Segun parlamentario Otmar Oduber (PPA): CAft a haci maluso di crisis di pandemia pa pone condicionnan

Ayera mainta lider di fraccion PPA, parlamentario Otmar Oduber a tene un conferencia di prensa durante cual el a trece dilanti diferente topico. Un di e topiconan tabata tocante e reunion cu Parlamento di Aruba a tene recientemente cu e Secretariado di e Colegio di Supervision Financiero di Aruba (CAft) caminda nan a duna un splicacion di nan trabounan.

Parlamentario Oduber a indica cu como lider di fraccion e ta aprecia e trabou cu ta ser haci den cierto sentido, pero alabes el a remarca cu loke fraccion PPA a pone dilanti hopi cla durante e reunion tabata e posicion hopi critico cu PPA a pone su mes aden den e reunion tegenover di e Secretariado di CAft.

El a splica cu entre otro, como lider di PPA, el a mustra riba e hecho con ta posibel cu den e prome cinco aña prome cu pandemia practicamente no a mira un mehoracion den e finanzas publico di Aruba. El a indica cu, mas leu ainda, ora mira cu di momento cu CAft ta presente na Corsou y Sint Maarten y cu nan a drenta den nan Status Aparte, y mira unda nan ta awe, por mira cu no necesariamente tur loke CAft bisa of presenta como recomendacionnan ta cosnan cu ta resulta positivo pa e comunidad y sociedad di un pais.

Parlamentario Oduber a indica cu CAft no tabatin contesta fiho cu por a ser duna. El a splica cu fraccion PPA a mustra riba e hecho cu CAft como instituto cu ta raporta directamente na Conseho di Minister di Reino na Hulanda, a haci uso di un situacion di crisis, manera cu tabata e caso na momento di pandemia di Covid, “pa despues di esey cu cuchiu na garganta” pa na cierto momento obliga gobierno y parlamento, bay di acuerdo cu cierto condicionnan pa motibo cu si no lo a bay di acuerdo e ora no lo tabatin placa durante pandemia, momento cu Aruba no tabatin entrada pa motibo cu mester a cera frontera y turismo a bin 100% abou.

“Nan a haci mal uso di e oportunidad ey pa pone condicionnan. Mi no t’ey pa defende ningun gobierno pero mi ta imagina mi cu cualkier politico cu na e momento ta bela pa su comunidad ta hay’e forsa di firma documentonan cu normalmente bo no ta firma bou di condicionnan normal,” el a remarca.

E parlamentario a splica cu esey ta conta no solamente den e caso aki, pero e ta conta den tur caso. El a subraya cu momento cu ta firma algo y ta bay di acuerdo cu algo, referiendo specificamente na e ruta di Rijkswet cu a ser inicia e tempo ey, no ta corecto pa cuminsa e ruta “bou di menasa, bou di presion, bou di e circunstancianan cu tabatin e momentonan ey.”

Oduber a remarca cu cualkier contract, den cualkier otro tereno, cu ta ser firma prome cos cu etica ta bisa ta cu mester firma na un forma habri , transparente y cu di tur dos banda ta bay di acuerdo cu e contract. El a indica cu den e caso aki Aruba no tabatin opcion pa bisa cu e no ta firma pasobra si e no firma lo tabata nifica cu durante pandemia placa no lo a yega pa por ehempel hospital sigui draai, pa KPA por a sigui draai, pa e economia y un cantidad di hende cu a haya placa e tempo ey por a sobrevivi y pone cuminda riba nan msa.

“Asina erg e situacion tabata cu nan a usa e tempo ey pa duna consehonan cu a primi e garganta di e pueblo di Aruba mediante su gobierno y parlamento,” el a enfatisa.

El a splica cu el a menciona esaki pasobra el a mustra riba e hecho, cual ta loke fraccion di PPA ta keda para p’e den e discusion di Rijkswet, cu articulo 36 y 38 di Constitucion di Reino caminda ta papia di sostene otro den momentonan di crisis.

“Pandemia tabata algo cu a baha bin riba nos cu nos a pidi placa no pa nos inverti, no pa nos paga pa ambtenaar, no pa nos cosnan cu nos tabata desea, si no pa nos hendenan por sobrevivi cu ta e prestamo di 800 miyon durante pandemia cu Hulanda awe ta cobra un interes riba dje y naturalmente tabata kier condiciona na e forma cu e kier condicion’e y eynan ta caminda nos tin e problema,” el a subraya.

El a indica cu CAft no por a duna contesta y nan a bisa cu nan ta haya cu esaki ta discusionnan politico cu mester tuma lugar.

Parlamentario Oduber a indica cu el a mustra nan riba e hecho si cu ta a base di recomendacionnan cu nan a haci den por ehempel caso di AZV caminda cu mester a corta 50 miyon pa aña den AZV durante pandemia.

El a remarca cu loke CAft a haci laba man riba e discusion cu tabatin caminda PPA a bisa cu ta imposibel cu por a tuma un decision asina pa despues mira cu e tabata totalmente innecesario, pero cu tabatin su consecuencia pa salud y bida di hende pasobra a bay corta caminda no tabatin necesidad pa corta. “Awe ta djis laba man y bisa cu ta conseho nos ta duna, otro ta tuma decision, nos ta mand’e pa Conseho di Minister di Reino,” el a indica.

Oduber ta enfatisa cu mester bira e discusion den cuadro di Rijkswet caminda mester bisa cu nan mester respeta e Constitucion di Aruba y articulonan 36 y 38 y acuerdonan cu Aruba tin como pais autonomo.

El a agrega cu el a hasta menciona cu como fraccion PPA nan ta propone un begrotingskamer caminda ta hinca den dje tur e normanan aki pa sigura cu si kier cambi’e mes, ta dos tercera parti di parlamento cierto momento mester bay di acuerdo pa cambi’e cual ta duna e garantia na Hulanda cu no mester, pa ora kier cambia un ley of termina un ley, mester bay na Conseho di Minister di Reino of na Tweede Kamer of otro instancia pa por determina algo cu ya caba Aruba tin derecho riba dje.

Por ultimo el a indica cu di parti CAft na cierto momento a pidi disculpa pa formanan cu nan tabata presenta nan mes. El a indica cu practicamente tur fraccion, cu excepcion di un fraccion, a para duro contra nan y exigi un disculpa di parti CAft pasobra cierto momento nan a bisa cu si e prijs pa tin un autonomia ta esaki y nan mester pag’e. “A bisa nan cu absolutamente cu no, nos no ta trata otro asina, nos no ta kere cu den Reino mester trata otro,” el a enfatisa.