ta trata nan strategianan.

El a sigui splica cu tin diferente reunion cu nan a tene cu ATA y tambe cu AHATA, y a indica cu e puntonan di accion cu ATA a presenta tin diferente rol, tanto legislativo y leynan cu mester por pasa. El a menciona por ehempel ley di vacation rentals, cual el a indica parlamento ta wardando riba gobierno pa finalisa esaki y pa mand’e parlamento.

“Tin diferente punto di accion pa gobierno na su turno y tambe bo ta bisa e sector hotelero y tambe den horeca. Pero conhunto mi ta kere sigur tin puntonan di accion cu por implementa di biaha y tin algun di nan cu ta eigenlijk merece di e parti cu bo ta studi’e un tiki mas pa wak na e momentonan aki, pasobra situacionnan ta cambia cada rato, pa wak si e ta aplicabel pa Aruba,” el a finalisa.