Recientemente, parlamentarionan di oposicion a trece dilanti nan preocupacion pa nombramentonan preocupante den gobierno di AVP-Futuro. Un di nan, nombramento di director den compania estatal Utilities, ta un di e mas severonan, y a cu lo costa Aruba 100 miyon extra den 20 aña.
Parlamentario Xiomara Maduro (MEP), a manda pregunta na minister di Finanzas, Geoffrey Wever (Futuro) tocante posible mal maneho den e companianan di utilidad: WEB, ELMAR y Utilities NV.
Manera e parlamentario a bisa den un comunicado di prensa, e 11 pregunta haci ta trata e cambio di comisarionan cu ta tumando lugar na e companianan di utilidad, sin cu ta cumpli cu e reglanan di “good corporate governance.”
Maduro a expresa preocupacion pasobra ta haci nombramento sin aprobacion previo di lenders, kendenan ta institutonan financiero cu ta presta e companianan di utilidad placa, y cu segun contract, mester aproba tur comisario prome cu nan por cuminsa asumi nan funcion.
Den su carta, parlamentario Maduro a expresa preocupacion cu e situacion por tin consecuencia financiero serio, incluyendo un posible “default tecnico” cu por pone den riesgo e capacidad di e companianan di utilidad pa sigui inverti den infrastructura vital, manera energia sostenible y expansion di e red di coriente.
Den su carta, Maduro ta pone enfasis riba e responsabilidad di gobierno y particularmente e Minister di Finanzas, como doño y unico shareholder, pa garantisa bon gobernacion y un maneho responsabel den e empresanan vital aki.
Un di e preguntanan ta cuestiona e rol di Minister di Finanzas den e proceso di nombramento di comisario, y ta cuestiona e motibo cu e mandatario ta scoge pa tuma vakantie net den un periodo cu tanto riesgo financiero ta loer na e companianan di utilidad.
“Nos pueblo mester transparencia y stabilidad. E companianan estatal ta esencial pa nos bida
diario y pa e desaroyo economico di Aruba. Gobernacion responsabel no ta opcional, ta un
obligacion,” segun palabra di Xiomara Maduro. E Parlamentario di MEP ta spera un contesta por escrito dentro di dos siman.
Good corporate governance
Good corporate governance ta referi na e sistema di regla, practica y proceso bao di cual ta dirigi y controla un compania. E ta sigura cu ta maneha un compania di manera etico, transparente y responsable, asina contribuyendo na su exito a largo plaso.
Na 2020, Hulanda a pone como condicion pa e prestamonan pa e crisis di Covid cu Aruba tambe mester bin cu su ley di good corporate governance. Un comision bao guia di Sr. Jossy Lacle, hunto cu ex-Gobernador Fredis Refunjol, Mr. Arie Swaen y dr. mr. Helen van der Wal cu asistencia di dr. Kunneman y dr. Bakhuis a produci un concepto di ley y codigo pa Good Corporate Governance na 2022. E comision a investiga kico a traha y no a traha na St. Maarten y Corsou; a formula un concepto cu ta cumpli cu exigencianan nobo y miho practica, cu contribucion di publico via sesionnan na Universidad di Aruba y pa medio di un portal digital.
Na april 2022 a keda prepara e concepto pa hancra good corporate governance den un ley (Proeve O-Lv Corporate Governance Concept 29 APRIL 2022). E ley aki tin como meta regula e procesonan di toma di decision cu ta trata e participacion di Aruba den entidadnan legal dentro di sector publico y semi-publico. E ta establece regla obligatorio pa accionnan di maneho corporativo relaciona cu gobierno, y mecanismonan di supervision a traves di e Autoriteit Corporate Governance. E leu ta aplica na entidadnan publico legal (institucionnan estatal), companianan propiedad di gobierno, fundacion y asociacion influencia pa gobierno, y otro persona legal designa mediante decreto nacional.
