Recientemente Secretario di Estado pa Asuntonan Interno y Relacionnan den Reino, Eddie van Marum a manda su rapport di progreso riba e Landspakketnan pa Aruba, Corsou y Sint Maarten pa presidente di Tweede Kamer. E rapport ta duna un bista amplio di kico Aruba a logra den e ultimo lunanan, ki retonan ta keda, y con Hulanda ta mira e colaboracion bayendo dilanti den 2027.

Desde 2021, Aruba, mescos cu Corsou y Sint Maarten, a bin ta ehecutando reformanan structural a cambio di sosten di likides durante e crisis di COVID-19. E reformanan ta destina pa haci e economia mas resistente, restaura finanzas publico, y mehora areanan manera educacion, cuido di salud y seguridad social. E rapport di progreso riba e Landspakketnan ta mustra cu Aruba a logra progreso significativo a pesar di circunstancianan dificil, aunke e capacidad di implementacion ta keda un preocupacion riba varios tereno.

Den e rapport ta para cu e ehecucion di e reformanan na Aruba den e ultimo periodo “a ser afecta pa e cambio di gobierno, cu temporalmente a pone cierto decisionnan administrativo on hold.” No obstante, e procesonan administrativo a sigui mas tanto posibel, y e atrasonan awor a ser resolvi. Segun Secretario di Estado Van Marum e gobierno nobo tambe ta mira e Landspakket como un oportunidad pa acelera temanan for di e acuerdo di coalicion, incluyendo un estudio den e desmantelacion di e refineria. Segun Den Haag, esaki ta marca un boluntad administrativo renoba cla pa haci progreso.

“Mehoracionnan significativo” a ser haci na Aruba den e area di maneho financiero –un di e elementonan mas critico di e Landspakket. Segun e rapport, e presupuestonan di e paisnan Caribense tabata laat, insuficientemente transparente, y di mal calidad pa añanan largo. Aruba a kibra e patronchi aki door di introduci fechanan di amienda fiho den forma di un memorandum di primavera y otoño (voor- en najaarsnota). Esaki mester garantisa un prevision mas grandi y un miho control riba gastonan y politica. Ademas, un sistema nobo di presupuesto lo ser introduci na 2026, reemplasando e sistema actual di spreadsheetnan di Excel cu ta propenso na eror.

E procesonan financiero y controlnan pa e fluhonan di placa mas importante tambe lo ser documenta, loke ta necesario pa garantisa e confiabilidad di futuro auditoria y rapportnan di auditoria. Si cumpli cu e schedule actual, Aruba lo por ricibi su prome rapport di auditor no cualifica cuminsando cu e cuentanan anual di 2027. Esaki lo ta un logro historicamente significante, ya cu maneho financiero tabata bou di presion pa decadas.

E Secretario di Estado ta enfatisa cu dedicacion continuo dentro di e organisacion administrativo ta esencial, hasta despues di 2027, ora e colaboracion formal por termina.

Aruba a implementa un serie di reformanan fiscal dirigi na un sistema mas husto cu un base fiscal mas amplio. Esakinan ta inclui cambionan na impuesto riba entrada, salario, ganashi y dividendo, impuesto riba turista, impuesto riba transferencia di bienes raices, y e Ordenansa General di Impuesto. E codificacion di intercambio di dato entre e autoridadnan di belasting y banconan ta destina pa combati evasion di belasting y labamento di placa.

Ademas, un proyecto di varios aña ta andando pa elimina e atraso enorme di obhecionnan (bezwaar). Actualmente, tin casi 100 mil obhecion pendiente; segun e rapport di e Secretario di Estado, esakinan mester ser reduci na cero pa 2027. Hulanda ta kere cu un cambio cultural ta esencial pa esaki, como cu un moral fiscal stabiel no por desaroya sin e confiansa di ciudadano y negoshinan.

E Landspakket tambe ta inclui plannan pa fortifica e FIOT (Financial Intelligence and Oversight Team), cu asistencia di Fiscale Inlichtingen en OproepingsDienst (FIOD), cuminsando na 2026. E colaboracion aki lo mester yuda Aruba combati criminalidad financiero moderno mas efectivamente.

