Recientemente, lider di fraccion PPA, parlamentario Otmar Oduber a cuestiona e falta di transparencia y prioridadnan di Gabinete AVP-FUTURO. Den un video cu e parlamentario a comparti riba pagina oficial di partido PPA, el a trece dilanti cu e tin mas di 140 dia caba wardando pa un reunion publico tocante Rijkswet y cu gobierno no ta duna atencion y prioridad na problemanan real.

Referiendo na e biahenan cu algun minister a realisa recientemente, parlamentario Oduber a indica cu Parlamento di Aruba no ta ser notifica di e biahenan aki, ni tampoco ta haya ningun actualisacion di kico ta bay ser haci den e biahenan aki.

El a splica cu parlamento su trabao ta yama y puntra e minister of manda pregunta pa e minister, pero esaki no ta ser sigui. El a sigui splica cu tabatin un reunion di comision di CHAy fraccion PPA mustra presidente di parlamento riba e hecho cu tin nan reunion publico pidi riba Rijkswet mas di 140 dia pasa caba, siendo cu Reglamento di Orde ta bisa cu ta dentro di 30 dia mester yama un reunion publico.

“Esaki ta mustra atrobe un incumplimento di Reglamento di Orde. Den e discusion ta bisa cu e mester check cu e minister. Esey no ta e Reglamento di Orde. E Reglamento di Orde ta bisa cu den 30 dia presidente di parlamento tin cu yama e reunion. E no ta bisa cu presidente di parlamento mester bay check cu su colega, den e caso aki cu ta minister, ki ora e por, si e por, si ta druk of no. No… Reglamento di Orde ta Reglamento di Orde, den 30 dia presidente mester yam’e. Ya 140 a pasa bay” el a remarca.

El a indica cu gobierno no kier tin transparencia y a agrega cu den discusion cu gremionan cu fraccion PPA a tene recientemente, gremionan a keda sorprendi cu Parlamento di Aruba ainda no tin ningun documento pa loke ta trata Rijkswet, ni sikiera e concepto di esaki.

“Bo ta tende parlamentarionan manera Sr. Goeloe di fraccion Futuro cu ta papia di politica nobo, pero no ta interesa den haya e documentonan tampoco, ta prefera di funciona como un vocero, un PR di gobierno y no puntra gobierno nada ora no ta cumbini nan como coalicion cu preguntanan ser haci,” el a agrega.

Referiendo na e biahe recien di minister di Turismo, Labor y Transporte, Wendrick Cicilia (AVP), el a indica cu e mandatario ta biahando pa firma acuerdonan pa ayudo den sector laboral, pero el a enfatisa cu ta na Aruba nan mester yuda e comerciante, duna permiso, pasa den e proceso DIMAS y haci un pardonregeling, y duna un flexibilisacion riba e cantidad di indocumentado cu ya caba ta trahando, pero cu no ta contribuyendo na pais Aruba.

“Cuminsa eynan. Bo no mester a biaha bay Hulanda pa busca e fabor ey, ta aki bo mester un decision, un postura como gobierno y ta duna un pardonregeling na 10mil hendenan cu ta trahando ilegal, pero cu no ta pagando nada na Aruba, ta legalisa nan ta crea un proceso pa nan,” el a subraya.

Alabes, el a indica, basa riba loke gremionan ta bisa, apart di esnan cu ta indocumenta cu ta trahando na e momentonan aki, ainda mester mas hende pa traha. El a enfatisa cu no tin e necesidad pa e minister bay ningun parti di mundo pa esey.

El a trece dilanti cu tempo e tabata minister di Labor, durante un periodo di cuater aña, e tambe por a bay biaha, pero e no a scoge pa no hacie pasobra e no ta mira e necesidad pa esey. El a agrega cu awor minister Cicilia cu tin dos luna como minister a sinti cu e tin cu bay Ginebra caba pa atende un conferencia di ILO cu tur e gastonan cu esaki tabatin cune.

“Mi ta kere nos prioridad ta totalmente robes. E gobierno aki ta difama, e gobierno aki di dia cu el a ranca sali no por haya su forma no por haya su drive, ainda no por caba di nombra un minister. Ta bay corte, no ta bay corte, nan no sa si minister presidente ta na Aruba, no tin comunicacion, pais ta ingobernabel na e momentonan aki, anto bo prioridadnan ta totalmente robes,” el a remarca.

Parlamentario Oduber a splica cu fraccion PPA a haci preguntanan ta minister Gerlien Croes, un serie di pregunta tocante deporte, specificamente pa loke ta trata facilidadnan deportivo mas cu un luna pasa, pero ainda no a ricibi contesta. El a indica cu gobierno a priminti un politica nobo, incluyendo cu den dos siman nan ta contesta parlamento, pero ainda no a cumpli cu esaki.

“Den campaña ta papia bunita y ta pretende di ta un politico nobo, un generacion nobo, pero tur loke bo a priminti bo no ta cumpli cune. Nos prioridadnan ta totalmente robes, bo no tin nada di bay busca na Hulanda pa yuda bo den e sector laboral, bo no tin nada di bay busca na Ginebra na e momentonan aki, tur ta snoepreisjes, aki na Aruba mester atende cu e problema,” el a enfatisa.

E parlamentario a indica cu minister di Labor, minister Cicilia, mester a yama minister di Integracion, minister Arthur Dowers, y hunto nan mester a tuma un decision tocante con ta bay documenta e 10 mil indocumentado cu na e momentonan aki no ta pagando 50 miyon na contribucion na pais Aruba. “Esey ta e decision cu bo mester tuma, bo no mester bay cerca niun hende, aki bo mester tum’e,” el a agrega.

El a sigui splica cu adicional na loke gremionan ta mencionando tocante e necesidad di cierto specialisacionnan, el a subraya cu gobierno ta trancando economia di Aruba y kibrando negoshinan cu no por duna e servicio manera cu nan mester dun’e pasobra e prioridadnan di gobierno ta totalmente robes. “Prioridadnan ta poni riba loke na e momentonan aki no ta importante pa comunidad. Talbes ta forma pa desvia atencion,” el a finalisa.