Apart di e ley a emiti un ‘codigo’ cu ta delinea e standardnan di bon gobernacion cu ta transparente, y a keda acorda cu e ministernan mester sigura cu entidadnan bao di nan supervision ta adopta y cumpli cu e codigo.
Pero ainda e ley aki no a pasa, loke ta dunando espacio pa no cumpli cu e reglanan di good corporate governance. Manera Bon Dia Aruba a publica anteriormente, falta di e cuadro legal aki ta pone cu ainda na Aruba conoce e fenomeno unda cada Gobierno ta nombra su propio comisarionan, cu por tin efecto pa continuidad di maneho.
Pa loke ta specificamente e nombramento di Comisario den un hunta, e reglanan di good corporate governance ta stipula cu mester haci esaki den fase; no por nombra tur comisario nobo den un solo biaha. Esaki pa sigura continuidad y stabilidad den e hunta.
Utilities “den default”
Siman pasa caba, parlamentario Maduro a comparti riba su rednan social cu el a scucha indicacion cu “companianan di Utilidad ta den default cerca Lenders” pa motibo di e decisionnan di gobierno “pa hire and fire comisario di Hunta di Supervision contra TUR regla di bon gobernacion.”
Den un comunicado di prensa, e parlamentario a bisa: “Sin sigui regla di good corporate governance, AVP ta nombrando comisario nobo den hunta di supervision di e companianan estatal sin aprobacion di lenders, locual ta pone e empresanan estatal na riesgo di default.”
El a sigui splica cu “cada bes cu un miembro nobo di un [hunta] di un compania estatal wordo apunta of un miembro wordo kita of reemplasa pa otro, lenders cu ta fia e compania estatal placa of ta para garantia pa inversionnan grandi, mester duna aprobacion prome. Locual ta pasando awo ta cu AVP ta bezig ta haci deshaci y contra di tur regla di bon gobernacion ta kita y nombra comisarionan nobo. E manera aki di traha sigur no lo por conta cu e aprobacion di lenders. Den un situacion asina lenders ta pone e companianan den default, locual ta trece cune consecuencia financiero grave manera: multa, interes mas halto, y falta di fiansa of garantia pa financia inversionnan crucial pa suministro di awa y coriente.”
Awo e siman aki, e parlamentario a indica cu ya ta e caso cu “awe debi na mal gobernacion lenders no ta aproba comisarionan, Utilities ta den default y lenders no ta fia WEB placa pa inversion.”
Parlamentario Evelyn Wever-Croes, lider di partido MEP, tambe a comenta tocante e situacion riba rednan social. “Nan kier rijkswet pa scapa 50 miyon na interes den 20 aña, pero nan ta permiti politikeria den Utilities cu lo costa 100 miyon extra interes den 20 aña!” el a skirbi. “Den cuadro di transparencia ta bira tempo pa e ministernan di Futuro [Geoffrey] Wever y [Gerlien] Croes contesta e mas 50 preguntanan cu nos a haci nan den ultimo dos lunanan riba e topico aki.”
Den un comunicado di prensa, Fraccion MEP a indica cu nan “ta tene Arthur Dowers y Baba Herde personalmente responsable pa e interes adicional cu WEB y ELMAR mester paga.”
Segun e comunicado, minister “Arthur Dowers a manda kita e director, y tur comisario di Utilities Aruba NV y nombra miembronan nobo liga na nan partido. Esaki sigur a crea un problema grandi pa Elmar, Web y Utilities cu e banconan, mirando cu e gobierno nobo no a pidi aprobacion pa e nombracionnan aki, resultando asina den un violacion di e acuerdo haci entre Utilities Aruba NV y e banconan.”
Segun MEP, “no tabatin ningun motibo ni hustificacion” pa e cambionan y pa e motibo aki, “banconan a cuminsa cobra e companianan un interes mas halto. Ta trata aki di mas di 5 miyon adicional.”
Bon Dia Aruba a tuma contacto ayera tardi cu minister di Finanzas, Geoffrey Wever, y a puntra si ta berdad cu Utilities ta den default. Te ciere di e edicion aki, no a ricibi un contesta.
