Recientemente e topico di Cuenta Anual di Pais Aruba ta riba mesa un biaha mas. Director di Departamento di Finanzas, Derrick Werleman, a indica cu pa fin di aña no lo tin retraso mas den cuentanan anual. Retrasonan di cuenta anual ta un hecho cu gabinete anterior tabata traha pa resolve tambe. Bon Dia Aruba a tuma contacto cu ex-minister di Finanzas y actual parlamentario Xiomara Maduro, ken a elabora mas riba e topico.

Parlamentario Maduro a splica cu e Cuenta Anual di Pais Aruba ta cera e ciclo presupuestario di un aña. Desde aña 2019 tin un retraso pa produci e cuenta anual di pais Aruba debi na e pandemia y na e trabaonan di reforma cu ta ser realisa den cuadro di e Landspakket tema A, Verslaggevingstelsel, pa mehora e structura di e cuenta anual cu e meta pa esaki por ser controla y certifica pa un accountant externo. E mehoracion aki, el remarca, ta necesario como cu e ultimo cuenta anual cu a ser controla ta data di aña 1998 y no tabatin un resultado positivo.

Pa loke ta trata e retraso, Maduro a sigui splica cu Gabinete Wever-Croes a logra pa Departamento di Finanzas haya e personal necesario pa por a traha riba e cuentanan anual. Y alabes pa surpasa un reto cu e sistema administrativo pa asina optimalisa su funcionamento, y tambe pa haci un limpiesa necesario.

El a indica cu Centraal Accountantsdienst tambe a ricibi e apoyo necesario pa por a haci e nulmeting, cu ta bira e punto di salida di e cambionan cu ta necesario pa por yega na un cuenta anual cu por ser controla.

Parlamentario Maduro a splica cu prome cu traspaso di Gabinete Wever-Croes pa Gabinete AVP-FUTURO, nan a logra entrega Cuenta Anual 2019 na Parlamento di Aruba y e ley pa fiha e saldo di 2019 ta cla pa ser trata den reunion publico, pero no tin fecha ainda. Na december 2024 nan a entrega cuenta anual di aña 2020 na Algemene Rekenkamer Aruba.

Ademas, el a agrega cu a laga atras trabaonan riba cuenta anual di aña 2021 y un schedule di entrega den cual e cuenta anual di 2024 por ser entrega ainda prome cu aña 2025 caba.

Na april ultimo durante un encuentro publico den Parlamento di Aruba, director di Departamento di Finanzas a duna un splicacion amplio di e motibo pa e retraso di e cuenta anual. Parlamentario Maduro a elabora riba e splicacion di e director di Departamento di Finanzas.

E director a splica cu e lockdown na comienso di e pandemia a stroba e trabaonan pa cera administracion di aña 2019 y Aruba diripiente mester a cuminsa manda diferente reportahe nobo na Hulanda pa por haya yudansa financiero, locual a trece tardansa di 6 luna cune den e trabaonan necesario.

Despues e aplicacion GFS One, den cual ta hiba e administracion financiero di Pais Aruba, a confronta problema y e compania di Hulanda encarga cu e software a tarda basta pa por a haya e fayo, y despues a tuma tempo pa por a drecha esaki, locual a pone cu un aña di trabao a bay perdi. Na comienso di aña 2021 tambe Departamento di Finanzas a perde dos empleado cardinal cu a pone cu a bin retraso grandi den e administracion financiero y tambe den e compilacion di e cuenta anual.

A dura hopi pa por haya empleado nobo y ta te na aña 2024 ta logra yena e cuponan vacante den cuadro di ehecucion di proyectonan di Landspakket. Pa emotibo ey ta den aña 2024 mayoria trabao a ser haci na unda a presenta cuenta anual di aña 2019 na Parlamento caba, cuenta anual di aña 2020 ta na Algemene Rekenkamer Aruba caba y ta trahando riba cuenta anual 2021 na e momentonan aki.

Anteriormente, Maduro tambe a indica cu pa fin di aña 2025 ta spera di por a ‘haal in’ ful e retraso. Fuera di esaki el a enfatisa cu ta importante pa splica cu den cuadro di jaarrekening, Central Accountantsdienst tambe ta bezig ta recomenda cambionan cu ta necesario pa e cuenta anual di aña 2026 por ser certifica, un otro proyecto grandi na unda ya caba tin 320 recomendacion pa mehoracion cu mester ser implementa.

Durante un conferencia di prensa na comienso di siman di minister Geoffrey Wever tocante e uitvoeringrapportage di presupuesto pa prome seis luna di aña, director di Departamento di Finanzas, Sr. Werleman, a comparti algun comentario tocante e gestion financiero y entrega di cuenta anual di pais Aruba.

“Nos a logra entrega e reportahe akinan na tempo, conforme stipulacion den Articulo 17 den ley di LAft, ley di supervision financiero,” Werleman a bisa tocante e uitvoeringsrapportage, bao di cual despues di seis siman di finalisacion di e kwartaal, mester entrega e rapport aki.

Sr. Werleman a splica cu “esaki ta den un proceso tambe cual ta inclui e inhaalslag cu nos ta hibando pa cu e cuentanan anual di gobierno di Aruba.” Un par di siman pasa a entrega e cuenta pa 2022 na Contraloria General, y awor nan ta bezig cu e cuenta anual pa 2023, cual Werleman a indica ta spera cu comienso di september ta bay por entreg’e na Contraloria General, y pa fin di aña lo por entrega e cuenta anual di 2024, “y e ora ta pasa pa historia e retrasonan cu tabatin den e cuentanan anual.” El a menciona cu e proceso aki a dura basta tempo, desde pandemia, y cu a haci hopi trabao pa recupera e posicion aki, “pero mi ta hopi contento di por bisa cu nos a logra basta, cu hopi esfuerso di hopi hende, y contribucionnan di hopi departamentonan tambe, no di departamento di Finanzas, pero hopi partnernan den e cadena.”

Segun Werleman, awo nan por “presenta den un periodo hopi liher e cifranan actual cu ta tumando lugar den gestion financiero, den e resultadonan financiero di gobierno di Aruba, pero tambe cu nos por bisa cu e responsabilisacion di gobierno a base di cuentanan anual tambe por yega na un, ya, nos yam’e un final feliz, cu por duna cuenta den actualidad di kico ta pasando.”