Segun parlamentario Otmar Oduber: Medida cu a tuma pa impedi biahe pa representa Parlamento di Aruba no tin base legal y ta anticonstitucional

Recientemente un delegacion di Parlamento di Aruba a biaha pa Panama pa asina representa Aruba durante e reunionnan di Parlatino.

Parlamentario y lider di fraccion PPA Otmar Oduber tambe tabata presente, pero esaki a causa un disgusto, specialmente pa presidente di Parlamento Marlon Sneek ken a indica cu Oduber no tabata autorisa pa biaha y representa Aruba na e reunion aki. Den un entrevista cu Bon Dia Aruba, Oduber ta splica kico e situacion ta en realidad.

E situacion, segun parlamentario Oduber a splica, ta cu den pasado, na aña 2019, e tempo ey fraccionnan MEP, POR, y RED a tuma un decision pa loke ta trata Sr. Benny Sevinger, ken e tempo ey e tabata sospechoso y su caso no a ser trata ni nada, pa prohibi un persona cu ta bou sospecho pa biaha den representacion di Parlamento di Aruba.

Oduber a indica cu e tempo ey e no tabata na altura cu a tuma e decision ey pasobra si e tabata na altura e lo a vota contra pasobra e ta consider’e totalmente anticonstitucional. “E no tin ningun base legal pa ser tuma y door di esey e tempo ey fraccion di AVP tabata contra, y awor un par di aña despues door cu no ta un miembro di AVP nan ta na fabor, pues ta wak cu duidelijk e ta un revancha politico cu no tin un base legal,” el a indica.

Mirando e situacion Oduber a manda un carta pa presidente di Parlamento den cual e ta splica su motibo pa trece dilanti obhecion contra e medida cu nan a tuma den su contra y a pidi pa manda esaki pa Raad van Advies pa haya un conseho riba esaki.

Den e carta cu Oduber a manda pa presidente di Parlamento el a splica cu durante e ultimo reunion di Comite Central, cu sosten di e fraccionnan di AVP, MEP y Futuro, a dicidi di mantene un sancion restrictivo, cu ta nifica un exclusion di miembronan di Parlamento di momentonan di representacion internacional riba base di sospecho of condena pa un delito penal.

Como lider di fraccion PPA parlamentario Oduber a obheciona e medida aki, cual e fraccion ta considera como un infraccion serio di e derechonan constitucional di miembronan di Parlamento. Oduber a pidi presidente di Parlamento, Marlon Sneek, pa entrega e propuesta di e medida aki na Raad van Advies pa conseho, splicando alabes su obhecionnan.

E parlamentario a splica cu cualkier restriccion di podernan parlamentario ta rekeri un base legal explicito den un ordenansa nacional. El a indica cu e principio di legalidad – un pilar di e estado di derecho – ta stroba un mayoria politico di tuma medidanan cu ta afecta e funcionamento di un parlamentario individual, pafo di legislacion formal. E metodo di operacion actual, el a enfatisa, ta carece di ningun base legal y pues ta contrario na ley.

El a sigui splica cu articulo III.1 di Constitucion ta stipula cu Parlamento ta representa henter e pueblo Arubano. El a remarca cu tur 21 miembro di Parlamento ta cumpli cu e tarea aki door di haci tareanan central, manera representacion interparlamentario. Mishi cu e tarea ey – sin intervencion hudicial of un base huridico, Oduber ta subraya, ta incompatibel cu e principionan di democracia parlamentario.

Parlamentario Oduber a enfatisa cu na final di dia pueblo ta esun cu a vota, den virtud di e sistema di representacion proporcional (Articulo III.4 di Constitucion) pa PPA drenta Parlamento di Aruba y asina representa Aruba, tanto na nivel nacional, interregional como internacional.

E lider di fraccion PPA ta remarca cu representacion proporcional ta zorg pa cada voto carga peso igual y cu puntonan di bista di minoria tambe ta ser expresa den trabou parlamentario. E exclusion di fraccion PPA for di momentonan di representacion den exterior, el a enfatisa, no solamente ta mina e principio di igualdad, pero tambe e confiansa di votadonan den un democracia husto y inclusivo.

E medida imponi, el a subraya, ta preveni participacion efectivo di miembronan di Parlamento den structuranan di consulta manera IPKO, den cual politica di Reino tambe ta ser discuti y influencia. Esaki no solamente ta limita e rol di supervision di Parlamento pafo di e fronteranan di e pais, pero tambe ta debilita e posicion parlamentario di Aruba dentro di Reino.

Parlamentario Oduber a splica cu articulo III.22 di Constitucion ta stipula cu Parlamento ta autorisa pa representa e interesnan di Aruba cerca gobierno di Reino y e Estadonan General. E exclusion di fraccionnan for di representacion interparlamentario, segun e parlamentario, ta pues den contraste cu e mandato aki hancra den Constitucion.

Banda di esaki, el a sigui splica, articulo 17 di e Statuto ta stipula cu Parlamento di Aruba por manda delegadonan special pa e consideracion di leynan di Reino. Un mocion procedural cu ta exclui miembronan di Parlamento di e rol aki di antemano ta stroba e representacion constitucional di Aruba na nivel di Reino.

Hustamente pasobra esaki ta regarda un medida (punitivo) cu ta afecta directamente e derechonan constitucionalmente garantisa di miembronan di Parlamento y de facto tin e caracter di un sancion institucional, Oduber a indica, prueba contra e proceso legislativo formal a ser completamente evita. El a enfatisa cu no tabatin base legal y no tabatin revision hudicial prome cu e medida.

Parlamentario Oduber a remarca cu e burla aki di e trayecto legislativo formalmente rekeri ta nifica cu e medida ta falta tur e garantianan legal cu normalmente ta sirbi pa proteha democracia parlamentario: apertura, seguridad huridico, revision di estado di derecho y prevencion di arbitrariedad politico.

Ta pa e motibo aki mes, el a enfatisa, e situacion aki merece un aplicacion di articulo IV.1, inciso 1 di Constitucion, cu ta rekeri pa busca conseho riba concepto di ordenansanan nacional. E consecuencia huridico di e medida ta, el a indica, comparabel, pues segun e, e ta limita e podernan constitucional fundamental di un representante di pueblo.

Oduber a subraya cu pa proteha e sistema parlamentario y pa preveni precedentenan constitucional den cual mayoria partido politico por restringui e derechonan fundamental di miembronan individual di parlamento, un prueba huridico obhetivo ta indispensabel.

Por ultimo, el a pidi presidente di Parlamento, sr. Sneek, pa entrega e prohibicion di biahe pa miembronan di Parlamento – den casonan di sospecho of condena – na Raad van Advies pa conseho.

Oduber a indica cu e no ta compronde e situacion mirando cu el a biaha riba su mes pa participa eynan y na april ainda, a pesar di e decision cu nan a tuma, a manda un carta pa Parlatino informando ken ta e miembronan di e comisionnan di Aruba pa Parlatino den cual Oduber ta forma parti di dos comision.

A pesar cu presidente di Parlamento a indica cu e lo atende cu e situacion y cu Oduber ora yega back Aruba, te ainda Oduber no a tende nada di e situacion, a papia cu e presidente di Parlamento y no a haya niun reaccion for di su persona ariba e tema aki.