Despues di hopi atraso, comienso di luna Gabinete AVP-Futuro a huramenta su di siete y ultimo minister, Sr. Rene ‘Baba’ Herdé, como minister di Infrastructura, Energia y Medio Ambiente. Esaki despues di un turbulencia cu e candidato inicial, actual parlamentario Mike de Meza, kende na final a keda reemplasa pa Herdé. Den weekend, medionan di comunicacion local a informa cu e maneho nobo di Herdé ta creando division den e partido berde.

Informacion di dos diferente medio local a indica cu tin problema entre De Meza y Herdé, pasobra aparentemente tabatin un acuerdo entre nan dos tocante e maneho den e cartera, y awo no ta cumpliendo cu esaki. Pa e motibo aki, tin tension dentro di e partido.

Por recorda cu a nombra Herdé como minister despues cu De Meza no a pasa screening y no a logra resolve e problema den corte tampoco. Awo prensa local ta reporta cu tabatin palabracion cu ora Herdé asumi e cartera, lo duna De Meza oportunidad pa tin influencia den e cartera y posiciona hende di confiansa di De Meza den e ministerio. Es mas, e idea lo tabata pa Herdé fungi como un minister ‘temporal’ mientras De Meza ta keda purba di resolve e obstaculonan cu ta impedie di keda nombra como minister den Gabinete AVP-Futuro.

Comentarionan di premier Mike Eman mes a duna di compronde cu esaki tabata e caso, maske sin tanto detaye.

Den declaracionnan na prensa local den sala di Conseho di Minister e luna aki, minister Herdé a bisa:

“Kiermen cu e expertonan cu a traha e plan, cu expertonan di colega Mike de Meza, hopi lihe nos ta bay sinta traha riba e plannan con ta bay ehecuta nan. Awo’ki no ta tempo mas pa bay planea. E plannan t’ey, awo ta ehecuta.”

Den e comunicado di prensa di gobierno tocante e prome Conseho di Minister den cual Herdé a participa, ta menciona cu “hunto cu e experticio di esnan cu a traha e plan aki, manera ingeniero Mike de Meza y su ekipo, lo cuminsa cu ehecucion di e maneho nobo.”

Esaki ta duna di compronde cu e intencion tabata pa parlamentario Mike de Meza ta involucra den comparti su experticio den implementacion di e maneho di Energia.

Ya caba prome cu a nombra minister Herdé, prome minister Eman a duna indicacion cu parlamentario De Meza tabata involucra den e maneho di e cartera di Infrastructura y Energia, cu tabata provisionalmente den man di minister Arthur Dowers. Comienso di luna, anunciando cu lo busca un reemplaso pa De Meza, Eman a bisa prensa local cu el “a consulta continuamente [cu De Meza] si riba kico mester haci riba e tereno cu el a haci hopi trabao adicional, y minister Dowers ta den contacto cune riba e ideanan cu e tin pa locual ta trata e diferente portefeuille y awo cu e ta bisto cu nos tuma e siguiente paso pa yena e buraco den e portfolio aki, nos ta bay ta canando e caminda ey.”

Sinembargo, awo ta parce cu minister Herdé no ta cumpliendo cu e palabracionnan haci dentro di e partido. No ta siguiendo e maneho cu De Meza a stipula, y tampoco ta tumando hende di confiansa di De Meza den e ministerio. Esaki a causa iritacion cerca e parlamentario, segun prensa local. Y cu un biaha mas, De Meza lo ta menasando di bandona e partido y bay cu su asiento. Esaki si no logra drecha e situacion prome cu parlamento bolbe di reces.

Mientras tanto, partido di oposicion, MEP a expresa hopi critica riba e posible involucramento di De Meza den un ministerio di gobierno, ya cu esaki ta viola e principio di trias politica, cu ta separa e poder ehecutivo (gobierno) di esun legislativo (parlamento.) Tambe a critica cu De Meza den tres luna no a presenta den parlamento, loke ta crea mas tension rond di e situacion aki.

Entre tanto, no tin confirmacion oficial for di partido AVP riba e desaroyonan aki.