download (1).jpg

Segun Mayor Sr. Alex Pieters di Departamento Unidad di Motor KPA, den varios accidentenan fatal Polis ta ripara entre otro cu tin vehiculonan cu dos taira diferente patras y dilanti, nan tairanan tabata tur gasta of den otro ocasion cu motor ta completamente venena. Hopi biaha cu accidente fatal a bin ripara cu tabata tin fayo na e vehiculo cu por a evita e accidentenan aki.

Locual Polis eigenlijk no ta haciendo hopi segun Sr. Pieters ta e parti di control di vehiculonan pa wak si nan ta den condicion adecua pa ta riba caminda of si tin algun otro problema. ”Nos a ripara cu tin cierto accidentnan ta pasa no solamente e aña aki pero tambe añanan anterior tambe caminda tabata tin cierto accidentnan pisa cu a sosode cu ora nos wak bon e no ta solamente pa motibo di e velocidad of regla di trafico sino riba e control y mantencion di e vehiculo.” Sr. Pieters ta bisa. Tin tambe por ehempel hendenan hoben cu ta haci cambio na nan auto, instala un motor mas grandi pa e auto core mas duro pero si bo no cambia e otro piesanan di e auto segun Sr. Pieters, e auto no lo core den balans mas cu chens cu bo juist ta trece bo mes den mas peliger pasobra e auto tin mucho hopi poder pero e no tin ekipo pa e por para y brik na tempo. ” No ta solamente e autonan drecha tin e problema aki, pero hopi biaha locual nos ta ripara cu hopi hende riba caya ta cu un cos chikito por causa un accident grandi. Por ehempel si bo no a service bo auto constante, bo auto pa via di zeta of algo por causa un fayo y dal paga cu bo memey riba un crusada of un caminda cu ta netamente un caminda peligroso.” Sr. Pieters ta bisa.  E simpel echo di control y service frecuente di bo vehiculo cada tanto luna seguramente ta rebaha e chens pa enfrenta un problema den trafico cu por tin resultadonan tragico.  

Mester check tur cos 

”Laga nan check tur cos den bo auto, cambio di zeta, motor , pero sigur tambe bo ‘breakpads’, e shocks y tambe e tairanan di e auto pasobra si esakinan faya e ora ey bo auto no ta bay reacciona mas manera debe ser causando accident. Anto e gravedad di e accident ta bay bira despues ki velocidad bo ta coriendo, den ki orario bo ta coriendo si esaki ta druk cu hende riba caminda of no, of bo tabata bo so y a drenta mondi of tambe bo a yega un momento net cu tin hopi trafico anto ata bo dal den otro auto pa via di un fayo tecnico.” Sr. Pieters ta splica. 

E porcentahe di accidente cu tin mundialmente den parti di persona ta halto pero e fayo tecnico tambe t’ey anto esey eigenlijk ta bin bek riba fayo di chauffeur pasobra prome cu bo core bo auto bo mester controla segun Sr. Pieters.  ”Mas cu bo auto ta coriendo bon, cada kwartaal, trece un rato cerca mecanico y lag’e tira un bista pa check si tur cos ta den ordo anto e ora ey bo ta sigui bo caminda.” Sr. Pieters ta bisa. 

Economia ta hunga un rol

Segun Service Manager di Cordia Group Aruba, Sr. Jean P. Lauwereys, pa locual ta servicio di auto eigenlijk tin dos banda: e banda di mantencion of drecha bo auto.
”Loke nos ta purba pone enfasis riba dje ta pa service bo auto regularmente pasobra si bo haci esaki, nos tecniconan por ripara si lo tin algo otro robes cu e vehiculo.” Sr. Lauwereys ta bisa.  E averahe pa dia ta mas o menos un 24 auto cu Garage Cordia ta service segun Sr. Lauwereys cual nan no ta keha di dje pero seguramente dor di e situacion economico na Aruba esaki ta bayendo un poco mas slow compara cu antes. ”Mi no por realmente bisa cu el a baha pero e ta un tiki mas slow pasobra e añanan prome cu esey nos tabata tin realmente un tendencia. Nos tabata tin 13 mecanico y awor nos tin 9, nos a cuminsa bende menos auto y automaticamente ora bo cuminsa bende menos auto esaki tin su efecto. Berdad e por ta miho pero e ta stabiel pues nos no por keha tampoco.”

 

  

Segun Sr. Lauwereys, ta recomenda pa service bo vehiculo cada 5,000Km.  Clientenan na Aruba ta core un averahe di mas o menos 15,000Km. Den otro palabra, un cliente regular lo mester bin cu su auto 3 biaha pa aña pa revisa su auto na cualkier garashi pa percura cu esaki ta den bon condicion.  ”Na Aruba ta asina cu tanten cu e auto ta core y no ta mucho bieu tin e tendencia pa no worry mucho cu mantencion.   Na Garage Cordia, clientenan ta haya un recordatorio via un sistema automatisa pa bin revisa nan auto cada pasa tanto tempo.