Recientemente e portal Hulandes dossierkoninkrijksrelaties a reporta cu segun un “conseho no pidi” cu e Colegio di Supervision Financiero di Aruba (CAft) a emiti na e ex prome minister, Evelyn Wever-Croes, e gobierno anterior a laga comunidad di Aruba cu un perdida financiero di casi 200 miyon florin, cual a ser descubri pa e accountantnan di e Colegio di Supervision.

Segun e portal ta reporta den por lesa di e suma menciona den un ‘conseho no pidi’ cu e Colegio a emiti mas tempran e aña aki na e prome minister di e tempo ey, actual parlamentario y lider di fraccion MEP, Evelyn Wever-Croes, pero cu nunca a ser publica. Pero awor e existencia di e conseho no pidi a bira conoci pa motibo cu e presidente di CAft, Sra. Lidewijde Ongering a mencion’e durante un combersacion cu Comision di Relacionnan di Reino di Senado.

Segun CAft ta indica, e blunder multimiyonario ta resultado directo di e privatisacion di e rioolwaterzuiveringsinstallatie (RWZI), planta di tratamento di awa di riool, concebi pa ex-prome minister Wever-Croes y ex-minister di Finanzas Xiomara Maduro.

Manera ta conoci aña pasa, e planta di RWZI a ser traspasa for di Departamento di Obra Publico (DOW) pa un compania gubernamental cu a ser estableci pa esaki, Aruba Wastewater Sustainable Solutions (AWSS), cu ta un compania subsidiario di Utilities Aruba N.V.

“AWSS a ser distancia di gobierno, pero e manera cu e ta ser organisa ta un problema pa loke ta trata gobernacion. E construccion aki lo conduci cu mester tuma prestamonan hopi caro riba mercado liber. Nos a calcula cu esaki lo encera casi 200 miyon florin na gastonan adicional,” Ongering a revela na miembronan visiblemente sorprendi di e comision.

Segun e presidente di CAft, full e operacion aki por tabata hopi mas barata: “E presupuestonan na gobierno ta suficiente. Y despues AWSS ta tuma un prestamo riba mercado liber cu un prijs hopi halto. Cu tur e consecuencianan financiero cu esey ta encera. Esey ta eficiente?” Ongering a cuestiona.

Na final di cuenta, e gastonan adicional lo ser carga door di e pagador di belasting Arubiano pa medio di e presupuesto nacional.

E portal Hulandes ta subraya cu no ta prome biaha cu CAft ta cuestiona e politica financiero di gabinete Wever-Croes. Net prome cu e gabinete a entrega su retiro, nan a implementa un reduccion di belasting rapidamente tras di lomba di e Parlamento di Aruba, loke a crea un buraco financiero anual di 50 miyon den e presupuesto di gobierno. E medida lo beneficia principalmente entradanan mas halto. Como ‘compensacion’ e pensionadonan, hopi di nan ta biba bou di e liña di pobresa, tabata haya un toeslag pa luna di 30 florin.

Manera ta conoci e privatisacion di RWZI tabata un tema fuertemente critica. E ex prome minister, Wever-Croes a indica na varios ocasion cu e problema di e planta di RWZI, specificamente esun na Bubali, ta un problema serio, te cu hasta na cierto momento e planta a yega na e punto di casi explota, pero a haci e inversionnan necesario pa evita esey sucede. E momento ey el a indica cu su gobierno tabata mira e privatisacion como e unico solucion structural pa soluciona e problema.

Gabinete Wever-Croes e tempo ey a cuminsa busca con por yega na solucionnan y a purba diferente manera, entre otro a yega di ubica fondo den presupuesto pa gobierno mes haci un inversion di 16 miyon florin, cu apenas tabata suficiente pa drecha algun cos solamente, pero esey no por a tuma luga pasobra CAft a pone presion cu mester a baha e deficit na aña 2022.

Unabes cu gobierno a explora tur opcion y a exclui tur otro solucion, nan a yega na e conclusion cu mester privatisa e plantanan pasobra gobierno no tin e posibilidad pa duna un compromiso structural di tempo largo pa por percura cu ta inverti den e planta. Asina e yega na e decision pa privatisa.

Esey tabata e prome decision y despues e ora nan mester a dicidi con y den man di ken lo traspasa e planta. Gobierno a pidi pa haci e privatisacion a traves di e companianan estatal y asina a yega na Utilities Aruba N.V., cu a acepta e reto pa tuma over e planta di gobierno pa solucion e problema y eventualmente construi un planta nobo cu un capacidad mas grandi.

“Mucho of otro opcion no tin. No tin otro opcion na Aruba. Nos a purba di tur manera. Nos a purba di keda cune y drech’e nos mes, no a logra. Nos a logra di privatisa, pero tin cu privatis’e den mannan semi-publico no completamente priva, pa bo tin un poco mas control, y e ora nos a yega na e solucion aki,” ex-prome minister Wever-Croes a bisa e momento ey.

Despues cu a Gabinete Wever-Croes a tuma decision a pa privatisa e plantanan di RWZI, e pregunta di e ubicacion di e planta di RWZI nobo, specificamente esun na Bubali, a bin dilanti. Segun loke e ex prome minister a splica a conduci varios estudio pa wak ki posibilidad tin pa por move e planta di eynan, mirando cu ora e causa molester, e ta causa molester di biaha den e area turistico. Pa cu e estudionan haci, tur conseho a bin negativo, ademas cu e ley di Ruimtelijk OntwikkelingsPlan met Voorschriften (ROPV) ta prohibi pa cambia e ubicacion di e planta aki, y esaki no ta un ley cu por wordo cambia facilmente.

El a splica cu un di e argumentonan treci dilanti cu pakico e RWZI mester keda eynan, ta cu e mester ta cerca di e hotelnan pa esunnan cu ta haci mas uzo di dje. Tambe a trece dilanti cu unabes e planta ta funciona, cu tur e motornan ta traha y e calidad di awa a wordo procesa, no lo bay tin mas molester di holor.