Ayera mainta durante un conferencia di prensa lider di fraccion di PPA, parlamentario Otmar Oduber a trece dilanti varios topico di preocupacion. Un di e topiconan aki ta e situacion actual di maneho di desperdicio na Aruba y Serlimar.

Parlamentario Oduber a remarca cu e topico aki ta uno di preocupacion grandi pa fraccion di PPA y a enfatisa cu ta un punto hopi importante cu mester para keto riba dje specialmente teniendo na cuenta cu ta trata bida y salud di hende.

Oduber a critica e maneho y decisionnan cu ex minister di Naturalesa, Ursell Arends (Raiz) a tuma pa loke ta trata desperdicio, y tambe e incinerator. El a indica cu como fraccion di PPA e siguiente paso cu e ta bay tuma ta yama un reunion publico riba e topico aki den cual e minister mester bay parlamento y habri carta, dossier y tur documento cu ta existi riba e topico aki. “Loke a tuma luga ta un asesinato na Aruba pasobra hendenan ta perde na bida y salud cu loke a tuma luga,” el a remarca.

El a splica cu minister anterior a bay contra di un incinerator na Aruba a pesar cu DOW a duna conseho e tempo ey pa busca dos incinerator mas pasobra a resulta cu e cantidad di sushi a bira mas grandi.

Parlamentario Oduber a sigui splica cu fraccion di PPA a duna un declaracion anteriormente indicando cu tabatin mas cu cincuenta container di cuarenta pia yen di desperdicio humano, desperdicio biologico, di hospital, entre otro, cual el a indica minister Rene Herde a confirma algun siman atras den parlamento confirmando asina cu loke PPA a trece dilanti no ta simplemente storia.

“Un proyecto di busca incinerator a ser boicotia door di Sr. Arends caminda cu awe AWSS mester a busca no dos pero cuater incinerator mas. Mi ta felicita nan, pero nos ta siete aña laat. Ora Otmar a papia riba incinerator siete aña atras, nos por a evita e desaster cu tin awe. Pero pa capricho, pa bringa, pa duna un show di cera un dump. P’esey mi ta bisa e minister mester ser poni responsabel. Ta yega momento na e pais aki cu ora bo haci algo malo contra e comunidad bo mester paga p’e,” el a enfatisa.

El a expresa cu minister anterior a “boicotia” henter e sistema pa loke ta trata desperdicio di sushi na Aruba, a gaña cera dump, cual segun e parlamentario no a ser cera, y cu el a haci un desaster tambe na Ser’i Teishi caminda cu gas ta sali riba henter e pueblo rond di Parkietenbos y full e bario alrededor. “Bo no a drecha nada,” el a subraya.

Oduber a splica cu segun e por a compronde tin un rapport forensico cu a ser traha na aña 2020 of 2021, y cu cla caba pero niun hende no tin dicho rapport. Segun e parlamentario esaki ta pasobra cu e tempo ey gobierno a indica cu Serlimar tabata bancarota, algo cu el a sigura no tabata berdad y cu a perhudica un cantidad di comerciante y trahado di Serlimar.

 

El a sigui splica cu tin otro companianan cu ta den pio situacion cu Serlimar. El a menciona Post Aruba NV y Arubus NV. El a remarca cu Serlimar por a soluciona su situacion si a coy e ley cu ta na Parlamento pa Serlimar y aproba esaki. “Mi ta bay puntra e minister si e ta contra pa coy e ley back cu ainda ta den di dos ronda, desde seis aña pasa, cla pa vota riba dje caminda cu Serlimar lo por cobra su placa y lo a bira un compania cu ta gana placa. No solamente nan lo bira para riba nan mesun pia, pero nan lo gana placa caminda cu lo a regla for di seis pa siete aña pasa e situacion di desperdicio na Aruba,” el a agrega.

Parlamentario Oduber a subraya cu e situacion di maneho di desperdicio ta hopi serio pasobra e tin efecto riba salud y bida di hende, bida di hende. El a cuestiona con gobierno anterior y minister anterior a boicotia un sistema cu aworaki siete aña despues ta bay back na e mesun proyecto, plan y vision cu su mesun persona tabatin siete aña pasa.

“Keto bay bo kier pretende como si fuera cu Serlimar ta den situacion financiero precario. Si abo como gobierno a permiti nan pa keda sin cobra y abo como gobierno ta esun cu ta subsidia nan y ta bisa pa nan haci gasto pa 25 miyon pero ta manda 20 miyon so pa nan, ta con bo no kier pa e compania ta den cora. E tempo ey e mentalidad di e minister anterior tabata cu kier a duna Serlimar na un compania priva na Aruba. Tabatin un deal bou mesa cla pa ser regla y mester a pinta cu Serlimar ta failliet, pero a demostra cu no ta failliet, pero e por tabata un compania cu ta gana placa awe,” el a señala.

Por ultimo el a remarca cu situacion aki ta afecta salud di pueblo y ta importante pa ser atendi cune. Pa e motibo ey como lider di fraccion di PPA Oduber ta bay yama reunion publico cu e minister pa e minister duna informacion na Parlamento y saca documentonan y busca e rapport forensico cu nan a traha pa investiga e periodo cu su persona tabata encarga cu Serlimar, hunto cu e rapport di Grand Thornton e tempo ey pa hiba e discusion di e ley di Serlimar den Parlamento di Aruba.

Arends: “Otmar su maneho a manda Serlimar den bancarota”

Bon Dia Aruba a tuma contacto cu ex-minister Ursell Arends pa puntra su reaccion y comentario riba e indicacion di parlamentario Oduber cu el a boicotia e maneho di desperdicio na Aruba.

Na esaki ex-minister Arends a comenta cu “no por papia di ‘boycott maneho’. No tabatin maneho. Unico 3 boycott cu tabatin den e sector aki ta 1. E boycott di e planta di Bouldin & Lawson cu a costa Aruba miyones di florin na kapitaalvernietiging. 2. Boycott di un acuerdo cu Eco-Tech pa cual Aruba ainda ta core riesgo di miyones na daño y perhuicio y 3. Boycott na Serlimar, causando cu e companai a termina den surseance van betaling y casi a termina bancarota.”

“Kico tabata su maneho? Un toekenning pa un compania di un incinerator cu ta hole mas stinki cu e desperdicio cu nan ta procesa? Nos mester a rescata e compania, pone Serlimar para back riba su pia, introduci un maneho di desperdicio basa riba e principio nan di reduci, reusa, recicla. Otmar su maneho a manda Serlimar den bancarota,” Arends a remarca.

Pa locual ta AWSS, el a agrega cu Waste 2 Energy no ta un maneho di desperdicio duradero ni responsabel, riba cual tin hopi investigacion ta demostra esey. El a indica cu den su maneho incinerator tin un rol chikito pa carcas y temporario pa desperdicio medico y desperdicio humano