Gabinete AVP-FUTURO ta enfatisa e necesidad pa un sistema di educacion progresivo y inclusivo, cu ta prepara pa futuro cu un strategia nacional di innovacion cla y un agenda digital cu ta cumpli cu standard, tanto nacional como internacional. Den nan plan di gobernacion gobierno nobo ta detaya pasonan importante cu lo tin den liña pa asina logra e obhetivo aki.

Pa e motibo ey gobierno ta compromete na un legislacion di educacion orienta riba futuro y ta habri caminda pa innovacion y segundo oportunidad pa tur ciudadano, cu enfasis principal riba desaroyo social y academico di mucha y formacion di hoben.

Pa logra e meta aki nan lo pone prioridad na revisa e structura di salario di docente y bin cu un sistema di compensacion cu ta laga e docente sigui crece salarialmente y duna compensacion cu ta incentiva e docente pa sigui studia y inverti den su conocemento practico y pedagogico.

Gobierno lo introduci tambe un strategia nacional inclusivo acopla na innovacion den educacion; lo aumenta e finanzas disponible pa e structura di cuido pa tur scol por yega na tin un of mas SMW’er (Sociaal Maatschappelijk Werker), dependiendo di e necesidad di e scol y bario, y lo busca mas personal pa agilisa proceso di test na Multidisciplinair Centrum (MDC); den cooperacion cu Ministerio di Asuntonan Social y Salubridad.

Ademas lo habri dialogo nacional riba desaroyo di futuro y cantidad di alumno den klas; lo hiba consulta nacional riba adaptacion di e curriculum pa sirbi e escenario di futuro, incluyendo e 21st Century Skills, ademas di ciencia, tecnologia, ingenieria y matematica (STEM).

Como parti di nan prioridad gobierno lo pone tambe fondo disponible pa recapacitacion di docente den forma di duna les y conocemento riba necesidad actual di studiante pa brinda un educacion mas personalisa y segun e necesidad y interes di studiante.

Gabinete AVP-FUTURO lo evalua e plan di implementacion di introduccion di Papiamento revisando metodo y curiculum; y lo ofrece curso continuo di Papiamento como idioma di instruccion y introduci number telefonico pa informacion necesario.

Hunto cu Minister di Labor y Minister di Economia, lo structura y alinea e sistema di educacion na e demanda di mercado laboral actual y di e vision economico di futuro, fomentando un comunidad; hunto cu Minister di Finanzas, lo restructura fiansa pa estudio avansa; y lo crea mas oportunidad y structura den educacion di segundo oportunidad na necesidad laboral; den cooperacion cu Ministerio di Labor, Ministerio di Husticia y Ministerio di Asuntonan Social.

Den e lista di prioridad pa yega na un sistema di educacion progresivo y inclusivo, cu ta prepara pa futuro, gobierno lo reintroduci e sistema di acreditacion pa conocemento vocacional; y lo inverti den capacitacion di tur personal den educacion den e area di inteligencia artificial, agilidad, futures-, system- & design thinking, innovacion y capacidad digital.

Lo reinstitui tambe e departamento encarga cu subsidio y fondo externo (p.e. Union Europeo) pa asisti scolnan cu entrega di proyecto dirigi riba innovacion y futuro; lo structura e supervision riba les cu un enfoke riba modernisacion y crea miho traspaso (overgang) entre peuter, kleuter, scol basico, scol secundario, scol avansa y scol special; y lo crea un maneho di acreditacion pa scolnan no tradicional y cu no ta forma parti di e sistema Hulandes, pero ta cumpli cu standard di calidad.

Gobierno lo crea colaboracion cu sector priva y NGO pa comparti conocemento y experiencia; lo empodera Bureau Leerplicht pa por haci control y funciona debidamente; y lo introduci un maneho fiho y miho organisa pa muchanan na scol cu no tin permiso di estadia den cooperacion cu Minister di Integracion.

Gabinete AVP-FUTURO lo inverti den y restructura e sistema di educacion di scol primario y secundario cu un conexion debido y capacitacion di muchanan cu limitacion y hunto cu Minister di Labor y sector priva lo crea e transicion debido pa mercado laboral.

Tambe lo introduci programa di aprendisahe pa facilita hobennan cu experiencia profesional, bou guia di scol y habri caminda pa entrada den mercado laboral; lo inverti y restructura EPI cu programa di estudio pa e necesidadnan di e mercado laboral y di futuro den cooperacion cu sector priva; y lo inventarisa necesidad riba sector laboral na corto y largo plaso pa incentiva y acopla programa y curso necesario den e institucionnan educacional; y lo hiba dialogo nacional tambe riba e contenido di curiculo di enseñansa secundario, specialmente na scolnan MAVO.

Hunto cu Minister di Infrastructura tin como meta renoba y inverti den edificio bandona di scol y identifica tereno necesario pa desaroya scolnan nobo y tambe traimerdia; hunto cu Minister di Finanzas, Minister di Infrastructura y doño di edificio di scol, lo traha pa crea un plan di mantencion structural cu lo ser financia a traves di fondo di inversion; y lo ekipa inspeccion di enseñansa riba nivel di standard internacional di maneho di calidad.

Pa loke ta trata enseñansa special, gobierno lo atende cu e necesidad, analisa e diversidad y garantiaa programa di educacion basico y avansa pa mucha y hobennan special.

Hunto cu Ministerio di Economia, lo crea proyecto cu ta stimula conocemento den industria nobo pa un economia diversifica, por ehempel agricultura; y lo amplia e espacionan berde na scol y sigui cu proyecto di agriforesteria;

Gobierno lo actualisa e portal di studielening pa haci esaki mas eficiente y facil pa e usuario; lo amplia e facilidad di Universidad di Aruba y evalua expansion di curiculo, y tambe lo evalua opcion pa expande “flex study” pa studiante cu ta traha.

Por ultimo lo incentiva inversion den establecimiento y/o expansion di institucionnan academico avansa na Aruba, specialmente den rumbo di STEM; lo introduci aspectonan manera computational thinking, digital innovation den e curiculo escolar basico y secundario; y lo amplia fondo y cupo den Bureau TraiMerdia pa acomoda mas studiante.