Diahuebs atardi Sindicato di Maestro di Aruba (SIMAR) a reuni cu Minister di Enseñansa, Gerlien Croes, pa dialoga riba e topico cu tin atencion di henter e veld di enseñansa, e restructuracion di salario di maestronan.

Prome cu drenta e reunion cu e mandatario presidente di SIMAR, Angelique Quijada, a splica Bon Dia Aruba cu un di e puntonan cu nan lo enfasis riba dje ta cu nan a traha riba e documento caba y ta cla. Den e documento aki tin poni cu entrante 1 di januari 2025 e aumento di salario mester a bin na vigor.

“Esey ta un di e puntonan cu nos ta bay stress mas hopi pasobra e cos ki ta di 1990 cu no tabatin aumento di salario di maestro, pues e ta un periodo basta largo y nos kier un fecha pa e por bin na vigor,” el a remarca.

Quijada a indica tambe cu minister actual di enseñansa a tene reunion cu e sindicato dia 15 di mei y e mandatario a informa cu manera cu nan a drenta den gobierno a cuminsa traha di biaha riba e aumento di salario di maestro, cual ta seis luna pasa, y segun Quijada esey ta tempo suficiente pa por tin algo cla caba pa bin na vigor.

Bon Dia Aruba a combersa cu Quijada ayera tardi tambe tocante con e reunion mes a bay. El a splica cu locual minister Croes a presenta na e sindicato ta cu nan a cuminsa cu e prome fase di e proceso di e restructuracion salarial, cual ta e gelijktrekking (igualacion).

El a sigui splica cu pa varios aña tin un diferencia grandi entre maestronan di kleuter y basis school cu maestronan di voortgezet onderwijs, pa loke ta trata salario y igualacion di e salarionan aki ta e prome fase cu lo ser implementa.

Quijada a indica cu e igualacion ta bay tuma luga den tres aña. E prome aumento ta bay ta na 2026, na 2027 nan lo ricibi e di dos aumento y e ultimo aumento ta na 2028.

El a indica tambe cu parti di e prome fase ta cu tur e maestronan cu ta den schaal 13ta bay schuif pa schaal 34 y tur e otro maestronan di tur e schaalnan lo ricibi un aumento di 3.49% den nan salario.

Pa loke ta trata elimina criterionan di edad vincula na salario, Quijada a splica cu pa aworaki den e prome fase nan no ta bay cambia e edad, pero minister Croes a indica si na e sindicato cu nan ta bay cambi’e den un siguiente fase, pero no tabatin nada concreto ainda formula.

“Nos no a haya un splicacion kico precies e ta bay ta, nan simplemente a duna informacion cu nan ta bay simplifica e tanto schaalnan, pasobra aworaki tin 45 schaal y e ta bay bira entre cinco cu seis schaal. Nan ta bay adapta salario di e klasassistent, e maestro, directornan y nan lo bay los di edad y nan a pone acopla na beloningsbeleid. Dus si bo haci un curso bo lo por ser compensa pa esey den forma di placa. Tur eseynan ta bin den fase dos,” el a indica.

Despues di reunion cu minister Croes, SIMAR a reuni cu su miembronan. El a splica cu locual e miembronan a trece dilanti ta cu door cu ya nan a firma un documento cu e gobierno anterior cu tabata bisa cu e aumento lo a pasa entrante 1 di januari 2025 y den caso cu no a logra e fecha ey, e documento tambe tabata bisa cu na momento cu e drenta na vigor e lo bin cu forsa retroactivo.

“Esey ta locual nos miembronan kier pa nos trece dilanti na minister. Cu nos kier e, pero kier e cu forsa retroactivo. Esey y pa tene cuenta tambe cu si e bay cu forsa retroactivo, tin maestronan cu a baha cu pensioen e aña aki. Por ehempel si nan a baha cu pensioen na april, y si haya e aumento 1 di januari 2025, wak si tin e posibilidad cu nan por haya sikiera, di januari pa april, e aumento ey,” el a agrega.

Otro punto cu Quijada a menciona e miembronan di e sindicato a trece dilanti ta pa wak e diferencia cu tin den e salarionan entre e docentenan cu ta traha na EPB aworaki y e docentenan cu ta traha na EPI, mirando cu EPB a cambia pa un scol MBO awor y EPI ta un scol MBO, y pa eynan tambe bin e igualacion.

Segun e propuesta di gobierno, e prome fase di e proceso di restructuracion di salario di maestro lo drenta na vigor pa 1 di januari 2026.