Un otro proyecto di reforma integral ta regarda enseñansa. Un revision di henter e sistema di enseñansa Arubano a resulta den un serie di recomendacion cu actualmente ta den ehecucion. E prome fase di e inventarisacion di e condicion di edificionan di scol y material di enseñansa a keda cla, y Aruba a adopta un cuadro oficial di desaroyo profesional pa maestronan. Esaki ta forma e base pa mehoracion structural den calidad di enseñansa.

Tambe ta trahando pa desaroya cifranan clave confiabel y rekisitonan tecnico pa un sistema digital di monitoreo di studiante. Mas desaroyo profesional di maestronan, implementacion di structuranan di cuido di studiante, y expansion di recursonan di enseñansa digital ta plania pa april 2027. Ademas, e Plataforma pa Enseñansa y Labor ta ser fortalece pa mehora e conexion entre enseñansa y e mercado laboral—un punto crucial pa futuro perspectivanan economico di Aruba.

E Areglo Mutuo pa Cooperacion den Reforma ta caduca formalmente dia 4 di april 2027, aunke cada pais den Caribe por scoge pa prolong’e pa dos aña. E Secretario di Estado ta enfatisa cu e proximo lunanan ta crucial: e rapport di evaluacion, cu mester duna bista riba e efectividad di e colaboracion te awor, lo ser publica na april 2026. A base di e rapport aki, e gobiernonan mester determina si, y den ki forma, mas colaboracion ta deseabel.

Pa Aruba, esaki ta nifica cu e gabinete mester dicidi si e kier mas sosten y guia despues di 2027 den finalisacion di e reformanan, of si e kier sigui cu esakinan completamente independiente. E rapport ta enfatisa cu tin varios opcion: extension completo, cooperacion tematico, of un forma completamente nobo di cooperacion. Hulanda tin intencion di tuma un decision riba esaki cu e lidernan di gobierno di Caribe den zomer di 2026.

Loke ta sigur ta cu Hulanda lo sigui enfoca riba ehecucion sostenibel di e reformanan den e periodo binidero. Pa esaki, e Secretario di Estado ta consulta regularmente cu e prome ministernan di e paisnan tocante prioridadnan, retonan, y sosten necesario.

E Secretario di Estado ta expresa un optimismo cauteloso riba progreso di Aruba. Pasonan cla a ser tuma, particularmente den maneho financiero y educacion. Sinembargo, e pregunta ta keda si e ritmo ta suficiente pa logra tur e metanan pa april 2027. El a indica cu e gobierno nobo ta mira e Landspakket explicitamente como un oportunidad pa acelera e reformanan delinea den e acuerdo di coalicion, loke ta indica un actitud constructivo pa cu Den Haag. Na mesun momento, algun proceso, manera e limpiesa di e administracion financiero, ta grandi y compleho, cu interdependencianan cu ta dificil pa acelera.

E pregunta di desmantelacion di e refineria, cual Aruba ta investigando actualmente bou di e Landspakket, tambe lo por tin consecuencianan socioeconomico significante y ta afecta directamente e discusion riba diversificacion economico. Esaki ta haci e aña binidero politicamente importante: Aruba lo mester haci escogencianan strategico cu lo determina con economia ta desaroya den e proximo decadanan.

Secretario di Estado Van Marum ta remarca cu 2026 lo ta un aña decisivo. E rapport di evaluacion riba e colaboracion lo ser publica, e prome mehoracionnan grandi di e sistema financiero lo ser lansa, y proyectonan importante di educacion lo drenta e fase di implementacion. Pa Aruba, esaki ta e momento pa determina si e Landspakket tabata un empuhe temporal of ta forma e fundeshi pa modernisacion a largo plaso di servicio y administracion publico.

Sea cual sea e decision final, e Secretario di Estado ta laga sa bon cla cu Hulanda ta spera cu Aruba por implementa e reformanan independientemente despues di 2027—basta cu e proximo lunanan ser usa intensivamente pa elimina atraso permanentemente y incorpora mehoracionnan structural.